ພິທີອວ່າຍແລວນ້ຳໂຄງການກໍ່ສ້າງ ເຂື່ອນໄຟຟ້ານ້ຳຂອງໄຊຍະບູລີ ໄດ້ຈັດຂຶ້ນວັນທີ 26 ມັງກອນ 2015 ທີ່ເມືອງ ແລະ ແຂວງໄຊຍະບູລີ ໂດຍເປັນກຽດເຂົ້າຮ່ວມ ແລະ ລັ່ນຄ້ອງ 9 ບາດ ເພື່ອເປັນສີລິມົງຄຸນຂອງທ່ານ ຈູມມາລີ ໄຊຍະສອນ ປະທານປະເທດ ພ້ອມດ້ວຍທ່ານລັດຖະມົນຕີວ່າການ ຊ່ວຍວ່າການ ທ່ານເຈົ້າແຂວງໄຊຍະບູລີ ທ່ານເຈົ້າເມືອງ ພ້ອມດ້ວຍແຂກຖືກເຊີນຈາກພາກລັດ ແລະ ເອກະຊົນເຂົ້າຮ່ວມ.
ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານການຜະລິດ ແລະ ຈໍລະຈອນສິນຄ້າ ໄດ້ກ່າວວ່າ: ໂຄງການພະລັງໄຟຟ້າຝາຍນ້ຳລົ້ນນ້ຳຂອງໄຊຍະບູລີ ເປັນໂຄງການໜຶ່ງທີ່ມີຄວາມສຳຄັນ ຢູ່ໃນແຜນພັດທະນາພະລັງງານໄຟຟ້າຂອງ ສປປ ລາວ ເປົ້າໝາຍຂອງການພັດທະນາແມ່ນເພື່ອຂຸດຄົ້ນ ແລະ ເສີມຂະຫຍາຍທ່າແຮງຂອງປະເທດ ທີ່ມີແມ່ນ້ຳລຳເຊຫຼາຍສາຍ ສາມາດຜະລິດພະລັງງານໄຟຟ້າ ສະໜອງໃຫ້ແກ່ການຊົມໃຊ້ພາຍໃນ ແລະ ສົ່ງອອກ ສ້າງລາຍຮັບໃຫ້ກັບປະເທດຊາດ ພິທີອວ່າຍແລວນ້ຳຄັ້ງນີ້ ຈັດເປັນໄລຍະທີໜຶ່ງຂອງການກໍ່ສ້າງ ເພື່ອກ້າວສູ່ໄລຍະທີສອງຂອງໂຄງການ ເຊິ່ງທາງຄະນະບໍລິຫານຂອງບໍລິສັດ ຜູ້ພັດທະນາໂຄງການກໍ່ຄືບໍລິສັດທີ່ປຶກສາ ຈະຕ້ອງຂຸ້ນຂ້ຽວໃນການເອົາໃຈໃສ່ຄຸ້ມຄອງ ການດຳເນີນໂຄງການແຕ່ລະຂັ້ນຕອນ ໃຫ້ຖືກຕ້ອງຕາມມາດຖານເຕັກນິກຄວາມປອດໄພສິ່ງແວດລ້ອມ ແລະ ປອດໃສ ໃຫ້ສອດຄ່ອງກັບສົນທິສັນຍາວ່າດ້ວຍການນຳໃຊ້ແມ່ນ້ຳຂອງ ປີ 1995 ບໍ່ສົ່ງຜົນກະທົບຕໍ່ບັນດາປະເທດລຸ່ມແມ່ນ້ຳຂອງ ເນື່ອງຈາກໂຄງການນີ້ ມີລັດຖະບານໄດ້ວ່າຈ້າງວິສາວະກອນທີ່ປຶກສາ ທີ່ມີຊື່ສຽງລະດັບໂລກ ມາຄຸ້ມຄອງ ຕິດຕາມ ແລະ ກວດກາຢ່າງໃກ້ຊິດ.
