ເຈົ້າໜ້າທີ່ຄະນະສະເພາະກິດ ກະຊວງປ້ອງກັນຄວາມສະຫງົບ ໄດ້ເປີດປະຕິບັດການຄັ້ງໃຫຍ່ເຂົ້າກວດຄົ້ນ ແລະ ກວາດລ້າງກຸ່ມແກ້ງເປົ້າໝາຍສໍ້ໂກງທາງໂທລະຄົມ ຫຼື ສະແກມເມີ ພ້ອມກັນເຖິງ 6 ຈຸດ ໃນເຂດນະຄອນຫຼວງວຽງຈັນ. ໃນວັນທີ 1 ສິງຫາ 2026 ທີ່ຜ່ານມາ ເຈົ້າໜ້າທີ່ສາມາດກັກຕົວຜູ້ຖືກສົງໄສໄດ້ທັງໝົດ 63 ຄົນ ຍິງ 3 ຄົນ ແລະ ຍຶດຂອງກາງໄດ້ຈໍານວນຫຼວງຫຼາຍ.

ໃນຈໍານວນຜູ້ຖືກກັກຕົວທັງໝົດ ປະກອບມີສັນຊາດຈີນ ຈໍານວນ 57 ຄົນ ຍິງ 2 ຄົນ,  ລາວ 4 ຄົນ ຍິງ 1 ຄົນ, ກໍາປູເຈຍ 1 ຄົນ ແລະ ຄົນໄທ 1 ຄົນ.

ຈາກການລົງພື້ນທີ່ຂອງເຈົ້າໜ້າທີ່ໃນ 2 ເມືອງໃຫຍ່ ຄື: ເມືອງສີໂຄດຕະບອງ ແລະ ເມືອງຫາດຊາຍຟອງ ສາມາດກວາດລ້າງແກ້ງສະແກມເມີ ໄດ້ທັງໝົດ 6 ຈຸດຄື:

• ຈຸດທີ 1 (ບ້ານໃໝ່, ເມືອງສິໂຄດຕະບອງ): ເຂົ້າກວດຄົ້ນເຮືອນເຊົ່າ 2 ຊັ້ນ ຈໍານວນ 3 ຫຼັງຕິດກັນ ເຊິ່ງເປັນເຮືອນຂອງທ້າວສຸກສະເຫຼີມ ສອນພານິດ ອາຊີບນັກທຸລະກິດ, ປັດຈຸ​ບັນຢູ່ບ້ານ ນາຊາຍທອງໃຕ້ ເມືອງນາຊາຍທອງ, ນະຄອນຫຼວງວຽງຈັນ;  ພົບເຫັນເຮືອນຫຼັງ 1 ຖືກນໍາໃຊ້ບ່ອນພັກເຊົາ ແລະ ອີກຫຼັງຈໍານວນ 2 ຖືກດັດແປງເປັນຫ້ອງການສູນສໍ້ໂກງທາງໂທລະຄົມ ຫຼື ສະແກມເມີ. ໃນເວລາເຈົ້າໜ້າທີ່ເຂົ້າກວດຄົ້ນພົບເຫັນພຽງແຕ່ພະນັກງານແມ່ບ້ານ ແລະ ພະນັກງານອະນາໄມ ຈໍານວນ 4 ຄົນ 1 ຍິງ, ສັນຊາດລາວ 3 ຄົນ ຍິງ 1, ສັນຊາດ ໄທ 1 ຄົນ. ຜ່ານການກວດຄົ້ນສະຖານທີ່, ພົບເຄື່ອງຂອງທີ່ນໍາໃຊ້ເຂົ້າໃນການກະທໍາຜິດມີຄື: ໂທລະສັບ ຈຳນວນ 3.172 ໜ່ວຍ, ຄອມພິວເຕີຕັ້ງໂຕະ ຈຳນວນ 97 ໜ່ວຍ, ຄອມພິວເຕີໂນ້ດບຸກ ຈຳນວນ 2 ໜ່ວຍ, ໜັງສືຜ່ານແດນ ຈໍາ 2 ຫົວ, ລົດເກັງ ເກຍລີໂອ ສີຂາວ ບໍ່ມີປ້າຍ ຈໍານວນ 1 ຄັນ, ລົດຕູ້ (ບໍ່ມີປ້າຍ) ຈໍານວນ 1 ຄັນ, ລົດຈັກ ຮອນດາສະກຸບປີ້ ສີດຳ ເລກທະບຽນ ຍອ 4916 ກຳແພງນະຄອນ ຈຳນວນ 1 ຄັນ, ລັດຈັກໄຟຟ້າ ຈຳນວນ 4 ຄັນ, ລົດຈັກສາມລໍ້ໄຟຟ້າ ຈຳນວນ 1 ຄັນ.

