ກຸ່ມຕິດອາວຸດລັດອິດສະລາມໃນຊີເຣຍ ປະກາດຜ່ານສະຖານີວິທະຍຸຂອງຕົນເອງ ຢືນຢັນວ່າພວກເຂົາໄດ້ສັງຫານ 1 ໃນ 2 ຕົວປະກັນຊາຍຍີ່ປຸ່ນແລ້ວ ຫລັງຍີ່ປຸ່ນບໍ່ຍອມຈ່າຍເງິນຄ່າໄຖ່.
ສຳນັກຂ່າວຕ່າງປະເທດ ລາຍງານໃນວັນທີ 26 ມັງກອນນີ້ວ່າ ກຸ່ມຕິດອາວຸດລັດອິດສະລາມ ຫລື IS ໄດ້ອອກມາຢືນຢັນຜ່ານສະຖານີວິທະຍຸ ອັນ-ບາຢານ ຂອງພວກເຂົາ ໃນມື້ວັນອາທິດທີ 25 ມັງກອນຜ່ານມານີ້ວ່າ ພວກເຂົາໄດ້ປະຫານຊີວິດ 1 ໃນ 2 ຕົວປະກັນຊາວຍີ່ປຸ່ນ ເຊິ່ງຖືກພວກເຂົາຈັບເອົາໄວ້ແລ້ວ 1 ວັນ ຫລັງຈາກທີ່ມີການເຜີຍແຜ່ຄລິບພາບນິ້ງ ແລະ ສຽງ ເຊິ່ງສະແດງໃຫ້ເຫັນ ທ້າວ ເຄັນຈິ ໂກໂຕະ ຢືນຖືພາບສົບຂອງ ທ້າວ ຮາຣູນະ ຢູຄາວະ ທີ່ຖືກຂ້າຕັດຄໍ.
ທັງນີ້ ໃນຄລິບວີດີໂອພາບນິ້ງ ທີ່ມີການບັນທຶກສຽງຂອງຜູ້ຊາຍທີ່ອ້າງວ່າ ແມ່ນສຽງຂອງທ້າວ ໂກໂຕະ ໄດ້ກ່າວເປັນພາສາອັງກິດເຊິ່ງໄດ້ເວົ້າວ່າ ທ້າວ ຢູຄາວະ ໄດ້ຖືກສັງຫານແລ້ວ ເພາະຍີ່ປຸ່ນບໍ່ຍອມຈ່າຍເງິນຄ່າໄຖ່ຈຳນວນ 200 ລ້ານໂດລາສະຫະລັດ ພາຍໃນ 72 ຊົ່ວໂມງ ຫລັງຈາກທີ່ພວກເຂົາໄດ້ປະກາດຮຽກຄ່າໄຖ່ ໃນມື້ວັນອັງຄານທີ 20 ມັງກອນຜ່ານມາ.
ສຳລັບ ທ້າວ ເຄັນຈິ ໂກໂຕະ ໜຶ່ງໃນຕົວປະກັນທີ່ຍັງມີຊີວິດຢູ່ ໄດ້ຖືກກຸ່ມລັດອິດສະລາມ ປ່ຽນຈາກການຮຽກຄ່າໄຖ່ມາເປັນຂໍ້ສະເໜີໃໝ່ ໂດຍພວກເຂົາຈະຍອມປ່ອຍຕົວປະກັນຊາວຍີ່ປຸ່ນຜູ້ນີ້ ຖ້າຫາກຍີ່ປຸ່ນສາມາດເຈລະຈາກັບປະເທດຈໍແດນ ປ່ອຍຕົວ ແລະ ແລກປ່ຽນຕົວປະກັນກັບ ນາງ ຊາຈິດາ ອັນ-ຣິຊາວີ ອາຍຸ 44 ປີ ເຊິ່ງກຳລັງຖືກກັກຂັງລໍຖ້າໂທດປະຫານຊີວິດໃນປະເທດຈໍແດນ ຈາກຂໍ້ຫາພະຍາມກໍ່ເຫດລະເບີດຂ້າຕົວຕາຍໃນປີ 2005.