ໃນວັນທີ 17 ກັນຍາ 2026 ທີ່ອຳເພີຊຽງຄານ ຈັງຫວັດເລີຍ ຣາຊະອານາຈັກໄທ, ໄດ້ຈັດກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ, ແຂວງວຽງຈັນ-ຈັງຫວັດເລີຍ ຄັ້ງທີ 21 ໂດຍຝ່າຍລາວ ນຳໂດຍ ທ່ານ ພູວົງ ບຸນຊູ ຮອງເລຂາຄະນະບໍລິຫານພັກແຂວງ, ປະທານຄະນະກຳມະການປົກຄອງແຂວງວຽງຈັນ, ເປັນຫົວໜ້າຄະນະຜູ້ແທນ ແລະ ປະທານຮ່ວມຝ່າຍລາວ; ຝ່າຍໄທ ນຳໂດຍ ທ່ານ ໄຊພົດ ຈະຣຸນພົງ ຜູ້ວ່າລາຊະການຈັງຫວັດເລີຍ, ເປັນຫົວໜ້າຄະນະຜູ້ແທນ ແລະ ປະທານຮ່ວມຝ່າຍໄທ ພ້ອມດ້ວຍຄະນະທັງສອງຝ່າຍເຂົ້າຮ່ວມ.
ກອງປະຊຸມໄດ້ທົບທວນຄືນຜົນການຈັດຕັ້ງປະຕິບັດເນື້ອໃນບົດບັນທຶກກອງປະຊຸມ ຄັ້ງທີ 20 ທີ່ລົງນາມໃນວັນທີ 15 ກັນຍາ 2023 ທີ່ເມືອງວັງວຽງ ແຂວງວຽງຈັນ, ໂດຍເຫັນວ່າ ການພົວພັນຮ່ວມມືລະຫວ່າງແຂວງວຽງຈັນ ແລະ ຈັງຫວັດເລີຍ ໄດ້ຮັບການພັດທະນາດີຂຶ້ນຢ່າງຕໍ່ເນື່ອງ ບົນພື້ນຖານມິດຕະພາບ ແລະ ເປັນບ້ານໃກ້ເຮືອນຄຽງ. ພ້ອມນີ້ ທັງສອງຝ່າຍໄດ້ສະແດງຄວາມຊົມເຊີຍຕໍ່ຜົນສຳເລັດໃນການແລກປ່ຽນການຢ້ຽມຢາມລະດັບສູງ ແລະ ການພົບປະຫາລືກັນລະຫວ່າງສອງຝ່າຍ.
ສຳລັບແນວທາງຮ່ວມມືໃນຕໍ່ໜ້າ, ກອງປະຊຸມເຫັນດີສືບຕໍ່ຮັກສາຄວາມສະຫງົບຮຽບຮ້ອຍຕາມຊາຍແດນ, ສ້າງຊາຍແດນໃຫ້ເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື; ເພີ່ມທະວີການປະສານງານ ແລະ ແລກປ່ຽນຂໍ້ມູນກັນຢ່າງທັນເວລາ ເພື່ອສະກັດກັ້ນການກະທຳ ຫຼື ການເຄື່ອນໄຫວຂອງກຸ່ມບຸກຄົນທີ່ອາດສົ່ງຜົນກະທົບຕໍ່ຄວາມສະຫງົບຂອງອີກຝ່າຍ ພ້ອມທັງຮ່ວມມືຕ້ານອາຊະຍາກຳຂ້າມຊາດ, ການລັກລອບຂົນສົ່ງສິ່ງຜິດກົດໝາຍ, ການຄ້າມະນຸດ, ແຮງງານຜິດກົດໝາຍ ແລະ ບັນຫາອື່ນໆຕາມແນວຊາຍແດນ.
ດ້ານການເຂົ້າ-ອອກຕາມຈຸດຜ່ານແດນ, ທັງສອງຝ່າຍເຫັນດີປະສານງານໃຫ້ການເດີນທາງຂ້າມແດນຂອງປະຊາຊົນ, ນັກທ່ອງທ່ຽວ ແລະ ຜູ້ປະກອບການ ເປັນໄປດ້ວຍຄວາມສະດວກ, ວ່ອງໄວ, ປອດໄພ ແລະ ຖືກຕ້ອງຕາມກົດໝາຍ, ຫາກພົບບຸກຄົນກະທຳຜິດ ຫຼື ເຂົ້າ-ອອກເມືອງຜິດກົດໝາຍ ໃຫ້ດຳເນີນການຕາມກົດໝາຍຂອງແຕ່ລະປະເທດ ແລະ ແຈ້ງໃຫ້ອີກຝ່າຍຮັບຊາບຜ່ານຊ່ອງທາງການທູດຕາມກຳນົດ.