• ຈຸດທີ 2 (ບ້ານໜອງໄຮ, ເມືອງຫາດຊາຍຟອງ): ເຂົ້າກວດຄົ້ນເຮືອນເຊົ່າເຮືອນ 2 ຊັ້ນ,  ເຊິ່ງເປັນເຮືອນຂອງ ນາງ ສົມພັນ ອາຍຸ 40 ປີ, ອາຊີບພະນັກງານ; ພົບຜູ້ຖືກສົງໄສ 24 ຄົນ ໃນນັ້ນ ສັນຊາດຈີນ ຈຳນວນ 23 ຄົນ ຍິງ 1 ຄົນ, ຄົນລາວ 1 ຄົນ. ເຈົ້າໜ້າທີ່ສາມາດຍຶດເຄື່ອງຂອງກາງ ໄດ້ຄື: ຄອມພິວເຕີຕັ້ງໂຕະ ຈຳນວນ 28 ໜ່ວຍ, ຄອມພິວເຕີໂນດບຸກ ຈຳນວນ 1 ໜ່ວຍ, ໂທລະສັບມືຖື ຈຳນວນ 70 ໜ່ວຍ, ເຄື່ອງຮັບສັນຍານອິນເຕີເນັດຜ່ານດາວທຽນ ຈຳນວນ 1 ຊຸດ.
• ຈຸດທີ 3 (ບ້ານເມືອງວາທ່າ, ເມືອງສີໂຄດຕະບອງ): ກວດຄົ້ນເຮືອນເຊົ່າ 2 ຊັ້ນ  ເຊີ່ງເປັນເຮືອນຂອງທ້າວ ບຸນໂຮມ (ພະນັກງານບໍານານ), ສາມາດກັກຕົວຜູ້ຖືກສົງໄສ ໄດ້ຈໍານວນ 2 ຄົນ (ຈີນ 1 ຄົນ, ກໍາປູເຈຍ 1 ຄົນ) ພ້ອມ ໂທລະສັບມືຖື: 5 ໜ່ວຍ, ຄອມພິວເຕີໂນດບຸກ 3 ໜ່ວຍ, ແລະ ໄອແພັດ 1 ໜ່ວຍ.
• ຈຸດທີ 4 ແລະ 5 (ໂຮງແຮມຢຸນນານ ບ້ານອຸບມຸງ ແລະ ຕະຫຼາດຊັງຈຽງ ບ້ານວັດໄຕນ້ອຍ ເມືອງ ສີໂຄດຕະບອງ): ເຈົ້າໜ້າທີ່ໄດ້ເຂົ້າກວດກາຫ້ອງພັກໂຮງແຮມ ເບີ 8627 ແລະ ພື້ນທີ່ໃນຕະຫຼາດ ກັກຕົວຄົນຈີນ ໄດ້ 9 ຄົນ ເປັນຍິງ 2 ຄົນ ພ້ອມຍຶດໂທລະສັບ 11 ໜ່ວຍ, ໜັງສືຜ່ານແດນຈໍານວນ 1 ຫົວ, ລົດໃຫຍ່ 2 ຄັນຄື: ລົດຣີໂວ້ ສີດໍາ ໝາຍເລກທະບຽນ ຂກ 5526 ນະຄອນຫຼວງວຽງຈັນ, ລົດເບ້ນ ສີດໍາ ໝາຍເລກທະບຽນ AFC168.
• ຈຸດທີ 6 (ບ້ານສາລະຄໍາໃຕ້, ເມືອງຫາດຊາຍຟອງ): ເຂົ້າກວດຄົ້ນເຮືອນເຊົ່າ ວິນລ່າຊັ້ນ 1, ເຊີ່ງເປັນເຮືອນຂອງ ນາງ ເເກ້ວເເກ່ນໃຈ ຂີນພົມມະວົງ, ອາຊີບຄ້າ-ຂາຍ, ປັດຈຸບັນຢູ່ບ້ານສົມຫວັງ ເມືອງຫາດຊາຍຟອງ ນະຄອນຫຼວງວຽງຈັນ, ສາມາດກັກຕົວຜູ້ຖືກສົງໄສ ສັນຊາດຈີນໄດ້ຈໍານວນ 24 ຄົນ, ຍຶດຄອມພິວເຕີໂນດບຸກ 5 ໜ່ວຍ, ຄອມພິວເຕີຕັ້ງໂຕະ 83 ໜ່ວຍ, ໂທລະສັບ85 ໜ່ວຍ, ໄອເເພັດ 1 ໜ່ວຍ, ເຄື່ອງຮັບສັນຍານອິນເຕີເນັດຜ່ານດາວທຽນ ຈໍານວນ 2 ຊຸດ.

