ຕອນບ່າຍຂອງວັນທີ 10 ມັງກອນ 2015 ທີມຂ່າວພວກເຮົາໄດ້ເດິນທາງໄປ ວັດອົງຕື້ມະຫາວິຫານເພື່ອຂາບໄຫວ້ ພະພຸດທະຮູບອົງຕື້ ແລະອົງທີ່ມີຂ່າວວ່າຖືກອັງເຊີນ ໄປຍັງຕ່າງປະເທດນັ້ນ.
ທີມຂ່າວພວກເຮົາຍັງພົບເຫັນ ພະພຸດທະຮູບອົງດັ່ງກ່າວຖືກປະດິດສະຖານ ເອົາໄວ້ບ່ອນເກົ່າຄືດ້ານຫຼັງ ທາງເບື້ອງຂວາຂອງ ພະພຸດທະຮູບອົງຕື້ ແລະໄດ້ມີປະຊາຊົນພັດປ່ຽນກັນເຂົ້າມາ ຂາບໄຫວ້ຂໍພອນ ໂດຍສະເພາະແມ່ນມາເບິ່ງດ້ວຍຕາຂອງຕົນເອງ ໃຫ້ໝັ້ນໃຈວ່າພະພຸດທະຮູບອົງດັ່ງກ່າວ ຍັງຢູ່ຫຼືບໍ່ແລະແມ່ນອົງເກົ່າຫຼືບໍ່?
ຈາກການສອບຖາມພະສົງ ແລະສາມະເນນພາຍໃນວັດ ຕ່າງກໍບອກແບບບໍ່ຈະແຈ້ງປານໃດກ່ຽວກັບເລື່ອງນີ້ ດັ່ງບົດສົນທະນາກັບສາມະເນນຕົນໜຶ່ງ ດັ່ງຕໍ່ໄປນີ້:
ກ. ໄດ້ຍິນວ່າມີຂະບວນອັງເຊີນພະພຸດທະຮູບ ຢູ່ວັດນີ້ໄປປະດິດສະຖານຍັງຕ່າງປະເທດບໍ?
ຂ. ອ້າຍຈົວກະບໍ່ຮູ້ເລື່ອງປານໃດ ເພາະອ້າຍຈົວໄປຮຽນຢູ່
ກ. ໄດ້ຍິນວ່າອັງເຊີນພະພຸດທະຮູບ ໄປບໍ?
ຂ. ກະໄດ້ຍິນຢູ່ ແຕ່ບໍ່ແນ່ໃຈວ່າລາຍລະອຽດເປັນຈັ່ງໃດ
ກ. ຍິນວ່າຂະບວນອັງເຊີນໄປແລ້ວ ເກີດອະພິນິຫານຂຶ້ນແລ້ວ ເຂົາເຈົ້າອັງເຊີນກັບຄືນມາ ແມ່ນບໍ?
ຂ. ກະໄດ້ຍິນປະມານນັ້ນລະ
ກ. ບໍ່ຮູ້ວ່າ ອະພິນິຫານທີ່ເກີດຂຶ້ນນັ້ນ ແມ່ນເກີດຫຍັງຂຶ້ນແທ້ ພໍຮູ້ບໍ?
ຂ. ອັນນີ້ອ້າຍຈົວກະບໍ່ຮູ້ຄືກັນ
ກ. ພະພຸດທະຮູບອົງດັ່ງກ່າວນັ້ນ ຖືກອັງເຊີນຄືນມາ ແລ້ວແນ່ໃຈບໍວ່າ ແມ່ນອົງເກົ່າ?
ຂ. ກະຊິແມ່ນອົງເກົ່າຫັ້ນລະ! ອົງເກົ່າຫັ້ນລະ!
ນອກຈາກນັ້ນ ທີມງານຍັງໄດ້ສອບຖາມພະອາຈານອົງໜຶ່ງ ພາຍໃນສິມຕໍ່ໜ້າພະພຸດທະຮູບ ອົງເປັນຂ່າວນຳອີກ:
ກ. ມີແທ້ບໍວ່າເຂົາມາຂໍເອົາພະພຸດທະຮູບອົງນີ້ໄປ?
ຂ. ອາຕະມາກະບໍ່ຮູ້ນະ ຕອນເອົາໄປຄູບາກະບໍ່ເຫັນ, ເຫັນແຕ່ວ່າເຂົາເຈົ້າເອົາມາສົ່ງແລ້ວ ນີ້ລະ!
ກ. ທຳອິດນີ້ເພິ່ນອັງເຊີນ(ຂໍ)ໄປແລ້ວແມ່ນບໍ?
ຂ. ແມ່ນລະ!
ກ. ເພິ່ນຈະອັງເຊີນໄປປະເທດໃດເກາະ?
ຂ. ຫວຽດນາມຕິເບາະ
