ພິທີເຊັນສັນຍາໃນຄັ້ງນີ້ແມ່ນການສະໜັບສະໜູນທຶນຮອນ ເພື່ອກໍ່ສ້າງລະບົບນໍ້າລິນທີ່ບ້ານນາປັນແຂວງຊຽງຂວາງ ໂດຍມີເປົ້າໝາຍເພື່ອປັບປຸງ ແລະ ຍົກລະດັບຊີວິດການເປັນຢູ່ຂອງປະຊາຊົນໃຫ້ສາມາດເຂົ້າເຖິງແຫຼ່ງນໍ້າທີ່ສະອາດ ແລະ ຖືກສຸຂະອະນາໄມ.
ໃນພິທີເຊັນສັນຍາ ພະນະທ່ານ ໂຄອິຊຶມິ ຊຶໂຕະມຸ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ໄດ້ເຊັນເອກະສານແລກປ່ຽນ ຮ່ວມກັບ ຜູ້ຕາງໜ້າຈາກຂະແໜງການທີ່ຮັບເອົາການຊ່ວຍເຫຼືອຈາກທ້ອງຖິ່ນໂດຍມີ ພະນະທ່ານ ພູວົງ ອຸ່ນຄໍາແສນ, ເລຂາພັກແຂວງຊຽງຂວາງ ໃຫ້ກຽດເປັນສັກຂີພະຍານ.
ໃນພິທີດັ່ງກ່າວ, ທ່ານທູດ ໂຄອິຊຶມິ ໄດ້ກ່າວໄວ້ວ່າ: “ໃນປະເທດລາວ, ອັດຕາສ່ວນຄົວເຮືອນທີ່ສາມາດເຂົ້າເຖິງນໍ້າສະອາດ ແລະ ປອດໄພ ແມ່ນເພີ່ມຂຶ້ນເລື່ອຍໆໃນທຸກໆປີ ແລະ ປະຈຸບັນກໍ່ບັນລຸໄດ້ເຖິງ 90% ແລ້ວ. ແຕ່ເຖິງຢ່າງໃດກໍ່ຕາມ, ກໍ່ຍັງມີບາງພື້ນທີ່ໃນເຂດຫ່າງໄກຊອກຫຼີກທີ່ຍັງມີຄວາມຕ້ອງການ ການປັບປຸງ ເຊັ່ນບ້ານນາປັນແຫ່ງນີ້. ຂ້າພະເຈົ້າຫວັງເປັນຢ່າງຍິ່ງວ່າ, ການກໍ່ສ້າງໂຄງການຈະສໍາເລັດຈົບງາມໂດຍໄວດ້ວຍການຮ່ວມແຮງຮ່ວມໃຈກັນຈາກປະຊາຊົນເຂດດັ່ງກ່າວ ແລະ ນໍາໄປສູ່ການປັບປຸງຄຸນນະພາບການດໍາລົງຊີວິດ ແລະ ສຸຂະອະນາໄມຂອງຊຸມຊົນດ້ວຍ.”
ໂຄງການຊ່ວຍເຫຼືອລ້າຂັ້ນຮາກຖານ (GGP) ແມ່ນ ການສະໜອງທຶນທີ່ຈຳເປັນໃຫ້ແກ່ໂຄງການຂະໜາດນ້ອຍທີ່ໃຫ້ຜົນປະໂຫຍດໂດຍກົງແກ່ປະຊາຊົນທ້ອງຖິ່ນ ໂດຍມີເປົ້າໝາຍແນໃສ່ໃນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດທີ່ກໍາລັງພັດທະນາ, ເຊິ່ງລວມມີປະເທດລາວຢູ່ນໍາ.
ລັດຖະບານຍີ່ປຸ່ນໄດ້ໃຫ້ການສະໜັບສະໜູນແຂວງຊຽງຂວາງ ລວມເປັນມູນຄ່າຫຼາຍກວ່າ 2,900,000 ໂດລາສະຫະລັດ ໃນຂະແໜງການສຶກສາ, ລະບົບນໍ້າລິນ ແລະ ສາທາລະນະສຸກ. ປະເທດຍີ່ປຸ່ນໃນນາມເປັນສ່ວນໜຶ່ງຂອງຄວາມໝຸ່ງໝັ້ນໃນການແກ້ໄຂຄວາມແຕກໂຕນທາງດ້ານເສດຖະກິດ ແລະ ສັງຄົມໃນພາກພື້ນ, ຈະສືບຕໍ່ໃຫ້ການສະໜັບສະໜຸນປະເທດລາວໃນການປັບປຸງພື້ນຖານຊີວິດການເປັນຢູ່ຂັ້ນຮາກຖານຂອງປະຊາຊົນເພື່ອຮັບປະກັນວ່າຈະ “ບໍ່ໃຫ້ມີໃຜຖືກຖິ້ມໄວ້ທາງຫ