  ເຈົ້າໜ້າທີ່ ປກສ ເປີດເຜີຍວ່າ ເປົ້າໝາຍການຫຼອກລວງຂອງກຸ່ມແກ້ງນີ້ແມ່ນເນັ້ນໃສ່ພົນລະເມືອງຈີນດ້ວຍກັນ. ປັດຈຸບັນ, ເຈົ້າໜ້າທີ່ກຳລັງເລັ່ງສືບສວນ-ສອບສວນຂະຫຍາຍຜົນເພື່ອຊອກຫາຜູ້ຮ່ວມຂະບວນການເພີ່ມເຕີມ. ສຳລັບຜູ້ຕ້ອງສົງໄສສັນຊາດຈີນທັງ 57 ຄົນ, ຫຼັງຈາກເຈົ້າໜ້າທີ່ລາວສອບສວນເອົາຄຳໃຫ້ການເປັນທີ່ຮຽບຮ້ອຍແລ້ວ ຈະມີການປະສານສົມທົບກັບສະຖານເອກອັກຄະລັດຖະທູດ ສປ ຈີນ ແລະ ກົມກວດກາຄົນເຂົ້າ-ອອກເມືອງ ເພື່ອສົ່ງຕົວໃຫ້ຕຳຫຼວດ ສປ ຈີນ ນຳໄປດຳເນີນຄະດີຕໍ່ຢູ່ປະເທດຈີນ; ລວມເຖິງຜູ້ຕ້ອງຫາສັນຊາດກຳປູເຈຍກໍຈະຖືກສົ່ງຕົວເຊັ່ນກັນ.

   ນອກຈາກນີ້, ທາງການລາວຈະບັງຄັບໃຊ້ກົດໝາຍວ່າດ້ວຍການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ ຢ່າງເດັດຂາດ ໂດຍຂຶ້ນບັນຊີ ແລະ ບໍ່ອະນຸຍາດໃຫ້ບຸກຄົນກຸ່ມນີ້ເດີນທາງເຂົ້າ ສປປ ລາວ ອີກຢ່າງເດັດຂາດ ຍ້ອນມີພຶດຕິກຳເຂົ້າມາເຄື່ອນໄຫວກະທຳຜິດຮ້າຍແຮງ ທີ່ສົ່ງຜົນກະທົບຕໍ່ຄວາມສະຫງົບຮຽບຮ້ອຍຂອງສັງຄົມຢູ່ ສປປ ລາວ.

ແຫຼ່ງທີ່ມາ: ຄວາມສະຫງົບ Lao Security News