“ໂຊນ່ານ ຫຼື ອານຸລັກ ພະໄຊສີສຸນົນ” ນັກຮ້ອງນ້ອງໃໝ່ທີ່ມາພ້ອມນ້ຳສຽງ ທີ່ເປັນເອກະລັກ ແລະ ຄວາມສາມາດທີ່ພຽບພ້ອມທີ່ ຫາກໍແຈ້ງເກີດໃນວົງການບັນເທີງລາວ. “ໂຊນ່ານ ມີຖິ່ນຖານກຳເນີດມາຈາກ ດິນແດນກຸຫລາບແຫ່ງນ້ຳສອງສີ ເມືອງ ປາກຊັນ ແຂວງ ບໍລິຄຳໄຊ” ທີ່ມາສຶກສາ ຮ່ຳຮຽນທີ່ມະຫາວິໄລແຫ່ງຊາດ ແລະ ດຳລົງຊີວິດຢູ່ໃນນະຄອນຫຼວງວຽງຈັນ “ໂຊນ່ານ” ເປັນຄົນທີ່ມັກຮັກໃນສຽງເພງ ແລະ ວົງການບັນເທີງເປັນຊີວິດຈິດໃຈ ມັກຊອກຮູ້ສະແຫວງຫາສິ່ງໃໝ່ໆຢູ່ສະເໝີ ສາມາດພັດທະນາຕົນເອງ ທີ່ສາມາດສານຝັນໃຫ້ເປັນຈິງໄດ້ ແລະ ໄດ້ຮັບລາງວັນຈາການປະກວດນັກຮ້ອງ ມວນຊົນສຽງດີຄັ້ງທີ 2 ວິທະຍຸສາກົນແຫ່ງປະເທດຈີນ (CRI) ຈັດຂຶ້ນໃນປີ 2012 ໂດຍໄດ້ຮັບລາງວັນທີ 2. ໃນວົງການບັນເທີງ “ໂຊນ່ານ” ກໍເຄີຍເປັນນັກຮ້ອງຕາມຮ້ານອາຫານ, DJ, ໂຄສົກ ແລະ ພິທີກອນ…
ໃນຕອນນີ້ “ໂຊນ່ານ” ໄດ້ຜະລິດເພງທຳອິດຂອງຕົນເອງອອກສູ່ສັງຄົມ ເຊິ່ງເປັນຜົນງານເພງທີ່ມີຊື່ວ່າ: ທົນເພື່ອຫຍັງ ໂດຍໃຊ້ສາຍາວ່າ “Sonarn Destination” ສຳລັບຜົນງານເພງນີ້ “ໂຊນ່ານ” ໄດ້ປະພັນຂຶ້ນດ້ວຍຕົນເອງ ໂດຍອາໄສຫຼັກການແລະປະສົບການ ໃນການຫຼິ້ນດົນຕຣີ ແລະ ຮ້ອງເພງໃນການປະພັນ. ເຊິ່ງຜົນງານເພງນີ້ແມ່ນໄດ້ຖ່າຍທອດ ມາຈາກຊີວິດຈິງຂອງໂຊນ່ານເອງ ມີເນື້ອຫາກ່ຽວກັບຄວາມຮັກທີ່ບໍ່ສົມຫວັງ ຮັກເຂົາຂ້າງດຽວທັ້ງໆ ທີ່ເຂົາເຈົ້າບໍ່ມີໃຈໃຫ້ເລີຍ ແຕ່ຕົນເອງກໍຕ້ອງທົນເພາະຕົນເອງ ຮັກຄົນນັ້ນຫຼາຍປະມານນັ້ນເນາະ! ສຳລັບເພງນີ້ອາດຈະຖືກໃຈກັບຫຼາຍໆ ຄົນທີ່ຕົກຢູ່ໃນສະພາບດຽວກັນກັບເພິ່ນ ກໍເປັນໄດ້. ນອກນັ້ນ ກໍໄດ້ທີມງານຂອງ Sky Thakhek ມາຮ່ວມສະແດງ ແລະ ຖ່າຍທຳຮ່ວມກັນອີກດ້ວຍ. ພ້ອມທັງໄດ້ນາງ Music Video ໜ້າໃໝ່ມາຮ່ວມສະແດງ ເຊິ່ງ “ໂຊນ່ານ” ເອງກໍບໍ່ເຄີຍຖ່າຍ Music Video ມາກ່ອນຈຶ່ງເຮັດໃຫ້ທັງສອງຕ້ອງໄດ້ ຊ້ອມບົດກັນຫຼາຍພໍສົມຄວນ ແຕ່ທີມງານເພິ່ນກໍໄດ້ເຮັດຢ່າງເຕັມທີ່ ທຸກໆຄົນໃຫ້ຄວາມສຳຄັນກັບການສ້າງ ຜົນງານເພງນີ້ຫຼາຍ. ແລ້ວກໍໄດ້ມີການປ່ອຍອອກອາກາດ ໃນວັນທີ 19 ເດືອນ ມັງກອນ 2015 ທີ່ຜ່ານມາເທິງ Social Network ໄປເປັນທີ່ຮຽບຮ້ອຍແລ້ວ. ແຕ່ທາງວິທະຍຸ ແລະ ໂທລະພາບສາມາດຕິດຕາມໄດ້ໃນໄວໆນີ້ເດີ້.
ສຳລັບມິວສິກວີດີໂອສາມາດຮັບຊົມໄດ້ແລ້ວ ເທິງ YouTube ແລະ ສາມາດຕິດຕາມການເຄື່ອນໄຫວ ຂອງສິລະປິນທ່ານນີ້ໄດ້ທາງ Facebook ທີ່: Sonarn Destination. ແລ້ວເພິ່ນຍັງບອກອີກວ່າຍັງຈະມີເພງໃໝ່ ອອກມາໃຫ້ເບິ່ງກັນອີກເຊິ່ງເປັນເພງທີ່ມີ ເນື້ອຫາທີ່ຕໍ່ເນື່ອງກັນຈາກເພງ ທົນເພື່ອຫຍັງນີ້ ຈະເປັນເພງໃດນັ້ນຖ້າຕິດຕາມເບິ່ງ ໄປພ້ອມໆ ກັນເນາະ!