ກຸ່ມ​ລັດ​ອິດ​ສະ​ລາມ ຫລື IS ໄດ້​ຂູ່​ຈະ​ສັງ​ຫານຕົວ​ປະ​ກັນ​ຊາວ​ຍີ່​ປຸ່ນ 2 ຄົນ ພາຍ​ໃນ 72 ຊົ່ວ​ໂມງ ຫາກ​ລັດ​ຖະ​ບານ​ຍີ່​ປຸ່ນ​ບໍ່​ຍອມ​ຈ່າຍ​ເງິນ​ຄ່າ​ໄຖ່ 200 ລ້ານ​ໂດ​ລາ​ສະ​ຫະ​ລັດ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 21 ມັງ​ກອນ​ນີ້​ວ່າ ກຸ່ມ​ລັດ​ອິດ​ສະ​ລາມ ໄດ້​ຈັບ​ກຸມ​ຕົວ ທ້າວ ຮາ​ຣຸ​ນະ ຢູ​ກາ​ວະ ແລະ ທ້າວ ເຄັນ​ຈິ ໂກ​ໂຕະ​ໂຈ​ໂກ ແລ້ວ​ເຜີຍ​ແຜ່​ຄຳ​ຂູ່ໃນ​ມື້​ວານ​ນີ້ (20 ມັງ​ກອນ) ວ່າຈະ​ສັງ​ຫານ 2 ຕົວ​ປະ​ກັນ​ພາຍ​ໃນ​ເວ​ລາ 72 ຊົ່ວ​ໂມງ ຖ້າ​ຫາກ​ລັດ​ຖະ​ບານ​ຍີ່​ປຸ່ນ​ບໍ່​ຍອມ​ຈ່າຍ​ເງິ​ນ​ຄ່າ​ໄຖ່ 200 ລ້ານ​ໂດ​ລາ​ສະ​ຫະ​ລັດ ໂດຍ​ກຸ່ມ​ດັ່ງ​ກ່າວ​ໄດ້​ລະ​ບຸ​ວ່າ ປະ​ຕິ​ບັດ​ການ​ໃນ​ເທື່ອ​ນີ້ ແມ່ນ​ເພື່ອ​ຕອບ​ໂຕ້​ນະ​ໂຍ​ບາຍ​ຂອງ ນາ​ຍົກ​ລັດ​ຖະ​ມົນ​ຕີ ຊິນ​ໂຊ ອາ​ເບະ ທີ່​ໄດ້​ປະ​ກາດ​ຈະ​ສະ​ໜັບ​ສະ​ໜູນ​ປະ​ຕິ​ບັດ​ການກວາດ​ລ້າງ​ກຸ່ມ IS ເມື່ອ​ເດືອນ​ສິງ​ຫາ​ປີ 2014 ຜ່ານ​ມາ.

ດ້ານ​ທ່າ​ທີ​ຂອງ​ຍີ່​ປຸ່ນ ສຳ​ນັກ​ຂ່າວ​ກຽວ​ໂດ​ໄດ້​ລາຍ​ງານ​ເຖິງ​ຄວາມ​ພະ​ຍາ​ຍາມ​ຂອງ​ລັດ​ຖະ​ບານ ໃນ​ການ​ທີ່​ຈະ​ຊ່ວຍ​ເຫລືອ​ຕົວ​ປະ​ກັນ​ທັງ​ສອງ​ຄົນ ໂດຍ​ລະ​ບຸ​ວ່າ ທ່ານ ຟູ​ມິ​ໂອະ ຄິ​ຊິ​ດະ ລັດ​ຖະ​ມົນ​ຕີ​ວ່າ​ການ​ກະ​ຊວງ​ການ​ຕ່າງ​ປະ​ເທດ ໄດ້​ໂທ​ລະ​ສັບ​ສາຍ​ກົງ​ເຖິງ​ລັດ​ຖະ​ມົນ​ຕີ​ຕ່າງ​ປະ​ເທດ​ສະ​ຫະ​ລັດ​ອາ​ເມ​ຣິ​ກາ ແລະ ຝ​ຣັ່ງ​ແລ້ວ ເພື່ອ​ປະ​ສານ​ຂໍ​ຄວາມ​ຊ່ວຍ​ເຫລືອ ແລະ ໃນ​ຂະ​ນະ​ທີ່​ໄດ້​ມີ​ລາຍ​ງານ​ອີກວ່າ ລັດ​ຖະ​ບານ​ຂອງ​ທ່ານ ອາ​ເບະ ກໍ​ໄດ້​ມີ​ການ​ຮ້ອງ​ຂໍ​ຄວາມ​ຊ່ວຍ​ເຫລືອ​ ໃຫ້​ລັດ​ຖະ​ບານ​ໃນ​ຕາ​ເວັນ​ອອກ​ກາງ​ຊ່ວຍ​ເປັນ​ຄົນ​ກາງ ໃນ​ການ​ເຈ​ລະ​ຈາ​ກັບ​ກຸ່ມ​ລັດ​ອິດ​ສະ​ລາມ ໃຫ້​ຍອມ​ປ່ອຍ​ຕົວ​ປະ​ກັນ​ຊາວ​ຍີ່​ປຸ່ນ​ທັງ​ສອງ​ຄົນ ເປັນ​ອິດ​ສະ​ຫລະ.