ນັກທ່ອງທ່ຽວຫລາຍພັນຄົນໃນເມືອງຊາປາ ແຂວງລາວກາຍ ທາງພາກເໜືອຂອງຫວຽດນາມ ໄດ້ສຳຜັດກັບຫິມະເປັນຄັ້ງທຳອິດໃນປີນີ້ ຫລັງຫິມະຕົກໃນມື້ວັນເສົາ 10 ມັງກອນຜ່ານມາ.
ສຳນັກຂ່າວຕ່າງປະເທດ ລາຍງານໃນວັນທີ 11 ມັງກອນຜ່ານມານີ້ວ່າ ຫິມະໄດ້ເລີ່ມຕົກລົງມາໃນຕອນທ່ຽງຄືນມື້ວັນສຸກທີ 9 ມັງກອນ ໃນຂະນະທີ່ອຸນຫະພູມໃນເມືອງດັ່ງກ່າວຫລຸດລົງຕ່ຳ 0 ອົງສາ ທັງຢູ່ໃນເຂດເມືອງຊາປາ ແລະ ເມືອງບ໊າດສາດ ບໍລິເວນດຽວກັນທີ່ມີຫິມະຕົກໜັກ ໃນເດືອນທັນວາ ປີ 2013.
ຫິມະໄດ້ປົກຄຸມຖະໜົນຫົນທາງ ແລະ ຫລັງຄາເຮືອນຂອງປະຊາຊົນ ຍອດໄມ້ໃບຫຍ້າ ແລະ ບາງແຫ່ງກໍປົກຄຸມທົ່ວບໍລິເວນເປີ້ນພູຂອງແຫລ່ງທ່ອງທ່ຽວຫລາຍແຫ່ງໃນເມືອງຊາປາ ເຮັດໃຫ້ບາງບ່ອນຕ້ອງຢຸດປິດໃຫ້ບໍລິການ ເນື່ອງຈາກຫິມະຕົກໜັກ ແລະ ຍິ່ງໄກອອກຈາກເຂດເມືອງ ເຂົ້າໄປໃນພູສູງເທົ່າໃດ ຫິມະກໍຍິ່ງປົກຄຸມໜາຫລາຍຍິ່ງຂຶ້ນ ຕັ້ງແຕ່ຕອນເຊົ້າຂອງວັນເສົາທີ 10 ມັງກອນຜ່ານມານີ້.
