ໃນການຢ້ຽມຢາມ ສປປ ລາວ ຢ່າງເປັນທາງການ, ທ່ານ ເລ ມິງ ຮຶງ ນາຍົກລັດຖະມົນຕີ ແຫ່ງ ສສ ຫວຽດນາມ ແລະ ທ່ານ ສະເຫຼີມໄຊ ກົມມະສິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຮ່ວມກັນເຂົ້າຮ່ວມ ພິທີລົງນາມໃນສັນຍາ ແລະ ເປີດສາກໂຄງການກໍ່ສ້າງ ມະຫາວິທະຍາໄລມິດຕະພາບ ລາວ – ຫວຽດນາມ ຢ່າງເປັນທາງການ ທີ່ນະຄອນຫຼວງວຽງຈັນ.
ໂຄງການດັ່ງກ່າວ ຖືເປັນ ໂຄງການສັນຍາລັກແຫ່ງຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ – ຫວຽດນາມ, ເຊິ່ງໄດ້ຮັບການຈັດຕັ້ງປະຕິບັດໂດຍ ກະຊວງສຶກສາ ແລະ ກິລາ ຂອງລາວ ແລະ ກະຊວງສຶກສາ ແລະ ຝຶກອົບຮົມ ຂອງຫວຽດນາມ.
🏫 ສະຖານທີ່ຕັ້ງມະຫາວິທະຍາໄລແຫ່ງນີ້ ຈະຖືກສ້າງຂຶ້ນໃນເນື້ອທີ່ 50 ເຮັກຕາ ທີ່ບ້ານດ່ານຊ້າງ, ເມືອງໄຊທານີ, ນະຄອນຫຼວງວຽງຈັນ, ເຊິ່ງຕັ້ງຢູ່ຕິດກັບ ສວນສາທາລະນະມິດຕະພາບ ລາວ – ຫວຽດນາມ.
📚ແຜນການຮຽນ-ການສອນ ໃນໄລຍະເລີ່ມຕົ້ນ, ໂຮງຮຽນຈະຮອງຮັບນັກສຶກສາ ແລະ ນັກຮຽນໄດ້ປະມານ 4,000 ຄົນ (ແບ່ງເປັນນັກຮຽນຊັ້ນມັດທະຍົມຕອນປາຍ 500 ຄົນ ແລະ ນັກສຶກສາລະດັບປະລິນຍາຕີ-ຫຼັງປະລິນຍາຕີ 3,500 ຄົນ).
✏️ຈຸດປະສົງຫຼັກ ເພື່ອຕອບສະໜອງຄວາມຕ້ອງການໃນການພັດທະນາຊັບພະຍາກອນມະນຸດແບບຍືນຍົງຂອງລາວ, ໂດຍເນັ້ນໃສ່ການບຳລຸງສ້າງໃນສາຂາວິຊາ ທີ່ລາວມີຄວາມຕ້ອງການ ແລະ ຫວຽດນາມມີທ່າແຮງ. ທັງເປັນການເປີດຊ່ອງທາງໃໝ່ໃນການຮ່ວມມືດ້ານການສຶກສາຂັ້ນສູງ ໂດຍການເພີ່ມຂີດຄວາມສາມາດໃນການບຳລຸງສ້າງຢູ່ກັບທີ່.
ໃນພິທີ, ຝ່າຍຫວຽດນາມ ໄດ້ຢືນຢັນຄວາມໝາຍໝັ້ນທີ່ຈະປະສານງານຢ່າງໃກ້ຊິດ ກັບຝ່າຍລາວ ເພື່ອເລັ່ງຈັດຕັ້ງປະຕິບັດໂຄງການໃຫ້ສໍາເລັດຕາມກໍານົດເວລາ ແລະ ຮັບປະກັນຄຸນນະພາບສູງສຸດ.
ມະຫາວິທະຍາໄລມິດຕະພາບ ລາວ – ຫວຽດນາມ ຈະບໍ່ແມ່ນພຽງແຕ່ສະຖາບັນການສຶກສາເທົ່ານັ້ນ, ແຕ່ຈະກາຍເປັນສັນຍາລັກແຫ່ງສະຕິປັນຍາ, ວັດທະນະທຳ ແລະ ສາຍສຳພັນອັນແໜ້ນແຟ້ນຂອງຄົນຮຸ່ນຫຼັງຂອງທັງສອງປະເທດ.
ຂໍ້ມູນຈາກ: Tuổi Trẻ ແລະ Vietnam.vn
ຮຽບຮຽງໂດຍ: ລາວໂພສ