ກອງປະຊຸມພົບປະແລກປ່ຽນບົດຮຽນ ລະຫວ່າງອົງການກວດກາລັດແຂວງເຊກອງ ສປປ ລາວ ແລະ ອົງການກວດກາລັດນະຄອນດາໜັງ ສສ ຫວຽດນາມ ຈັດຂຶ້ນໃນວັນທີ 9 ສິງຫາ 2026 ທີ່ຫ້ອງວ່າການແຂວງເຊກອງ, ໂດຍມີທ່ານ ສາກົນ ພອນປະເສີດ ປະທານອົງການກວດກາລັດແຂວງເຊກອງ, ທ່ານ ຮິ່ງຢຸຍ ພຸກ ຮອງປະທານອົງການກວດກາລັດນະຄອນດາໜັງ ພ້ອມຄະນະທັງສອງຝ່າຍເຂົ້າຮ່ວມ.
ການພົບປະໃນຄັ້ງນີ້, ສອງຝ່າຍໄດ້ລາຍງານການເຄື່ອນໄຫວວຽກງານກວດກາລັດ ໃນໄລຍະຜ່ານມາ ແລະ ແລກປ່ຽນຂໍ້ມູນບົດຮຽນການກວດກາພາຍໃນອົງການ, ການກວດກາຖານລາຍຮັບຫົວໜ່ວຍທຸລະກິດພາຍໃນ ແລະ ຕ່າງປະເທດ ແລະ ລາຍຮັບວິຊາການ ຂອງການບໍລິຫານລັດ, ການນໍາໃຊ້ງົບປະມານ ແລະ ຊັບສິນຂອງລັດ, ກວດກາການປະຕິບັດນະໂຍບາຍ, ກົດໝາຍ ແລະ ລະບຽບການຕ່າງໆ, ການສະຫຼຸບຜົນ ແລະ ການແກ້ໄຂບັນຫາ, ການຕິດຕາມພຶດຕິກໍາ, ສິ່ງທ້າທາຍຕໍ່ການແກ້ໄຂບັນຫາການສໍ້ລາດບັງຫຼວງ ຂອງພະນັກງານ-ເຈົ້າໜ້າທີ່ລັດ ແລະ ວິທີການແກ້ໄຂຄໍາຮ້ອງ-ຄໍາສະເໜີ ຂອງປະຊາຊົນທີ່ຕິດພັນກັບຫຼາຍພາກສ່ວນ.
ພ້ອມນີ້, ສອງຝ່າຍຍັງໄດ້ຕີລາຄາຕໍ່ການພົບປະໃນຄັ້ງນີ້ ເຊິ່ງເປັນການປະກອບເຂົ້າໃນການສ່ວນເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ກໍຄື ແຂວງເຊກອງ ກັບ ນະຄອນດາໜັງ ໃຫ້ແໜ້ນແຟ້ນຍິ່ງຂຶ້ນ. ສອງຝ່າຍຈະນໍາເອົາຜົນສໍາເລັດກອງປະຊຸມໃນຄັ້ງນີ້ ສືບຕໍ່ນໍາສະເໜີຕໍ່ການນໍາແຂວງຕົນ ເພື່ອເປັນບ່ອນອີງໃຫ້ແກ່ການຮ່ວມມື, ປະສານງານ ແລະ ແລກປ່ຽນບົດຮຽນຮ່ວມກັນໃນຕໍ່ໜ້າ ແນໃສ່ຍົກສູງຄຸນນະພາບການເຄື່ອນໄຫວວຽກງານກວດກາລັດສອງແຂວງໃຫ້ເຂັ້ມແຂງ.
ອ້າງອີງຈາກ: Media Laos