ພ້ອມກັນນີ້, ທັງສອງຝ່າຍເຫັນດີເພີ່ມທະວີການຮ່ວມມືຕາມລຳນ້ຳຂອງ, ການຮັກສາປ້ອງກັນຕາຝັ່ງເຈື່ອນ, ການຈັດລະບຽບການແລ່ນເຮືອ, ການກວດກາກິດຈະກຳຕ່າງໆຕາມລຳນ້ຳຂອງ ແລະ ການແຈ້ງໃຫ້ອີກຝ່າຍຮັບຊາບລ່ວງໜ້າ ກ່ອນຈະມີການກໍ່ສ້າງ ຫຼື ດຳເນີນກິດຈະກຳໃດໆໃນບໍລິເວນແມ່ນ້ຳຂອງ. ດ້ານການປາບປາມຢາເສບຕິດ ໄດ້ເນັ້ນໃຫ້ສືບຕໍ່ແລກປ່ຽນຂໍ້ມູນ, ປະສານງານ ແລະ ຈັດກອງປະຊຸມຮ່ວມກັນຢ່າງໜ້ອຍປີລະ 2 ຄັ້ງ ໂດຍຜັດປ່ຽນກັນເປັນເຈົ້າພາບ.
ນອກຈາກນັ້ນ, ຍັງໄດ້ເຫັນດີຮ່ວມມືດ້ານການຄ້າ, ການລົງທຶນ, ກະສິກຳ, ການທ່ອງທ່ຽວ, ວັດທະນະທຳ, ການສຶກສາ, ກິລາ ແລະ ສາທາລະນະສຸກ ໂດຍສົ່ງເສີມການຈັດກິດຈະກຳແລກປ່ຽນ, ການສຳມະນາວິຊາການ, ການແລກປ່ຽນສິລະປະ, ການຈັບຄູ່ທຸລະກິດ ແລະ ການພັດທະນາການທ່ອງທ່ຽວແບບສີຂຽວ ໃນເຂດເມືອງເຟືອງ, ເມືອງວັງວຽງ ແລະ ເມືອງແກ້ວອຸດົມ ແຂວງວຽງຈັນ.
ສອງຝ່າຍຍຍັງໄດ້ປຶກສາຫາລືເພື່ອສຶກສາສຳຫຼວດຄວາມເປັນໄປໄດ້ໃນການກໍ່ສ້າງ “ຂົວມິດຕະພາບ ລາວ-ໄທ” ບໍລິເວນຈຸດຜ່ານແດນສາກົນບ້ານວັງ ເມືອງໝື່ນ ແຂວງວຽງຈັນ ໃຫ້ສອດຄ່ອງກັບຈຸດຜ່ານແດນຖາວອນບ້ານຄົກໄຜ່ ຕຳບົນປາກຊົມ ອຳເພີປາກຊົມ ຈັງຫວັດເລີຍ ເພື່ອອຳນວຍຄວາມສະດວກແກ່ປະຊາຊົນ ແລະ ນັກທ່ອງທ່ຽວ, ສົ່ງເສີມການຄົມມະນາຄົມ-ຂົນສົ່ງ, ການຄ້າ-ການລົງທຶນ ແລະ ເຊື່ອມໂຍງໂຄງລ່າງພື້ນຖານຂອງສອງຝ່າຍ. ພ້ອມນັ້ນ ຍັງເຫັນດີສືບຕໍ່ພັດທະນາດ່ານສາກົນບ້ານວັງ-ຄົກໄຜ່ ໃຫ້ເປັນດ່ານສາກົນຄູ່ຂະໜານ ແລະ ສົ່ງເສີມການສົ່ງອອກ-ນຳເຂົ້າສິນຄ້າ, ໂດຍສະເພາະສິນຄ້າກະສິກຳ.
ທັງສອງຝ່າຍຕົກລົງໃຫ້ກອງເລຂາຄະນະປະສານງານ ແຂວງວຽງຈັນ-ຈັງຫວັດເລີຍ ແລະ ເມືອງ-ອຳເພີທີ່ມີເຂດຕິດຊາຍແດນ ຈັດກອງປະຊຸມພົບປະ, ແລກປ່ຽນ ແລະ ປະສານງານຮ່ວມກັນຢ່າງໜ້ອຍປີລະ 1 ຄັ້ງ ແລະ ກຳນົດໃຫ້ແຂວງວຽງຈັນ ເປັນເຈົ້າພາບຈັດກອງປະຊຸມຄັ້ງທີ 22 ໃນຄັ້ງຕໍ່ໄປ.
ກອງປະຊຸມຄັ້ງທີ 21 ສຳເລັດລົງດ້ວຍຜົນສຳເລັດອັນດີ, ສະແດງເຖິງຄວາມມຸ່ງໝັ້ນຂອງສອງຝ່າຍໃນການຮ່ວມມືຮັກສາຊາຍແດນໃຫ້ສະຫງົບ, ປອດໄພ, ເປັນຊາຍແດນແຫ່ງສັນຕິພາບ ແລະ ມິດຕະພາບ ອັນເປັນພື້ນຖານສຳຄັນໃນການສ້າງສາ ແລະ ພັດທະນາແຂວງວຽງຈັນ ແລະ ຈັງຫວັດເລີຍໃຫ້ກ້າວໜ້າຕໍ່ໄປ.
ຂໍ້ມູນຈາກ:
สถานีวิทยุกระจายเสียงแห่งประเทศไทย จังหวัดเลย