ຂປລ. ກະຊວງອຸດສາຫະກຳ-ການຄ້າ ໄດ້ກະກຽມການວາງສະແດງຜົນສຳເລັດການພັດທະນາເສດຖະ ກິດ-ສັງຄົມ ແລະ ສິນຄ້າ ທີ່ເປັນຜະລິດຕະພັນ, ສີໄມ້ລາຍມື ຂອງຄົນລາວ ໃນໂອກາດສະເຫລີມສະຫລອງສອງວັນປະຫວັດສາດຂອງຊາດ.
ກອງປະຊຸມປຶກສາຫາລືການກະກຽມວາງສະແດງຜົນສຳເລັດ ໃນການພັດທະນາເສດຖະກິດ-ສັງຄົມ ແລະ ສິນຄ້າ ໄດ້ຈັດຂຶ້ນໃນວັນທີ 15 ມັງກອນ 2015 ເພື່ອກະກຽມ ສະເຫລີມສະຫລອງສອງວັນປະຫວັດສາດ ໃນປີ 2015 ຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ ແລະ ວັນສະຖາປະນາ ສປປ ລາວ ຄົບຮອບ 40 ປີ ໂດຍ ການເປັນປະທານຂອງ ທ່ານນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ມີບັນດາລັດຖະມົນຕີຊ່ວຍວ່າການ, ຫົວໜ້າກົມ, ຮອງກົມ ແລະ ພາກສ່ວນກ່ຽວຂ້ອງອ້ອມຂ້າງກະຊວງ ເຂົ້າຮ່ວມ.
ກອງປະຊຸມດັ່ງກ່າວ ໄດ້ຮັບຟັງການລາຍງານ ກ່ຽວກັບການກະກຽມຈັດງານວາງສະແດງຜົນສຳເລັດ ການພັດທະນາເສດຖະກິດ-ສັງຄົມ ແລະ ສິນຄ້າ ເພື່ອກຽມສະຫລອງ ຄົບຮອບ 60 ປີ ແຫ່ງການສ້າງຕັ້ງພັກປະຊາຊົນປະຕິວັດລາວ ເຊິ່ງຈະໄດ້ຈັດຂຶ້ນໃນກາງເດືອນມີນາ 2015 ແລະ 40 ປີ ແຫ່ງການສະຖາປະນາ ສປປ ລາວ ເຊິ່ງ ຈະຈັດຂຶ້ນໃນຕົ້ນເດືອນທັນວາ 2015 ແລະ ພ້ອມກັນປຶກສາຫາລື ກ່ຽວກັບວິທີການຈັດຕັ້ງປະຕິບັດວຽກງານຕ່າງໆ ເພື່ອເຮັດໃຫ້ງົບ ປະມານທີ່ຈະມາຮອງຮັບຫລຸດລົງຄື: ພິທີເປີດງານ, ວຽກໂຄສະນາ ແລະ ອື່ນໆ, ພິຈາລະນາຮັບ ຮອງເອົາແຜນການໃຊ້ຈ່າຍ ເພື່ອສະເໜີຂໍນຳລັດຖະບານ ແລະ ຫາລືກ່ຽວກັບ ການປະກອບສ່ວນ ຂອງບັນດາຂະແໜງການ ໃນການນຳສະເໜີຜົນສຳເລັດທາງດ້ານສັງຄົມ ແລະ ສິນຄ້າ.
ແຫລ່ງຂ່າວ: ສຳນັກຂ່າວສານປະເທດລາວ