ຍີ່ປຸ່ນປະມູນປາທູນ່າຄີນ້ຳເງິນ ນ້ຳໜັກ 180 ກິໂລ ໃນລາຄາ 4.5 ລ້ານເຢນ ຫລື ປະມານ 299 ລ້ານກີບ ຫລັງເປີດຕະ
ຫລາດປາຄັ້ງທຳອິດຂອງປີ ເຜີຍລາຄາຕ່ຳລົງອີກເປັນປີທີສອງ.
ສຳນັກຂ່າວຕ່າງປະເທດ ລາຍງານໃນວັນທີ 5 ມັງກອນຜ່ານມານີ້ວ່າ ທີ່ນະຄອນຫລວງໂຕກຽວ ປະເທດຍີ່ປຸ່ນ ປາທູນ່າ
ຄີນ້ຳເງິນຂະໜາດໃຫຍ່ ນ້ຳໜັກ 180 ກິໂລກຣາມ ໄດ້ຖືກປະມູນໄປແລ້ວ ດ້ວຍລາຄາ 4,500,000 ເຢນ ຫລື ປະມານ
299 ລ້ານກີບ ໂດຍແມ່ນ ທ່ານ ຄິໂຍຊິ ຄິມູຣະ ເຈົ້າຂອງຮ້ານຊູຊິ ເປັນຜູ້ຊະນະການປະມູນ ເຊິ່ງລາວໄດ້ຊະນະປະມູນປາ
ທູນ່າເປັນປີທີ 4 ຕິດຕໍ່ກັນແລ້ວ, ແນວໃດກໍຕາມ ລາຄາປະມູນໃນປີນີ້ ຖືວ່າຫລຸດລົງຕໍ່ເນື່ອງເປັນປີທີສອງແລ້ວ.
ລາຍງານໄດ້ເປີດເຜີຍວ່າ ໃນຕອນເຊົ້າຂອງວັນທີ 5 ມັງກອນຜ່ານມາ ຢູ່ຕະຫລາດປາສຶຄິຈິ ໄດ້ກັບມາເປີດການປະມູນ
ປາເປັນຄັ້ງທຳອິດຂອງປີ ຫລັງຈາກທີ່ພັກໃນໄລຍະປີໃໝ່ ເຊິ່ງໃນທຸກໆມື້ຈະມີປານັບຮ້ອຍໂຕມາວາງປະມູນ ທ່າມກາງ
ກະແສປຸກລະດົມໃຫ້ຫລຸດຜ່ອນການບໍລິໂພກປາທູນ່າຄີນ້ຳເງິນລົງ ເນື່ອງຈາກຄວາມນິຍົມຢ່າງໜັກຂອງຊາວຍີ່ປຸ່ນ
ທີ່ນຳມາເຮັດຊູຊິ ແລະ ຊາຊິມິ ໄດ້ເຮັດໃຫ້ສະຫະພາບເພື່ອການອະນຸຮັກທຳມະຊາດ ຈັດໃຫ້ປາສາຍພັນນີ້ ຖືກຈັດຢູ່ໃນ
ກຸ່ມສ່ຽງຕໍ່ການສູນພັນ.
