ວັນທີ 30 ກັນຍາ 2026,ທີ່ຫ້ອງວ່າການ ແຂວງຈໍາປາສັກໄດ້ຈັດກອງປະຊຸມວິຊາການ ກຳນົດຫົວຂໍ້ສຳຄັນດ້ານການຈັດຕັ້ງປະຕິບັດແຜນພັດທະນາຊົນນະບົດ ແລະ ແກ້ໄຂຄວາມທຸກຍາກ.ໂດຍເປັນປະທານຂອງ ທ່ານ ພິມພອນ ພັນດານຸວົງ ຄະນະປະຈຳພັກແຂວງ,ຮອງປະທານຄະນະກຳມະການປົກຄອງແຂວງ,ມີປະທານຄະນະກຳມະການປົກຄອງນະຄອນປາກເຊ,ປະທານ,ຮອງປະທານຄະນະກຳມະການປົກຄອງເມືອງ,ຫົວໜ້າ ແລະ ຮອງພະແນການອ້ອມຂ້າງແຂວງ,ຂະແໜງກໍ່ສ້າງຮາກຖານການເມືອງ,ຫ້ອງວ່າການແຂວງ,ຂະແໜງພັດທະນາຊົນນະບົດ ແລະແກ້ໄຂຄວາມທຸກຍາກ,ພະແນກກະສິກຳ ແລະ ສິ່ງແວດລ້ອມ ແຂວງເຂົ້າຮ່ວມ.
ທ່ານ ພິມພອນ ພັນດານຸວົງ ຄະນະປະຈຳພັກແຂວງ,ຮອງປະທານຄະນະກຳມະການປົກຄອງແຂວງ ກ່າວວ່າ:
ກອງປະຊຸມວິຊາການ ກຳນົດຫົວຂໍ້ສຳຄັນດ້ານການຈັດຕັ້ງປະຕິບັດແຜນພັດທະນາ ຊົນນະບົດ ແລະ ແກ້ໄຂຄວາມທຸກຍາກ ໃນຄັ້ງນີ້,ມີຄວາມສຳຄັນຫຼາຍ ຊຶ່ງຜູ້ເຂົ້າຮ່ວມໄດ້ຮັບຟັງການເຜີຍແຜ່ ແລະ ຮ່ວມກັນຈັດຕັ້ງປະຕິບັດວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ທີ່ລັດຖະບານໄດ້ວາງອອກ.ເປັນການຄົ້ນຄ້ວາ,ປະກອບຄໍາເຫັນ ແລະ ຢັ້ງຢືນນ,ຮັບຮອງເອົາຕົວເລກຈຳນວນຄອບຄົວທຸກຍາກ ແລະ ກຳນົດແຜນລະອຽດໃນການຈັດຕັ້ງປະຕິບັດໃຫ້ບັນລຸດຕາມຈຸດປະສົງເປົ້າໝາຍທີ່ວາງໄວ້.
ໃນກອງປະຊຸມ ທ່ານ ປອ.ບຸນຍົງ ສູນທອນ ຮອງຫົວໜ້າຫ້ອງວ່າການແຂວງ (ຜູ້ຮັບຜິດຊອບວຽກງານກໍ່ສ້າງຮາກຖານການເມືອງ )ໄດ້ເຜີຍແຜ່ ຄໍາແນະນໍາ ວ່າດ້ວຍການຈັດຕັ້ງປະຕິບັດ ແຜນ ປະຕິບັດງານແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ໄລຍະ 2027-2030.
ທ່ານ ປອ ໄຊຍະສິດ ວິລະພັດ ຮອງຫົວໜ້າພະແນກກະສິກຳ ແລະ ສິ່ງແວດລ້ອມແຂວງ ໄດ້ຜ່ານ ແຜນການການກໍານົດເປົ້າໝາຍ ຄອບຄົວ, ບ້ານ, ເມືອງເປົ້າໝາຍ ການປະຕິບັດວາລະແຫ່ງຊາດ ແລະ ການສ້າງແຜນການ, ໂຄງການ/ກິດຈະກຳ ແລະ ການປະເມີນຜົນໂຄງການ ກ່ອນການສ້າງແຜນ;ທ່ານ ສະໜັ່ນສີດາວົງ ຫົວໜ້າພະແນກການເງິນແຂວງ ໄດ້ຜ່ານແຜນການຂຶ້ນແຜນງົບປະມານຮັບໃຊ້ພັດທະນາຊົນນະບົດ ແລະ ແກ້ໄຂຄວາມທຸກຍາກ.
ຈາກນີ້ຜູ້ເຂົ້າຮ່ວມໄດ້ປະດກອບຄໍາຄິດຄໍາເຫັນໃສ່ບັນດາໂຄງການ/ກິດຈະກຳ ທີ່ກຳນົດເຂົ້າໃນແຜນພັດທະນາຊົນນະບົດ ແກ້ໄຂຄວາມທຸກຍາກ ໃຫ້ມີຄວາມລະອຽດເພື່ອເອກະພາບຈັດຕັ້ງປະຕິບັດໃນແຕ່ລະໜ້າວຽກ . ທັງນີ້,ເພື່ອແນໃສ່ເຮັດໃຫ້ທິດທາງແຜນການດັ່ງກ່າວ ມີຄວາມເປັນເອກະພາບກັນທາງດ້ານຈໍານວນ,ງົບປະມານ ແລະ ວິທີຈັດຕັ່ງປະຕິບັດ ປົ້າໝາຍເພື່ອ ຫຼຸດຜ່ອນ,ແກ້ໄຂຄວາມທຸກຍາກຂອງປະຊາຊົນທີ່ມີຢູ່ແຂວງຈຳປາສັກໃຫ້ໄດ້ຢ່າງມີປະສິດທິພາບ ເຮັດໃຫ້ຄອບຄົວທຸກຍາກຫຼຸດໜ້ອຍຖອຍລົງເທື່ອລະກ້າວ ແລະ ໝົດໄປໃນອະນາຄົດ.
ຂໍ້ມູນຈາກ: ໜັງສືພິມຈຳປາໃໝ່