ເພື່ອສຶກສາຜົນກະທົບຕໍ່ຮ່າງກາຍ ແລະ ຈິດໃຈ ກ່ອນການເດີນທາງໄປອະວະກາດຈິງ ອົງການບໍລິຫານການບິນ ແລະ ອະວະກາດແຫ່ງຊາດສະຫະລັດ ຫຼື NASA ໄດ້ປະກາດເປີດຮັບສະໝັກອາສາສະໝັກເພື່ອເຂົ້າຮ່ວມໂຄງການວິໄຈ “Moon and Mars Exploration Analog” ໂດຍຈະໃຫ້ຜູ້ທີ່ຜ່ານການຄັດເລືອກເຂົ້າໄປໃຊ້ຊີວິດ ແລະ ປະຕິບັດພາລະກິດຕັດຂາດຈາກໂລກພາຍນອກເປັນເວລາ 1 ປີເຕັມ ຢູ່ພາຍໃນສະຖານີຈຳລອງທີ່ສ້າງຂຶ້ນດ້ວຍເຕັກໂນໂລຊີການພິມ 3 ມິຕິ (3D-printed habitat) ຢູ່ທີ່ສູນອະວະກາດຈອນສັນ (Johnson Space Center) ໃນເມືອງຮິວສະຕັນ, ລັດເທັກຊັດ.
ພາລະກິດນີ້ມີກຳນົດການເລີ່ມຕົ້ນໃນຊ່ວງເດືອນສິງຫາ ປີ 2027 ໄປຈົນເຖິງປີ 2028. ເປົ້າໝາຍຫຼັກແມ່ນເພື່ອສຶກສາ ແລະ ເກັບກຳຂໍ້ມູນທາງວິທະຍາສາດກ່ຽວກັບການປ່ຽນແປງທາງດ້ານຮ່າງກາຍ, ພຶດຕິກຳ ແລະ ສຸຂະພາບຈິດຂອງມະນຸດ ເມື່ອຕ້ອງຕົກຢູ່ໃນສະພາວະກົດດັນ ແລະ ຖືກຈຳກັດພື້ນທີ່ເປັນເວລາດົນນານ ເຊິ່ງເປັນການກຽມຄວາມພ້ອມໃຫ້ກັບນັກບິນອະວະກາດກ່ອນທີ່ຈະເດີນທາງໄປປະຕິບັດພາລະກິດຈິງຢູ່ເທິງດວງເດືອນ ແລະ ດາວອັງຄານ ໃນອະນາຄົດ.
ຕະຫຼອດໄລຍະເວລາ 1 ປີ ພາຍໃນສະຖານີຈຳລອງ, ອາສາສະໝັກຈະຕ້ອງໄດ້ພົບກັບສະຖານະການຕ່າງໆ ທີ່ຄ້າຍຄືກັບການຢູ່ເທິງດາວອັງຄານແທ້ ເປັນຕົ້ນແມ່ນ:
-ການຈຳລອງສະພາບແວດລ້ອມທີ່ມີຊັບພະຍາກອນ ແລະ ອາຫານຢ່າງຈຳກັດ.
-ການຈຳລອງລະບົບອຸປະກອນ ແລະ ເຄື່ອງມືຂັດຂ້ອງ.
-ການຈຳລອງລະບົບການສື່ສານທີ່ຫຼ້າຊ້າ (Delay) ກັບໂລກພາຍນອກສູງສຸດເຖິງ 22 ນາທີ.
-ການປະຕິບັດພາລະກິດຍ່າງສຳຫຼວດອະວະກາດຈຳລອງ (Simulated Spacewalks) ເທິງຜືນຊາຍສີແດງ, ການຄວບຄຸມຫຸ່ນຍົນ.
-ການບຳລຸງຮັກສາສະຖານີ ແລະ ການທົດລອງປູກພືດເພື່ອເປັນອາຫານ.
ເຖິງຢ່າງໃດກໍຕາມ, ເງື່ອນໄຂໃນການຮັບສະໝັກຂອງ NASA ແມ່ນມີຄວາມເຂັ້ມງວດສູງຫຼາຍ ໂດຍຜູ້ສະໝັກຈະຕ້ອງເປັນພົນລະເມືອງສະຫະລັດອາເມຣິກາ ຫຼື ຜູ້ຖືບັດກຣີນກາດ (Green Card) ທີ່ມີອາຍຸລະຫວ່າງ 30-55 ປີ, ມີສຸຂະພາບຮ່າງກາຍແຂງແຮງ, ບໍ່ສູບຢາ ແລະ ຕ້ອງຈົບການສຶກສາລະດັບປະລິນຍາໂທຂຶ້ນໄປໃນສາຂາວິທະຍາສາດ, ເຕັກໂນໂລຊີ, ວິສະວະກຳສາດ ຫຼື ຄະນິດສາດ (STEM) ພ້ອມທັງມີປະສົບການເຮັດວຽກກົງສາຍ ຫຼື ມີຊົ່ວໂມງບິນໃນຖານະນັກບິນຍົນເຈັດບໍ່ຕໍ່າກວ່າ 1,000 ຊົ່ວໂມງ. ໂດຍຜູ້ທີ່ຜ່ານການຄັດເລືອກທັງໝົດຈະໄດ້ຮັບຄ່າຕອບແທນເປັນເງິນລາງວັນຕະຫຼອດການເຂົ້າຮ່ວມໂຄງການວິໄຈໃນຄັ້ງນີ້.