ທາງການຣັດເຊຍເປີດເຜີຍ ຜູ້ນຳເກົາຫລີເໜືອ ຈະເດີນທາງເຂົ້າຮ່ວມ ງານສະຫລອງວັນໄຊຊະນະເໜືອຟາຊິດເຢຍລະມັນ ຄົບຮອບ 70 ປີ ຢູ່ຣັດເຊຍປີນີ້.
ສຳນັກຂ່າວຕ່າງປະເທດ ລາຍງານໃນວັນທີ 28 ມັງກອນນີ້ວ່າ ເຈົ້າໜ້າທີ່ລະດັບສູງຂອງຣັດເຊຍ ໄດ້ມີການເປີດເຜີຍເຖິງ ກຳນົດການມາຢ້ຽມຢາມຣັດເຊຍ ຂອງຜູ້ນຳເກົາຫລີເໜືອ ທ່ານ ກິມ ເຈິງ ອຶນ ເຊິ່ງຈະໄດ້ເດີນທາງມາຮ່ວມສະເຫລີມສະຫລອງຄົບຮອບ 70 ປີ ວັນກອງທັບແດງໂຊວຽດ ໄດ້ຮັບໄຊຊະນະເໜືອຟາຊິດເຢຍລະມັນ ຢູ່ນະຄອນຫລວງມົດສະກູ ໃນເດືອນພຶດສະພາ ທີ່ຈະມາເຖິງນີ້ ເຊິ່ງເປັນໄປຕາມການລາຍງານ ຂອງສຳນັກຂ່າວຂອງເກົາຫລີໃຕ້.
ແນວໃດກໍຕາມ, ທ່ານ ດິມິດທຣີ ເພດສະຄັອບ ໂຄສົກປະຈຳຕົວຂອງປະທານາທິບໍດີ ວະລາດີເມຍ ປູຕິນ ແຫ່ງຣັດເຊຍ ໄດ້ອອກມາຢືນຢັນພຽງແຕ່ວ່າ ຣັດເຊຍໄດ້ສົ່ງສານເຊີນຜູ້ນຳສູງສຸດເຖິງ 20 ປະເທດໃນທົ່ວໂລກ ເພື່ອມາເຂົ້າຮ່ວມງານດັ່ງກ່າວ ໂດຍໃນນັ້ນລວມທັງເກົາຫລີເໜືອ ແລະ ປະທານາທິບໍດີ ສີ ຈິ້ນຜິງ ຂອງ ສປ ຈີນອີກດ້ວຍ ໂດຍທີ່ຍັງບໍ່ທັນໄດ້ມີການຢືນຢັນວ່າ ຝ່າຍເກົາຫລີເໜືອຈະແມ່ນທ່ານ ກິມ ເຈິງ ອຶນ ເປັນຜູ້ເດີນທາງມາຮ່ວມແຕ່ປະການໃດ.