ສະກຸດຊີ່ (Squishy) ແມ່ນເຄື່ອງຫຼິ້ນທີ່ມີສຳຜັດນຸ້ມ ເຮັດມາຈາກໂຟມໂພລີຍູຣີເທນ (Polyurethane) ມີຄຸນສົມບັດພິເສດຄືເມື່ອບີບແລ້ວ ຈະຄ່ອຍໆຄືນຮູບກັບມາຢ່າງຊ້າໆ. ໂດຍສະກຸດຊີ່ສ່ວນຫຼາຍຈະມີຮູບຮ່າງຮຽນແບບເຂົ້າໜົມ ຫຼື ໝາກໄມ້ ແລະ ມີກິ່ນຫອມ ເຊິ່ງກຳລັງເປັນເຄື່ອງຫຼິ້ນທີ່ໄດ້ຮັບຄວາມນິຍົມໃນຊ່ວງນີ້.
ພ້ອມດຽວກັນນັ້ນ, ກໍໄດ້ມີຜູ້ປົກຄອງອອກມາເວົ້າກ່ຽວກັບ ລູກຫຼານຂອງຕົນໄດ້ເກີດອາການຜິວໜັງອັກເສບ ຫຼັງຫຼິ້ນສະກຸດຊີ່. ນອກຈາກນີ້, ບາງຮ້ານຄ້າກໍໄດ້ຄຳນຶງເຖິງຄວາມສ່ຽງບໍ່ປອດໄພຕໍ່ເດັກນ້ອຍ ຈຶ່ງໄດ້ເລີ່ມງົດຂາຍສະກຸດຊີແລ້ວ.
ສະກຸດຊີ່ ທີ່ບໍ່ໄດ້ມາດຕະຖານສາມາດກະຕຸ້ນໃຫ້ເດັກນ້ອຍເກີດອາການແພ້ທາງຜິວໜັງ, ຜິວໜັງອັກເສບ ແລະ ລະບົບທາງເດີນຫາຍໃຈໄດ້.
ສະກຸດຊີ່ ເຮັດໃຫ້ເກີດອາການແພ້ ແລະ ຜິວໜັງອັກເສບໃນເດັກໄດ້ແນວໃດ?
- ນໍ້າຫອມສັງເຄາະ: ການໃສ່ກິ່ນຫອມ ຫຼື ກິ່ນໝາກໄມ້ເພື່ອປົກປິດກິ່ນສານເຄມີ ເຊິ່ງນໍ້າຫອມສັງເຄາະແມ່ນໜຶ່ງໃນສານກໍ່ອາການແພ້ຕໍ່ຜິວໜັງທີ່ພົບເຫັນໄດ້ເລື້ອຍໆໃນເດັກນ້ອຍ ເຮັດໃຫ້ເກີດມີຜື່ນແດງ ແລະ ຄັນ.
- ສີທາ ແລະ ສານລະລາຍຕົກຄ້າງ: ສີ ຫຼື ສານເຄມີເຄືອບທີ່ຍັງບໍ່ແຫ້ງດີ ສາມາດຍ່ອຍສະຫຼາຍໄດ້ ເມື່ອຖືກເຫື່ອ ແລະ ນໍ້າມັນຈາກຜິວໜັງ ເຮັດໃຫ້ເກີດຜິວໜັງອັກເສບຢູ່ບໍລິເວນມືໄດ້.
- ການລະຄາຍເຄືອງລະບົບທາງເດີນຫາຍໃຈ: ສະກຸດຊີ່ໃໝ່ແກະກ່ອງ ຈະປ່ອຍສານເຄມີລະເຫີຍງ່າຍ (VOCs) ອອກມາ ເຊິ່ງເປັນເອກະລັກສະເພາະຂອງ “ກິ່ນເຄື່ອງຫຼິ້ນໃໝ່”.
- ຄວາມໄວຕໍ່ການລະຄາຍເຄືອງຂອງທາງເດີນຫາຍໃຈ: ການສູບດົມສານເຄມີ VOCs ໃນປະລິມານຫຼາຍ ໂດຍສະເພາະໃນຫ້ອງອາກາດປິດ ຫຼື ເວລາເດັກນອນຫຼັບຂ້າງໆສະກຸດຊີ່ ອາດກະຕຸ້ນໃຫ້ເກີດການລະຄາຍເຄືອງຢູ່ຄໍ, ເຮັດໃຫ້ໄອ, ເຈັບຫົວ ຫຼື ສົ່ງຜົນໃຫ້ມີອາການຫອບຫືດ.
ຄໍາແນະນໍາເພື່ອຄວາມປອດໄພສໍາລັບການຫຼິ້ນສະກຸດຊີ່
- ແກະອອກມາຕາກອາກາດກ່ອນຫຼິ້ນ: ແກະສະກຸດຊີ່ອອກ ແລະ ນຳມາຕາກໄວ້ໃນບ່ອນທີ່ມີອາກາດຖ່າຍເທດີ ປະມານ 2-3 ມື້ ກ່ອນໃຫ້ເດັກນ້ອຍຫຼິ້ນ ເພື່ອຫຼຸດຜ່ອນກິ່ນສານເຄມີ
- ຫ້າມເອົາໄວ້ໃກ້ຕອນນອນ: ບໍ່ຄວນໃຫ້ເດັກນ້ອຍເອົາ ສະກຸດຊີ່ ໄປນອນກອດ ຫຼື ໄວ້ໃກ້ໝອນ ເພາະຈະເຮັດໃຫ້ສູດດົມສານລະເຫີຍເຂົ້າໄປຕະຫຼອດຄືນ.
- ເລືອກຊື້ແບຣນທີ່ມີມາດຕະຖານ: ເລືອກຊື້ຈາກແບຣນທີ່ໄວ້ໃຈໄດ້ ແລະ ມີເຄື່ອງໝາຍຮັບຮອງຄວາມປອດໄພ ເຊັ່ນ: CE, ASTM F963.
- ຫ້າມໃຫ້ຖືກຄວາມຮ້ອນ: ເຕືອນບໍ່ໃຫ້ເດັກນ້ອຍເອົາ ສະກຸດຊີ່ ເຂົ້າໄມໂຄຣເວບ ຫຼື ສະຖານທີ່ຮ້ອນເອົ້າ ເພາະຄວາມຮ້ອນຈະຍ່ອຍສະຫຼາຍພລາສຕິກ ແລະ ປ່ອຍອາຍເຄມີອັນຕະລາຍອອກມາ.
ແຫຼ່ງທີ່ມາ: ສະມາຄົມປົກປ້ອງຜູ້ຊົມໃຊ້