ກອງປະຊຸມອົງການປົກຄອງນະຄອນຫຼວງວຽງຈັນ ປະຈຳເດືອນມັງກອນ 2015 ຈັດຂຶ້ນວັນທີ 26 ມັງກອນ 2015 ຢູ່ທີ່ຫ້ອງວ່າການປົກຄອງນະຄອນຫຼວງ ພາຍໃຕ້ການເປັນປະທານຂອງທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງ ເຊິ່ງມີບັນດາຮອງເຈົ້າຄອງ ເຈົ້າເມືອງ ແລະ ຫົວໜ້າພະແນກການຕ່າງໆເຂົ້າຮ່ວມ.
ກອງປະຊຸມໃນຄັ້ງນີ້ ແມ່ນໄດ້ຮັບຟັງການລາຍງານ ແລະ ປະກອບຄຳເຫັນຕໍ່ຮ່າງດຳລັດຕ່າງໆ ໂດຍສະເພາະແມ່ນຮ່າງດຳລັດວ່າດ້ວຍການຄຸ້ມຄອງແຄມຂອງ ຮ່າງດຳລັດວ່າດ້ວຍການກຳນົດຂອບເຂດສະຫງວນຮ່ອງລະບາຍນ້ຳບຶງທາດຫຼວງ ບຶງຄັດເຄົ້າ-ຫ້ວຍໝາກຮຽວ ແລະ ຫ້ວຍເດື່ອ ການລາຍງານ ແລະ ປະກອບຄຳເຫັນຕໍ່ການນຳໃຊ້ໃບເກັບເງິນອາກອນ ແລະ ອາກອນມູນຄ່າເພີ່ມແບບມີລາງວັນ ຈາກບັນດາຫົວໜ້າພະແນກການທີ່ກ່ຽວຂ້ອງ ຮັບຜິດຊອບວຽກງານດັ່ງກ່າວ.
ນອກຈາກນີ້ ໃນກອງປະຊຸມທ່ານ ສົມວັນດີ ນາຖາວົງ ຮອງເຈົ້າຄອງນະຄອນຫຼວງ ຍັງໄດ້ລາຍງານ ແລະ ຕີລາຄາຜົນການຈັດຕັ້ງປະຕິບັດ ວຽກງານລວມຂອງອົງການປົກຄອງນະຄອນຫຼວງ ປະຈຳໄຕມາດ I (ເດືອນ 10-12 ສົກປີ 2014-2015) ແລະ ທິດທາງແຜນການ ປະຈຳໄຕມາດ II (ເດືອນ 1-3 ສົກປີ 2014-2015) ໂດຍຜ່ານການຈັດຕັ້ງປະຕິບັດໃນ 3 ເດືອນທີ່ຜ່ານມາ ສາມາດປະຕິບັດໄດ້ທັງໝົດ 169 ໂຄງການ ມູນຄ່າ 42.492,88 ລ້ານກີບ ເຊິ່ງນະຄອນຫຼວງໄດ້ຮັບມອບໝາຍຈາກກະຊວງການເງິນ ໃຫ້ຈັດຕັ້ງປະຕິບັດແຜນການເກັບລາຍຮັບໃນສົກປີ 2014-2015 ທັງໝົດ 1.042 ຕື້ກີບ ກວມເອົາ 2,94% ຂອງ GDP ນະຄອນຫຼວງ ຜ່ານການຈັດຕັ້ງປະຕິບັດເກັບລາຍຮັບເຂົ້າງົບປະມານງວດ I (ແຕ່ວັນທີ 1/10/2014-24/12/2014) ສາມາດປະຕິບັດໄດ້ 181,24 ຕື້ກີບ ເທົ່າກັບ 13,46% ຂອງແຜນການປີ ໃນນັ້ນ ຂະແໜງສ່ວຍສາອາກອນ ປະຕິບັດໄດ້ 13,56 ຕື້ກີບ ເທົ່າກັບ 14,01% ຂອງແຜນການປີ ຂະແໜງຊັບສິນຂອງລັດປະຕິບັດໄດ້ 5,70 ຕື້ກີບ ເທົ່າກັບ 7,03% ຂອງແຜນການປີ ຂະແໜງການເງິນລັດວິສາຫະກິດ ປະຕິບັດໄດ້ 418,90 ລ້ານກີບ ເທົ່າກັບ 66,81% ຂອງແຜນການປີ ລາຍຮັບພາສີ (ພູດແບ່ງປັນ) ປະຕິບັດໄດ້ 40,56 ຕື້ກີບ ເທົ່າກັບ 13,31% ຂອງແຜນການປີ ດ້ານລາຍຈ່າຍງົບປະມານປະຕິບັດໄດ້ທັງໝົດ 126,32 ຕື້ກີບ ເທົ່າກັບ 21,74% ຂອງແຜນການປີ.
ສຳລັບທິດທາງແຜນວຽກປະຈຳໄຕມາດ II (ເດືອນ 1-3 ສົກປີ 2014-2015) ສືບຕໍ່ສູ້ຊົນເຮັດໃຫ້ເສດຖະກິດຂະຫຍາຍຢ່າງຕໍ່ເນື່ອງ ລວມຍອດຜະລິດຕະພັນພາຍໃນຂອງນະຄອນຫຼວງ ເພີ່ມຂຶ້ນບໍ່ໃຫ້ຫຼຸດ 12,7% ຄາດຄະເນລວມຍອດຜະລິດຕະພັນພາຍໃນ ຈະໃຫ້ໄດ້ໃນລະດັບ 29.912 ຕື້ກີບ ສ້າງທຸກເງື່ອນໄຂໃນການດຶງດູດເອົານັກລົງທຶນພາຍໃນ ແລະ ຕ່າງປະເທດມາລົງທຶນນັບມື້ນັບຫຼາຍຂຶ້ນ ແລະ ສູ້ຊົນຈັດຕັ້ງປະຕິບັດໃຫ້ໄດ້ຕາມລະດັບຄາດໝາຍ ຂອງແຕ່ລະຂະແໜງການລາຍຮັບ ເພື່ອຕອບສະໜອງລາຍຈ່າຍທີ່ກະຊວງການເງິນມອບໝາຍໃຫ້ປະຕິບັດໄດ້ 100% ຕົວເລກຄາດໝາຍສູ້ຊົນແຜນການລາຍຮັບປະຈຳໄຕມາດ II ສົກປີ 2014-2015 ໃຫ້ໄດ້ 312,63 ຕື້ກີບ ຄາດຄະເນປະຕິບັດ 2 ງວດ (6 ເດືອນ) ເທົ່າກັບ 41,86% ເປັນເງິນ 436,26 ຕື້ກີບ.
ແຫລ່ງຂ່າວ: ວຽງຈັນໃໝ່