ຕຳຫລວດແບນຊິກ ປະຕິບັດການຕໍ່ຕ້ານການກໍ່ການຮ້າຍ ບຸກອາພາດເມັ້ນແຫ່ງໜຶ່ງ ໃນເມືອງທາງພາກຕາເວັນອອກ ປະທະຜູ້ຕ້ອງສົງໄສກໍ່ການຮ້າຍ ມີຜູ້ເສຍຊີວິດ 2 ຄົນ.
ສຳນັກຂ່າວຕ່າງປະເທດ ລາຍງານໃນວັນທີ 16 ມັງກອນນີ້ວ່າ ໃນມື້ວັນພະຫັດທີ 15 ມັງກອນຜ່ານມານີ້ ເຈົ້າໜ້າທີ່ຕຳຫລວດແບນຊິກ ປະຕິບັດການຕໍ່ຕ້ານການກໍ່ການຮ້າຍ ບຸກໂຈມຕີອາພາດເມັ້ນແຫ່ງໜຶ່ງ ເຊິ່ງມີຜູ້ຕ້ອງສົງໄສທີ່ກ່ຽວຂ້ອງກັບກຸ່ມມຸດສະລິມຫົວຮຸນແຮງ ໃນເມືອງເວີວິເຢ ທາງພາກຕາເວັນອອກຂອງປະເທດ ແລະ ເກີດການຕໍ່ສູ້ກັນຂຶ້ນ ເຊິ່ງຕາມການລາຍງານຂອງແຫລ່ງຂ່າວພາຍໃນແບນຊິກໄດ້ລະບຸວ່າ ມີຜູ້ຕ້ອງສົງໄສຖືກເຈົ້າໜ໊າທີ່ວິສາມັນ 2 ຄົນ ແລະ ມີຜູ້ໄດ້ຮັບບາດເຈັບ 1 ຄົນ ໂດຍສາມາດຈັບກຸມຜູ້ຕ້ອງສົງໄສໄດ້ອີກຫລາຍຄົນ.
ການບຸກຈັບກຸມຜູ້ກໍ່ການຮ້າຍໃນຄັ້ງນີ້ ເກີດຂຶ້ນຫລັງຈາກໄອຍະການແບນຊິກ ໄດ້ອອກມາເປີດເຜີຍວ່າ ເຈົ້າໜ໊າທີ່ຕຳຫລວດໄດ້ຈັບກຸມຊາຍຄົນໜຶ່ງໃນຖານະຜູ້ຕ້ອງສົງໄສຈັດຫາອາວຸດໃຫ້ ທ້າວ ອາເມດີ ດູລີບາລີ ຜູ້ກໍ່ເຫດຈັບຕົວປະກັນໃນຫ້າງສັບພະສິນຄ້າໃນນະຄອນຫລວງປາຣີ ປະເທດຝຣັ່ງ ໂດຍໄດ້ສັງຫານຕົວປະກັນໄປ 4 ຄົນ ໃນອາທິດທີ່ຜ່ານມາ.
