ໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ X, ທ່ານ ເຫຼັກໄຫຼ ສີວິໄລ ລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ຂຶ້ນຊີ້ແຈ້ງຕໍ່ຄຳຊັກຖາມຂອງສະມາຊິກສະພາແຫ່ງຊາດ ກ່ຽວກັບບັນຫາ ທີ່ຕິດພັນກັບການຈັດຕັ້ງປະຕິບັດວຽກງານຂອງຂະແໜງໂຍທາທິການ ແລະ ຂົນສົ່ງ ໃນໄລຍະຜ່ານມາ.
ກ່ຽວກັບການກໍານົດລາຄາຫົວໜ່ວຍກໍ່ສ້າງໂຄງລ່າງພື້ນຖານ, ທ່ານລັດຖະມົນຕີໄດ້ຊີ້ແຈ້ງວ່າ: ສູດຄິດໄລ່ລາຄາຫົວໜ່ວຍຂົວທາງໃນປັດຈຸບັນຕ້ອງການຂໍ້ມູນວັດສະດຸ 162 ລາຍການ ແຕ່ໄດ້ຮັບຂໍ້ມູນຈາກຂະແໜງການອຸດສາຫະກໍາ ແລະ ການຄ້າ ພຽງ 4-5 ລາຍການ, ບວກກັບຜົນກະທົບຈາກລາຄານ້ຳມັນ, ອັດຕາແລກປ່ຽນ ແລະ ການຊຳລະສະສາງທີ່ຊັກຊ້າ ເຮັດໃຫ້ຜູ້ຮັບເໝົາບວກຄວາມສ່ຽງໃສ່ ມູນຄ່າໂຄງການຈຶ່ງມີລາຄາສູງ, ທິດທາງປັບປຸງໃນຕໍ່ໜ້າ ຈະເລັ່ງສົມທົບກັບຂະແໜງການກ່ຽວກັບເພື່ອກຳນົດຂໍ້ມູນວັດສະດຸໃຫ້ຄົບຖ້ວນ, ຈັດລະດັບເກຣດບໍລິສັດຮັບເໝົາ ແລະ ດຶງເອົາລັດວິສາຫະກິດມາເປັນຕົ້ນແບບໃນການຈັດຕັ້ງປະຕິບັດ. 
ສໍາລັບການແບ່ງຂັ້ນຄຸ້ມຄອງການສ້ອມແປງ ແລະ ກໍ່ສ້າງເສັ້ນທາງຕາມນະໂຍບາຍໃໝ່, ແມ່ນໄດ້ມອບໃຫ້ອົງການປົກຄອງທ້ອງຖິ່ນເປັນເຈົ້າການຈັດຕັ້ງປະຕິບັດ, ໂດຍມີການລະດົມພາກເອກະຊົນເຂົ້າຮ່ວມ ເຊິ່ງໄດ້ກຳນົດເອົາທາງເລກ 9 ເປັນໂຄງການຕົ້ນແບບໃນການຍົກລະດັບໃຫ້ຮັບນ້ຳໜັກໄດ້ 11 ໂຕນຕໍ່ເພົ້າ ແລະ ກຽມເລີ່ມເກັບຄ່າຜ່ານທາງເຂົ້າບັນຊີສະເພາະເພື່ອຊຳລະຄ່າສ້ອມແປງໃນຕົ້ນເດືອນ 10/2026. ພ້ອມດຽວກັນ, ໃນປີ 2026 ໄດ້ຮັບຈັດສັນງົບປະມານກອງທຶນທາງ 2,000 ຕື້ກີບ ເພື່ອສະເລ່ຍສ້ອມແປງ ແລະ ປັບປຸງເສັ້ນທາງເບຕົງ ຫຼື ອັດສະຟານ 5-10 ກິໂລແມັດ ໃນແຕ່ລະແຂວງ.
ດ້ານການຄວບຄຸມນໍ້າໜັກລົດບັນທຸກ, ນັບແຕ່ເດືອນສິງຫາ 2023 ຫາ ເດືອນກັນຍາ 2026 ໄດ້ກວດກາລົດທັງໝົດ 1.48 ລ້ານກວ່າຄັນ, ພົບເຫັນການລະເມີດ 110,193 ຄັນ, ໄດ້ຄ່ຽນຖ່າຍນ້ຳໜັກສ່ວນເກີນລົງ 66 ພັນໂຕນ ແລະ ປັບໄໝໄດ້ 14.31 ຕື້ກີບ. ທັງນີ້ ໄດ້ຢືນຢັນວ່າ ການປັບໄໝແມ່ນຕ້ອງໄດ້ຄ່ຽນຖ່າຍນໍ້າໜັກລົງກ່ອນຈຶ່ງອະນຸຍາດໃຫ້ເດີນທາງຕໍ່ໄດ້. ສຳລັບມາດຕະການໃນຕໍ່ໜ້າ ຈະເພີ່ມອັດຕາປັບໄໝໃຫ້ສູງຂຶ້ນ, ນຳໃຊ້ລະບົບດິຈິຕອນມາຄຸ້ມຄອງ ແລະ ຄົ້ນຄວ້າວ່າຈ້າງບໍລິສັດເອກະຊົນທີ່ມີປະສົບການມາຮັບຜິດຊອບຄຸ້ມຄອງສະຖານີຕິດຊັ່ງ.
ພາຍຫຼັງການຊີ້ແຈ້ງສິ້ນສຸດລົງ, ບັນດາສະມາຊິກສະພາແຫ່ງຊາດກໍໄດ້ຜັດປ່ຽນກັນເຈາະຈີ້ມ ແລະ ຍົກຄຳຖາມຕື່ມ ເປັນຕົ້ນແມ່ນກຳນົດເວລາທີ່ແນ່ນອນໃນການປັບປຸງແຜນຜັງເມືອງ, ມາດຕະການຄຸ້ມຄອງລົດບັນທຸກຫຼົບຫຼີກທາງຮ່ອມ, ລວມທັງການຕິດຕາມຄຸນະພາບການສ້ອມແປງທາງເລກ 9 ເຊິ່ງທ່ານລັດຖະມົນຕີກໍໄດ້ຮັບເອົາທຸກຄຳຄິດເຫັນ ເພື່ອສະໜອງຂໍ້ມູນຊີ້ແຈ້ງເພີ່ມເຕີມໃຫ້ສັງຄົມມີຄວາມເຊື່ອໝັ້ນ.
ທີ່ມາ: ວິທະຍຸກະຈາຍສຽງກອງທັບປະຊາຊົນລາວ