ມຸກດາວັນ ສັນຕິພອນ ເຈົ້າຂອງຜົນງານເພງ ສຽງແຄນແທນໃຈ ແລະເອີ້ນອ້າຍໃສ່ໝໍ້ໜຶ້ງ ຈາກຄ້າຍເພງກ້ວຍສຸກຂຽວ ສະຫວັນນະເຂດ ພວມເປັນທີ່ນິຍົມຊົມຊອບ ຂອງປະຊາຊົນຄົນລາວ ທັງພາຍໃນແລະຕ່າງປະເທດ ຈົນເຮັດໃຫ້ຄິວງານຕິດຕໍ່ກັນຍາວຢຽດ ເກືອບບໍ່ໄດ້ນອນພັກຢູ່ເຮືອນເລີຍ ເພາະແຕ່ລະມື້ເອົາແຕ່ຂີ່ລົດ ຂຶ້ນເໜືອລົງໃຕ້.
ຖ້າຜູ້ອ່ານໄດ້ຕິດຕາມແຟນເພຈ ມຸກດາວັນ ສັນຕິພອນ (www.facebook.com/moukdavanyh) ຈະໄດ້ຮູ້ວ່າ ມຸກດາວັນ ຈະປາກົດໂຕໃນແຕ່ລະມື້ ໃນສະຖານທີ່ທີ່ຫ່າງໄກ ແລະແຕກຕ່າງກັນ ບາງມື້ເຫັນຢູ່ວຽງ, ບາງມື້ຢູ່ຫຼວງພະບາງ, ບາງມື້ຢູ່ປາກເຊ, ບາງມື້ຢູ່ບຶງການ… ນັ້ນແມ່ນການເດິນທາງໄປສະແດງ ຕາມຄຳເຊີນຂອງເຈົ້າພາບງານ ເຊິ່ງມຸກດາວັນຈະຮັບທຸກລະດັບງານ ຕັ້ງແຕ່ສູ່ຂວັນຂຶ້ນເຮືອນໃໝ່ ຈົນເຖິງລະດັບຊາດ ດ້ວຍຄ່າໂຕທີ່ເຈົ້າພາບທຸກລະດັບ ສາມາດຈ່າຍໄດ້ ຫຼືຖ້າເປັນງານເພື່ອສັງຄົມກໍຈະບໍ່ເອົາຄ່າໂຕເລີຍ.
ຄົງຈະເປັນຍ້ອນ ມຸກດາວັນ ເປັນຄົນ ບໍ່ໄດ້ຖືເນື້ອຖືໂຕ ສຸພາບອ່ອນໂຍນ ຮູ້ຈັກນົບຈັກໄຫວ້ ຮູ້ຈັກຂອບໃຈຜູ້ຊ່ວຍເຫຼືອອຸ້ມຊູ ປະກອບກັບຮູບແບບການສະແດງອອກ ເປັນເອກະລັກ ເໝາະສົມກັບການເປັນນັກຮ້ອງບ້ານນາ ຜູ້ໃຫຍ່ຈຶ່ງອິດູຕົນ ສັງຄົມຈຶ່ງໃຫ້ການຕ້ອນຮັບ ຈຶ່ງມີໂອກາດໄດ້ຮັບໃຊ້ສັງຄົມ ຫຼາຍຂະໜາດນີ້.
