(ສພຊ) – ຕອນບ່າຍວັນທີ 01 ຕຸລານີ້, ທ່ານ ບຸນຈັນ ສີວົງພັນ ຫົວໜ້າຫ້ອງວ່າການສະພາແຫ່ງຊາດ, ຫົວໜ້າກອງເລຂາກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ X, ຕາງໜ້າຄະນະປະຈໍາສະພາແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນກ່ຽວກັບການດຳເນີນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ X, ທ່ານໃຫ້ຮູ້ວ່າ: ກອງປະຊຸມຄັ້ງນີ້ ຈະໄຂຂຶ້ນຢ່າງເປັນທາງການໃນວັນທີ 05 ຕຸລາ ແລະ ຈະດຳເນີນໄປຈົນຮອດວັນທີ 21 ຕຸລາ 2026 ທີ່ຫ້ອງປະຊຸມໃຫຍ່ສະພາແຫ່ງຊາດ ເຊິ່ງຈະໃຊ້ເວລາທັງໝົດ 13 ວັນ ເພື່ອພິຈາລະນາ, ຕົກລົງບັນຫາສໍາຄັນຂອງຊາດ ດັ່ງນີ້:
1. ພິຈາລະນາ, ຮັບຮອງເອົາການເລືອກຕັ້ງບຸກຄະລາກອນຈໍານວນໜຶ່ງ.
2. ພິຈາລະນາ, ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ ປະຈໍາປີ 2026 ແລະ ທິດທາງແຜນການປະຈໍາປີ 2027.
3. ພິຈາລະນາ, ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2026 ແລະ ທິດທາງແຜນການເຄື່ອນໄຫວວຽກງານປະຈໍາປີ 2027 ຂອງອົງການກວດສອບແຫ່ງລັດ ແລະ ອົງການກວດກາແຫ່ງລັດ, ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2025 ຂອງອົງການກວດສອບແຫ່ງລັດ.
4. ພິຈາລະນາ, ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2026 ແລະ ທິດທາງແຜນການເຄື່ອນໄຫວວຽກງານປະຈໍາປີ 2027 ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ.
5. ພິຈາລະນາ, ຮັບຮອງເອົາບົດລາຍງານຂອງສະພາແຫ່ງຊາດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2026 ແລະ ທິດທາງແຜນການເຄື່ອນໄຫວວຽກງານປະຈໍາປີ 2027.
6. ພິຈາລະນາ, ຮັບຮອງເອົາຮ່າງກົດໝາຍຈໍານວນ 8 ສະບັບ ໃນນີ້, ກົດໝາຍສ້າງໃໝ່ 1 ສະບັບຄື: ຮ່າງກົດໝາຍວ່າດ້ວຍການປົກປ້ອງເງິນຝາກ; ກົດໝາຍປັບປຸງ 7 ສະບັບຄື: (1) ກົດໝາຍວ່າດ້ວຍລັດຖະບານ, (2) ກົດໝາຍວ່າດ້ວຍນາຍທະຫານກອງທັບປະຊາຊົນລາວ, (3) ກົດໝາຍວ່າດ້ວຍກຳລັງປ້ອງກັນຄວາມສະຫງົບປະຊາຊົນ, (4) ກົດໝາຍວ່າດ້ວຍການບິນພົນລະເຮືອນ, (5) ກົດໝາຍວ່າດ້ວຍການຈະລາຈອນທາງບົກ, (6) ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກໍາທາງໄຊເບີ ແລະ (7) ກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າ.
ພ້ອມດຽວກັນນີ້, ທ່ານ ບຸນຈັນ ສີວົງພັນ ຍັງກ່າວຕື່ມອີກວ່າ: ເພື່ອເປີດໂອກາດໃຫ້ສັງຄົມໄດ້ມີສ່ວນຮ່ວມໃນໄລຍະດຳເນີນກອງປະຊຸມ, ຫ້ອງວ່າການສະພາແຫ່ງຊາດ ໄດ້ຈັດຕັ້ງໜ່ວຍງານຮັບຄຳສະເໜີຂອງປະຊາຊົນຜ່ານໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະ ຄໍາສະເໜີໂດຍກົງຈາກປະຊາຊົນ ທີ່ມີຄວາມສົນໃຈສົ່ງຄຳຄິດຄຳເຫັນ ແລະ ຂໍ້ສະເໜີຂອງຕົນ ໄປຍັງກອງປະຊຸມສະພາແຫ່ງຊາດຄັ້ງນີ້ ໂດຍຜ່ານ 3 ຊ່ອງທາງຄື: ໂທລະສັບສາຍດ່ວນ: 156 ແຕ່ວັນນີ້ ຈົນເຖິງວັນທີ 21 ຕຸລາ 2026 ໃນໂມງລັດຖະການ ແລະ ຜ່ານທາງອີເມວ: nalao.156@gmail.com; ແອັບ: Laona
ຂໍ້ມູນຈາກ: ຂ່າວ “ຜູ້ແທນປະຊາຊົນ”