ກອງປະຊຸມດັ່ງກ່າວ ໃຫ້ກຽດເປັນປະທານຮ່ວມໂດຍ ສະຫາຍ ພັນເອກ ສຸກສະໝອນ ສີພັນດອນ ຫົວໜ້າການທະຫານກອງບັນຊາການທະຫານແຂວງສະຫວັນນະເຂດ, ຫົວໜ້າຄະນະໜ່ວຍປະສານງານປະຈຳພື້ນທີ່ຊາຍແດນລາວ-ໄທ ແຂວງສະຫວັນນະເຂດ ສປປ ລາວ ແລະ ສະຫາຍ ພົນຕີ ມົງຄຸນ ຫໍ່ທອງ ຜູ້ບັນຊາການກອງກຳລັງສຸລະສັກມົນຕີ, ຫົວໜ້າຄະນະໜ່ວຍປະສານງານປະຈຳພື້ນທີ່ຊາຍແດນໄທ-ລາວ ແຂວງມຸກດາຫານ ຣາຊະອານາຈັກໄທ, ພ້ອມດ້ວຍຄະນະອະນຸກຳມະການຊຸດປະຕິບັດງານປະຈຳພື້ນທີ່ແຂວງສະຫວັນນະເຂດ-ມຸກດາຫານ ເຂົ້າຮ່ວມຢ່າງພ້ອມພຽງ.
ການພົບປະຄັ້ງນີ້ ປະຕິບັດຕາມຂໍ້ຕົກລົງໃນບົດບັນທຶກ ລະຫວ່າງຊຸດປະສານງານແຂວງປະຈຳພື້ນທີ່ຊາຍແດນໄທ-ລາວ, ສະຫວັນນະເຂດ-ມຸກດາຫານ ຈາກກອງປະຊຸມຄັ້ງທີ 3 ປີ 2025 ທີ່ຫ້ອງປະຊຸມສຳນັກງານເຂດເສດຖະກິດພິເສດ ນະຄອນໄກສອນພົມວິຫານ ແຂວງສະຫວັນນະເຂດ ສປປ ລາວ. ໃນກອງປະຊຸມ, ສອງຝ່າຍໄດ້ພ້ອມກັນຕີລາຄາຄືນ ແລະ ແຈ້ງສະພາບການໃຫ້ກັນຊາບກ່ຽວກັບການຈັດຕັ້ງປະຕິບັດດ້ານການສະກັດກັ້ນແກ້ໄຂບັນຫາຢາເສບຕິດ ແລະ ບັນຫາອື່ນໆ ທີ່ເກີດຂຶ້ນຕາມແນວຊາຍແດນສະຫວັນນະເຂດ-ມຸກດາຫານ, ພ້ອມທັງທົບທວນຄືນການຜັດປ່ຽນກັນເປັນເຈົ້າພາບຈັດກອງປະຊຸມໃນແຕ່ລະປີ, ການປະສານງານການຮ່ວມມືດ້ານຂໍ້ມູນຂ່າວສານ, ເປົ້າໝາຍຜູ້ຄ້າຂາຍຢາເສບຕິດຢ່າງຕໍ່ເນື່ອງ, ການສົ່ງໜັງສືອວຍພອນເຊິ່ງກັນ ແລະ ກັນໃນວັນສຳຄັນຂອງສອງຊາດ ລາວ-ໄທ ແລະ ການຈັດຕັ້ງລາດຕະເວນຮ່ວມກັນຢ່າງເປັນທາງການປີລະ 1 ຄັ້ງ.
ພາຍຫຼັງສຳເລັດການພົບປະແລກປ່ຽນ, ຄະນະຊຸດປະສານງານປະຈຳພື້ນທີ່ ສະຫວັນນະເຂດ-ມຸກດາຫານ ໄດ້ພ້ອມກັນລົງນາມເຊັນບົດບັນທຶກ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານຮ່ວມກັນໃນຕໍ່ໜ້າ. ເຊິ່ງທັງສອງຝ່າຍໄດ້ເຫັນດີເປັນເອກະພາບ ກັນຍົກລະດັບການແກ້ໄຂບັນຫາຢາເສບຕິດ, ກຸ່ມຄໍເຊັນເຕີ້ (Call Center) ແລະ ສະແກັມເມີ້ (Scammer) ຮ່ວມກັນຢ່າງຮີບດ່ວນ, ພ້ອມທັງຮ່ວມມືກັນສຸດຄວາມສາມາດເພື່ອແກ້ໄຂກໍລະນີທີ່ຜິດກົດໝາຍໃຫ້ວ່ອງໄວທັນກັບສະພາບການ ແລະ ເຫັນດີຮ່ວມກັນກວດສອບຜູ້ປະກອບການແຮ່-ຊາຍ ຕາມພື້ນທີ່ຊາຍແດນ ໃຫ້ຖືກຕ້ອງຕາມລະບຽບກົດໝາຍຂອງທັງສອງປະເທດ.
ຈາກນັ້ນ, ພາຍຫຼັງສຳເລັດກອງປະຊຸມ ແລະ ການລົງນາມແລ້ວ, ຄະນະຊຸດປະຕິບັດງານສະຫວັນນະເຂດ-ມຸກດາຫານ ຍັງໄດ້ພ້ອມກັນອອກລາດຕະເວນຮ່ວມທາງນ້ຳ ເພື່ອກວດກາ ແລະ ລາດຕະເວນຄວາມເປັນລະບຽບຮຽບຮ້ອຍຕາມລຳແມ່ນ້ຳຂອງ ໃນຂອບເຂດຄວາມຮັບຜິດຊອບຂອງສອງເບື້ອງ ສະຫວັນນະເຂດ-ມຸກດາຫານ ພ້ອມທັງຕິດຕາມສະພາບປະກົດການຫຍໍ້ທໍ້ຕ່າງໆ ທີ່ອາດຈະເກີດຂຶ້ນ ເພື່ອເຮັດໃຫ້ສະພາບລຽບຕາມຊາຍແດນ ກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ຄວາມສະຫງົບສຸກ.
ຂໍ້ມູນອ້າງອີງ: ວິທະຍຸກະຈາຍສຽງ ແຂວງສະຫວັນນະເຂດ