ເຊລຊີ ເອຟເອ ບໍ່ຮັບອຸທອນ ຄະດີ ດີເອໂກ້ ຄອສຕ້າ ດາວຍິງທີມຊາດສະເປນຫຼັງ ເຟອເອ ຕັ້ງຂໍ້ຫາຫຼິ້ນຮຸນແຮງເກີນກວ່າເຫດ ກໍລະນີ ໄປຢຽບ ເອັມເຮ່ ຊານ ນັກເຕະ ລີເວີຣ໌ພູລ ສົ່ງຜົນໃຫ້ຕ້ອງຖືກແບນ ຫ້າມລົງສະໜາມ 3 ນັດ ເລີ່ມຕັ້ງແຕ່ເກັມພົບກັບ ແມນເຊັສເຕີ ຊີຕີ້ ວັນເສົານີ້.
ສະມາຄົມບານເຕະອັງກິດ (ເອຟເອ) ສັ່ງລົງໂທດແບນ ດີເອໂກ້ ຄອສຕ້າ ກອງໜ້າໂຕເກັ່ງຂອງ ເຊລຊີ ຈ່າຝູງ ພຣີເມຍລີກ ຈໍານວນ 3 ນັດຈາກກໍລະນີຫຼິ້ນຮຸນແຮງເກີນກວ່າເຫດ ລະຫວ່າງເກັມແຄປປີຕອລ ວັນ ຄັພ ຮອບຮອງຊະນະເລີດ ນັດທີ່ ສອງ ທີ່ທັພ “ສິງບູສ໌” ເປີດຮັງ ສະແຕມຟອຣ໌ດ ບຣິດຈ໌ ເອົາຊະນະ ລີເວີຣ໌ພູລ 1-0 ໃນຊ່ວງຕໍ່ເວລາພິເສດ ຫຼັງຈົບ 90 ນາທີ ສະເໝີກັນ 0-0 ເມື່ອວັນອັງຄານທີ່ 27 ມັງກອນ ທີ່ຜ່ານມາ.
ເອຟເອ ຕັ້ງຂໍ້ຫາຄອສຕ້າ ວ່າຫຼິ້ນຮຸນແຮງ ເກີນກວ່າເຫດ ຫຼັງ ຢຽບເອັມເຮ່ຊານ ດາວຕະຂອງ ລີເວີຣ໌ພູລ ຊຶ່ງເຖິງແມ່ນວ່າກໍາມະການຈະບໍ່ເຫັນເຫດການ ດັ່ງກ່າວ ແຕ່ກ້ອງວີດີໂອ ສາມາດຈັບພາບນັ້ນເອົາໄວ້ໄດ້ຢ່າງຊັດເຈນ ຂະນະທີ່ ເຊລຊີກໍ່ໄດ້ຍື່ນເລື່ອງອຸທອນໄປຍັງສະມາຄົມລູກໜັງເມືອງຜູ້ດີແລ້ວ.
ຢ່າງໃດກໍ່ຕາມ ເອຟເອ ຕັດສິນບໍ່ຮັບຄໍາອຸທອນຂອງ “ສິງບູສ໌” ແລະ ສັ່ງລົງໂທດແບນດາວຍິງທີມຊາດສະເປນ ຈໍານວນ 3ນັດ ສົ່ງຜົນໃຫ້ຕ້ອງ ພາດລົງຫຼິ້ນເກັມພົບກັບ ແມນເຊັສເຕີ ຊີຕີ້ ໃນຄືນວັນເສົາ ທີ່ 31 ມັງກອນ 2015 ນີ້ ລວມເຖິງເກັມທີ່ຈະພົບກັບ ແອສຕັນ ວິລລ່າ ແລະ ເອຟເວີຣ໌ຕັນ ອີກດ້ວຍ.
>>ຂອບໃຈແຫຼ່ງຂໍ້ມູນ http://www.siamsport.co.th/football/premierleague/view.php?code=150130200104