ພຽງບໍ່ພໍເທົ່າໃດມື້ ຫລັງຈາກການເນລະເທດຍິງອາເມຣິກັນເຊື້ອສາຍເກົາຫລີ ອອກນອກປະເທດເກົາຫລີໃຕ້ ໃນຂໍ້ຫາຍົກຍ້ອງເກົາຫລີເໜືອ ເຊິ່ງຕໍ່ມາທາງການໄດ້ຈັບກຸມເພື່ອນນັກເຄື່ອນໄຫວຂອງນາງ ແລະ ອະດີດນັກການເມືອງຝ່າຍຊ້າຍອີກ ໃນຂໍ້ຫາອັນດຽວກັນ.
ສຳນັກຂ່າວຕ່າງປະເທດ ລາຍງານໃນວັນທີ 14 ມັງກອນນີ້ວ່າ ສາວເກົາຫລີຜູ້ຖືກຈັບກຸມຄັ້ງນີ້ ໄດ້ຖືກຂໍ້ຫາລະເມີດກົດໝາຍຄວາມໝັ້ນຄົງແຫ່ງຊາດຂອງເກົາຫລີໃຕ້ ເຊິ່ງຖືກປະກາດໃຊ້ໃນປີ 1948 ເປັນຕົ້ນມາ ເພື່ອປ້ອງກັນ ແລະ ຕໍ່ຕ້ານແນວຄິດຂອງລັດທິກອມມູນິດ ໂດຍກົດໝາຍສະບັບດັ່ງກ່າວ ໄດ້ຫ້າມເວົ້າ ຫລື ຫ້າມຂຽນຍົກຍ້ອງແນວຄິດຂອງເກົາຫລີເໜືອ ໂດຍຖືວ່າການກະທຳດັ່ງກ່າວ ເປັນການຕໍ່ຕ້ານລັດເກົາຫລີໃຕ້ ເຊິ່ງມີໂທດຈຳຄຸກສູງສຸດເຖິງ 7 ປີ.
ພ້ອມກັນນັ້ນ ທ່ານ ຮວາງ ຊຸນ ອະດີດນັກການເມືອງຝ່າຍຊ້າຍ ແລະ ນັກເຄື່ອນໄຫວສະໜັບສະໜູນການລວມປະເທດ ກໍໄດ້ຖືກຈັບກຸມໃນຂໍ້ຫາຍົກຍ້ອງເກົາຫລີເໜືອ ແລະ ຜູ້ນຳ ກິມ ຈອງ ອຶນ ຈາກການທີ່ເຂົາໄດ້ບັນລະຍາຍຫລາຍຄັ້ງຜ່ານມາ ພ້ອມກັບນາງ ຊິນ ອຶນມີ ໝູ່ຂອງເຂົາ ເຊິ່ງໄດ້ຖືກເນລະເທດອອກນອກປະເທດໄປແລ້ວ ໃນມື້ວັນເສົາທີ 3 ມັງກອນຜ່ານມາ ໂດຍຫ້າມບໍ່ໃຫ້ເຂົ້າມາໃນປະເທດເກົາຫລີໃຕ້ ເປັນເວລາ 5 ປີ.
ນັກວິຈານໃນປະເທດເກົາຫລີໃຕ້ເອງ ໄດ້ກ່າວວິຈານຕໍ່ກົດໝາຍສະບັບນີ້ວ່າ ເປັນການເປີດທາງໃຫ້ແກ່ການຂົ່ມເຫັງ ແລະ ຈຳກັດສິດເສລີພາບໃນການເວົ້າ, ແຕ່ທາງກະຊວງການຕ່າງປະເທດຂອງສະຫະລັດອາເມຣິກາເອງ ໄດ້ສະແດງຄວາມເຫັນພ້ອມກັບການເນລະເທດ ນາງ ຊິນ ອຶນມີ ອອກນອກປະເທດນັ້ນ ແມ່ນເປັນການເຄົາລົບກ່ຽວກັບກົດໝາຍຄວາມໝັ້ນຄົງແຫ່ງຊາດຂອງເກົາຫລີໃຕ້ເອງ ເຊິ່ງຖືກຍຶດຖືມາຍາວນານ ແລະ ເປັນຂອບເຂດທີ່ຕັ້ງຢູ່ເທິງເສລີພາບໃນການສະແດງອອກໃນເກົາຫລີໃຕ້.
ທັງນີ້ ເນື່ອງຈາກເກົາຫລີໃຕ້ ແລະ ເກົາຫລີເໜືອ ແມ່ນຍັງຄົງຢູ່ໃນພາວະສົງຄາມ ເພາະວ່າຄວາມຂັດແຍ່ງລະຫວ່າງສອງເກົາຫລີ ໃນຊ່ວງປີ 1950-1953 ໄດ້ສິ້ນສຸດລົງດ້ວຍການເຮັດຂໍ້ຕົກລົງສັນຕິພາບ ເຊິ່ງເປັນສັນຍາຢຸດຍິງຊົ່ວຄາວເທົ່ານັ້ນ.