ໂຄງການເກັບກູ້ລະເບີດແຫ່ງຊາດ ຕ້ອນຮັບການມາຢ້ຽມຢາມຂອງບັນດາຄະນະຜູ້ແທນກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3 ເຂົ້າສູ່ສະໜາມປະຕິບັດງານພາກສະໜາມ ຂອງ ຄກລ ຢູ່ທີ່ບ້ານພິກໃຫຍ່, ນະຄອນຫຼວງພະບາງ, ແຂວງຫຼວງພະບາງ.
ທ່ານ ອານຸພາບ ວົງໜໍ່ແກ້ວ, ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ທັງເປັນຮອງປະທານ-ຜູ້ປະຈຳການ ຄະນະກຳມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໄດ້ນຳພາຄະນະຜູ້ແທນກອງປະຊຸມ ແລະ ອົງການປົກຄອງທ້ອງຖິ່ນແຂວງ ຫຼວງພະບາງ ທັງໝົດເກືອບ 300 ທ່ານ ມາຢ້ຽມຢາມ ແລະ ຕິດຕາມຮັບຊົມການຈັດຕັ້ງປະຕິບັດວຽກງານພາກສະໜາມໃນການແກ້ໄຂບັນຫາລະເບີດບໍ່ທັນແຕກຕົວຈິງ ເພື່ອຮ່ວມກັນເປັນສັກຂີພິຍານຕໍ່ກັບບັນຫາ ລບຕ ທີ່ຕົກຄ້າງຢູ່ ສປປ ລາວ ເຊິ່ງຍັງສືບຕໍ່ເປັນໄພຂົ່ມຂູ່ໃຫ້ແກ່ການດຳລົງຊີວິດ, ການທຳມາຫາກິນ ຂອງ ປະຊາຊົນລາວບັນດາເຜົ່າ ແລະ ກີດຂວາງການພັດທະນາເສດຖະກິດ-ສັງຄົມ ຂອງ ສປປ ລາວ.
ທ່ານ ອານຸສັກ ພົງສາ, ຜູ້ອຳນວຍການ ໂຄງການເກັບກູ້ລະເບີດແຫ່ງຊາດ ໄດ້ເປັນກຽດກ່າວລາຍງານຄະນະຜູ້ແທນທຸກທ່ານທີ່ມາຢ້ຽມຢາມສະໜາມ ເພື່ອຮັບຊາບກ່ຽວກັບສະພາບການປະຕິບັດງານຂອງ ຄກລ, ບັນດາຜົນສຳເລັດ ແລະ ການຊ່ວຍເຫຼືອຂອງບັນດາປະເທດຄູ່ຮ່ວມພັດທະນາ ແລະ ອົງການຈັດຕັ້ງສາກົນຕ່າງໆ ນັບແຕ່ໄລຍະເລີ່ມຕົ້ນຈົນເຖິງປະຈຸບັນ. ພ້ອມດຽວກັນນັ້ນ, ຫົວໜ້າທີມງານເກັບກູ້ ຍັງໄດ້ສືບຕໍ່ລາຍງານສະເພາະ ກ່ຽວກັບສະພາບການຈັດຕັ້ງປະຕິບັດວຽກງານພາກສະໜາມ ຢູ່ທີ່ ບ້ານພິກໃຫຍ່ ໃຫ້ແກ່ຄະນະຜູ້ແທນໄດ້ຮັບຊາບອີກດ້ວຍ.
ໂຄງການເກັບກູ້ລະເບີດແຫ່ງຊາດ ຂໍສະແດງຄວາມຮູ້ບຸນຄຸນ ແລະ ຂອບໃຈເປັນຢ່າງສູງມາຍັງບັນດາປະເທດຄູ່ຮ່ວມພັດທະນາ ແລະ ອົງການຈັດຕັ້ງສາກົນທຸກພາກສ່ວນທີ່ໄດ້ໃຫ້ການຊ່ວຍເຫຼືອແກ່ ຄກລ ຕະຫຼອດມາ ແລະ ພວກເຮົາຫວັງຢ່າງຍິ່ງວ່າທຸກພາກສ່ວນຈະສືບຕໍ່ໃຫ້ການຊ່ວຍເຫຼືອ ແລະ ເສີມສ້າງການຮ່ວມມືຢ່າງເຂັ້ມແຂງໃນຊຸມປີຕໍ່ໜ້າ ເພື່ອຮ່ວມກັນສ້າງອະນາຄົດທີ່ປອດໄພຍິ່ງຂຶ້ນໃຫ້ແກ່ ສປປ ລາວ.
ຂໍ້ມູນຈາກ: Lao National Unexploded Ordnance Programme