ລັດຖະບານ ສສ ຫວຽດນາມ ໄດ້ໃຫ້ການຊ່ວຍເຫຼືອແກ່ລັດຖະບານລາວ ຈັດຕັ້ງປະຕິບັດໂຄງການຖ່າຍພາບທາງອາກາດ ເພື່ອປະກອບເຂົ້າໃນການສ້າງແຜນທີ່ໃໝ່ ຄາດວ່າໂຄງການດັ່ງກ່າວ ຈະໃຫ້ສຳເລັດໃນທ້າຍປີ 2016 ນີ້ ເພື່ອເປັນຂໍ້ມູນຂ່າວສານແກ່ການຈັດຕັ້ງປະຕິບັດ ວຽກງານພັດທະນາເສດຖະກິດ-ສັງຄົມຂອງປະເທດ ໃຫ້ເຂັ້ມແຂງຍິ່ງຂຶ້ນ ຂະນະທີ່ໄລຍະຜ່ານມາ ກໍ່ໄດ້ຮັບທຶນຊ່ວຍເຫຼືອຈາກລັດຖະບານປະເທດແຟຼັງລັງ ແຕ່ປີ 2010-2014 ເຊິ່ງໂຄງການໄດ້ບິນຖ່າຍພາບທາງອາກາດຢູ່ທາງພາກໃຕ້ ແລະ ອີກບາງສ່ວນຂອງພາກກາງ.
ກົມແຜນທີ່ແຫ່ງຊາດ ກະຊວງພາຍໃນ ຮ່ວມກັບກົມວັດແທກ ແລະ ແຜນທີ່ ກະຊວງຊັບພະຍາກອນ-ສິ່ງແວດລ້ອມ ສສ ຫວຽດນາມ ໄດ້ຈັດກອງປະຊຸມ ເພື່ອປຶກສາຫາລືກ່ຽວກັບການຈັດຕັ້ງປະຕິບັດ ໂຄງການຊ່ວຍເຫຼືອຂອງລັດຖະບານ ສສ ຫວຽດນາມ ໂຄງການຖ່າຍພາບທາງອາກາດຂຶ້ນ ໃນຕອນບ່າຍວັນທີ 15 ມັງກອນ 2015 ຢູ່ທີ່ກົມແຜນທີ່ ເຂົ້າຮ່ວມມີທ່ານ ດຣ. ທອງຈັນ ມະນີໄຊ ລັດຖະມົນຕີຊ່ວຍວ່າການກະຊວງພາຍໃນ ທ່ານ ຫງັຽນ ລິ່ງ ງັອກ ລັດຖະມົນຕີຊ່ວຍວ່າການກະຊວງຊັບພະຍາກອນ ແລະ ສິ່ງແວດລ້ອມ ສສ ຫວຽດນາມ ພ້ອມດ້ວຍບັນດາຫົວໜ້າກົມ ຫ້ອງການ ແລະ ພະນັກງານ-ວິຊາການກ່ຽວຂ້ອງສອງຝ່າຍ.
ສຳລັບໂຄງການດັ່ງກ່າວ ແມ່ນໄດ້ຈັດຕັ້ງປະຕິບັດແຕ່ປີ 2014 ເປັນຕົ້ນມາ ຈະສຳເລັດໃນທ້າຍປີ 2016 ພາຍຫຼັງສຳເລັດໂຄງການຄາດວ່າ ສປປ ລາວ ຈະມີແຜນທີ່ພູມມີປະເທດສະບັບໃໝ່ ເຊິ່ງການຈັດຕັ້ງປະຕິບັດວຽກງານ ປະຈຳປີ 2014 ສອງຝ່າຍໄດ້ສຳເລັດການບິນຖ່າຍພາບທາງອາກາດຢູ່ພື້ນທີ່ພາກເໜືອ ແລະ ບາງພື້ນທີ່ຢູ່ພາກກາງ ຈຳນວນ 52.802 ກິໂລຕາແມັດ ເຊິ່ງເນື້ອທີ່ແຜນການທັງໝົດມີ 70.000 ກິໂລຕາແມັດ ເກັບລະອຽດຮູບຖ່າຍທາງສະໜາມຕາມໃບແຜນທີ່ມາດຕາສ່ວນ 50.000 ຈຳນວນ 77 ແຜ່ນ ເທົ່າກັບ 20% ຂອງຈຳນວນທັງໝົດ 383 ແຜ່ນເລກໝາຍວັດແທກມູມຜິດດ່ຽງໃນແຜນທີ່ພາກສະໜາມໄດ້ 147 ແຜ່ນເລກໝາຍວັດແທກ ແລະ ແຕ້ມແຜນທີ່ພູມສັນຖານ ມາດຕາສ່ວນ 1:50.000 ສຳເລັດ 174% ສຳລັບແຜນວຽກປີ 2015 ຈະສືບຕໍ່ວຽກງານບິນຖ່າຍພາບທາງອາກາດຢູ່ພື້ນທີ່ພາກເໜືອ ໃນເນື້ອທີ່ 17.198 ກິໂລຕາແມັດ ວັດແທກ ແຕ້ມ ເກັບລະອຽດຮູບຖ່າຍທາງສະໜາມຕາມໃບແຜນທີ່ ມາດຕາສ່ວນ 1:50.000 ແລະ ວັດແທກມູມຜິດດ່ຽງໃນແຜນທີ່ພາກສະໜາມ ຈຳນວນ 236 ແຜນເລກໝາຍເປັນຕົ້ນ.
ແຫລ່ງຂ່າວ: ວຽງຈັນໃໝ່