ເພື່ອເປັນການຕອບສະໜອງ ໃຫ້ກັບການພັດທະນາໄລຍະຍາວ ຈະສູ້ຊົນໃຫ້ ສປປ ລາວ ຫຼຸດພົ້ນອອກຈາກສະພາວະຄວາມດ້ອຍພັດທະນາ ຫັນໄປສູ່ປະເທດອຸດສາຫະກຳ ແລະ ທັນສະໄໝ ການປັບປຸງລະບົບພື້ນຖານໂຄງລ່າງທາງດ້ານເສດຖະກິດ-ສັງຄົມ ຈະຕ້ອງໃຫ້ທັນສະໄໝໃນບາງເຂດ ແລະ ບາງດ້ານເພື່ອອຳນວຍຄວາມສະດວກ ໃຫ້ແກ່ການພັດທະນາ ແລະ ການເຊື່ອມໂຍງເຂົ້າສູ່ພາກພື້ນ ແລະ ສາກົນ ສ້າງໃຫ້ ສປປ ລາວ ກາຍເປັນໃຈກາງຂອງການບໍລິການບາງດ້ານໃນພາກພື້ນ ການເຊື່ອມໂຍງເສດຖະກິດ ແລະ ການຮ່ວມມືກັບພາກພື້ນ ແລະ ສາກົນໄດ້ມີການເພີ່ມຂຶ້ນ ແລະ ຂະຫຍາຍກວ້າງຂວາງອອກ ດ້ວຍຫຼາຍຮູບແບບຫຼາຍລະດັບ ແລະ ມີການແຂ່ງຂັນກັນສູງຂຶ້ນ ມີຫຼາຍປະເທດໄດ້ກາຍເປັນສະມາຊິກຂອງອົງການຕ່າງໆ ເຊັ່ນ: ອົງການການຄ້າໂລກ (WTO) ປະຊາຄົມເສດຖະກິດອາຊຽນ (AEC) ແລະ ອຶ່ນໆ ເຊິ່ງຈະເຮັດໃຫ້ການຄ້າ ການລົງທຶນ ການບໍລິການເພີ່ມຂຶ້ນ ບັນດາຄູ່ຮ່ວມພັດທະນາ ແລະ ອົງການຈັດຕັ້ງສາກົນ ຈະສືບຕໍ່ໃຫ້ການຊ່ວຍເຫຼືອ ແລະ ເຂົ້າໃຈຖືກຕ້ອງ ຕໍ່ກັບການພັດທະນາໂຄງການໄຟຟ້ານ້ຳຕົກຂະໜາດໃຫຍ່ໃນ ສປປ ລາວ.
ໂຄງການກໍ່ສ້າງເຂື່ອນໄຟຟ້າພະລັງງານນ້ຳຂອງໄຊຍະບູລີ ໄດ້ເລີ່ມລົງມືກໍ່ສ້າງມາແຕ່ປີ 2012 ດ້ວຍອາຍຸສຳປະທານ 25-30 ປີ ມາຮອດປັດຈຸບັນ ໂຄງການມີຄວາມຄືບໜ້າປະມານ 40% ພາຍຫຼັງສຳເລັດການສ້າງຕົວເຂື່ອນຝັ່ງເບື້ອງຂວາ ແລະ ທາງໂຄງການໄດ້ມີການອວ່າຍແລວນ້ຳຂອງມາເບື້ອງຝັ່ງຂວາ ຈາກນັ້ນກໍ່ຈະໄດ້ເລີ່ມກໍ່ສ້າງຕົວເຂື່ອນຝັ່ງເບື້ອງຊ້າຍຕໍ່ທັນທີ ເພື່ອໃຫ້ໂຄງການສຳເລັດໃນປີ 2019 ແລະ ສາມາດຜະລິດໄຟຟ້າໄດ້ຢ່າງເຕັມອັດຕາ ໂຄງການດັ່ງກ່າວມີມູນຄ່າການລົງທຶນປະມານ 3,8 ຕື້ໂດລາສະຫະລັດ ຫຼື ປະມານ 30 ພັນຕື້ກີບ ແລະ ມີກຳລັງຕິດຕັ້ງທັງໝົດ 1.285 ເມກາວັດ ຈະສາມາດຜະລິດກະແສໄຟຟ້າໄດ້ທັງໝົດ 7.406 ກິໂລວັດໂມງຕໍ່ປີ ໃນນັ້ນຈະສະໜອງພາຍໃນ 60 ເມກາວັດ ສ່ວນທີ່ເຫຼືອແມ່ນສະໜອງໃຫ້ກັບປະເທດໄທ.
ດ້ວຍຈຳນວນການລົງທຶນຢ່າງມະຫາສານ ບວກກັບລາຍຮັບຂອງພາກລັດມີຢ່າງຈຳກັດ ຈຶ່ງໄດ້ເປີດໂອກາດໃຫ້ນັກທຸລະກິດເຂົ້າມາມີສ່ວນຮ່ວມເຊັ່ນ: ບໍລິສັດພາຍໃນປະເທດໄທຖືຮຸ້ນ 75% ລັດຖະບານລາວ 20% ແລະ ນັກທຸລະກິດລາວ 5% ການກໍ່ສ້າງແມ່ນໄດ້ເລັ່ງປະຕິບັດຕະຫຼອດ 24 ຊົ່ວໂມງ ນັບແຕ່ມື້ລົງມືປະຕິບັດ ເພື່ອໃຫ້ໂຄງການສຳເລັດຕາມກຳນົດເວລາ ເຊິ່ງໄດ້ໃຊ້ແຮງງານປະມານ 9-10 ພັນຄົນ ໃນນັ້ນ ແຮງງານລາວກວມເອົາ 60%.
ແຫລ່ງຂ່າວ: ວຽງຈັນໃໝ່