ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VII ໄດ້ດຳເນີນມາເປັນເວລາ 14 ວັນ ມາຮອດວັນທີ 26
ທັນວາ 2014 ໄດ້ອັດລົງຢ່າງຈົບງາມ ເປັນປະທານຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ໂດຍໃຫ້ກຽດເຂົ້າ
ຮ່ວມຂອງທ່ານ ຈູມມາລີ ໄຊຍະສອນ ປະທານປະເທດ ພ້ອມດ້ວຍການນຳພັກ-ລັດ ແຂກຖືກເຊີນ ແລະ ສະມາຊິກສະພາ
ແຫ່ງຊາດ.
ທ່ານນາງ ປານີ ຢາທໍ່ຕູ້ ໄດ້ກ່າວສູນທອນພົດອັດກອງປະຊຸມ ໂດຍບາງຕອນສຳຄັນທ່ານໄດ້ກ່າວວ່າ: ກອງປະຊຸມສະໄໝ
ສາມັນເທື່ອທີ 8 ຂອງສະພາແຫ່ງຊາດ ຊຸດທີ VII ໄດ້ພິຈາລະນາ ແລະ ປະກອບຄຳເຫັນຕໍ່ບົດລາຍງານຂອງລັດຖະບານ
ກ່ຽວກັບການຈັດຕັ້ງປະຕິບັດນະໂຍບາຍ ສົ່ງເສີມການຜະລິດເປັນສິນຄ້າ ເພື່ອບັນລຸເປົ້າໝາຍສະຫັດສະວັດ ແນໃສ່ຫຼຸດ
ຜ່ອນຄວາມທຸກຍາກຂອງປະຊາຊົນ ແລະ ສະພາບການຈັດຕັ້ງປະຕິບັດວຽກງານແຮງງານ ເຊິ່ງໄດ້ສະແດງຄວາມຍ້ອງຍໍ
ຊົມເຊີຍລັດຖະບານ ທີ່ໄດ້ມີຄວາມພະຍາຍາມວາງແຜນຍຸດທະສາດ ແຜນນະໂຍບາຍ ແລະ ປະກາດໃຊ້ນິຕິກຳຫຼາຍສະ
ບັບ ຍ້ອງຍໍຊົມເຊີຍບັນດາຫົວໜ່ວຍທຸລະກິດ ກຸ່ມການຜະລິດ ແລະ ປະຊາຊົນບັນດາເຜົ່າທົ່ວປະເທດ ທີ່ໄດ້ມີຄວາມບຸກ
ບືນ ແລະ ເຂົ້າຮ່ວມຢ່າງຕັ້ງໜ້າ ໃນການຈັດຕັ້ງປະຕິບັດນະໂຍບາຍຜະລິດເປັນສິນຄ້າ ຢ່າງເປັນຂະບວນຟົດຟື້ນ ອັນພົ້ນ
ເດັ່ນແມ່ນສາມາດຮັບປະກັນ ການຜະລິດສະບຽງອາຫານ ເພື່ອສະໜອງຄວາມຕ້ອງການບໍລິໂພກຢູ່ພາຍໃນ ມີສ່ວນ
ແຮໄວ້ ແລະ ສົ່ງອອກ ພ້ອມນີ້ກໍ່ໄດ້ສະເໜີໃຫ້ລັດຖະບານ ຈົ່ງສືບຕໍ່ຊີ້ນຳ ແລະ ຊຸກຍູ້ບັນດາຂະແໜງການກ່ຽວຂ້ອງ ຈັດ
ຕັ້ງຜັນຂະຫຍາຍນະໂຍບາຍສົ່ງເສີມການຜະລິດເປັນສິນຄ້າ ທີ່ໄດ້ສະເໜີຕໍ່ກອງປະຊຸມຄັ້ງນີ້ ໃຫ້ເປັນລະບົບຄົບຊຸດກວ່າ
ເກົ່າ.
ກອງປະຊຸມຍັງໄດ້ພິຈາລະນາ ແລະ ຮັບຮອງເອົາບົດລາຍງານ ຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິ
ບັດແຜນງົບປະມານແຫ່ງລັດ ປະຈຳສົກປີ 2012-2013 ຮັບຟັງການລາຍງານເພີ່ມເຕີມ ກ່ຽວກັບການປະຕິບັດນະໂຍ
ບາຍການຜະລິດເປັນສິນຄ້າ ຮັບຮອງເອົາມະຕິວ່າດ້ວຍການເຄື່ອນໄຫວວຽກງານປະຈຳ 6 ເດືອນທ້າຍປີ 2014 ແລະ
ແຜນການເຄື່ອນໄຫວປະຈຳ 6 ເດືອນຕົ້ນປີ 2015 ຂອງຄະນະປະຈຳສະພາແຫ່ງຊາດ ພິຈາລະນາປະກອບຄຳເຫັນຕໍ່ຮ່າງ
ລັດຖະທຳມະນູນສະບັບປັບປຸງ ແລະ ພິຈາລະນາຮັບຮອງເອົາກົດໝາຍ 7 ສະບັບ ການຮັບຮອງເອົາກົດໝາຍດັ່ງກ່າວ
ແມ່ນການສືບຕໍ່ຫັນເອົາແນວທາງນະໂຍບາຍຂອງພັກ ແລະ ລັດຖະທຳມະນູນ ມາເປັນນິຕິກຳລະອຽດ ໃນແຕ່ລະຂົງ
ເຂດ ເປັນການປະກອບສ່ວນສ້າງຄວາມເຂັ້ມແຂງ ໃຫ້ແກ່ອົງການອຳນາດລັດມີເຄື່ອງມືໃນການຄຸ້ມຄອງລັດ ຄຸ້ມຄອງ
ເສດຖະກິດ-ສັງຄົມ ໃຫ້ເປັນລະບົບຄົບຊຸດ ແລະ ສອດຄ່ອງກັບເງື່ອນໄຂການເຊື່ອມໂຍງເສດຖະກິດກັບພາກພື້ນ ແລະ
ສາກົນໃນໄລຍະໃໝ່.
ແຫລ່ງຂ່າວ: ວຽງຈັນໃໝ່