ເຈົ້າໜ້າທີ່ຕຳຫຼວດແຂວງຈຳປາສັກ ເປີດປະຕິບັດການຈູ່ໂຈມ ທະລາຍຮັງກຸ່ມແກ້ງສະແກມເມີ (Scammer) ທີ່ລັກລອບເຄື່ອນໄຫວອາດຊະຍາກຳທາງເທັກໂນໂລຢີ ສາມາດກັກຕົວຜູ້ຕ້ອງສົງໃສໄດ້ທັງໝົດ 50 ຄົນ ພ້ອມຂອງກາງເຄື່ອງຄອມພິວເຕີ ແລະ ໂທລະສັບມືຖືເປັນຈຳນວນຫຼວງຫຼາຍ.
ເຫດການດັ່ງກ່າວເກີດຂຶ້ນໃນວັນທີ 11 ມິຖຸນາ 2026 ເວລາ 09:30 ນາທີ, ພາຍຫຼັງທີ່ ພະແນກຕຳຫຼວດຄຸ້ມຄອງຄົນຕ່າງປະເທດ ຫ້ອງສັນຕິບານ ປກສ ແຂວງຈຳປາສັກ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ມີກຸ່ມຄົນຕ້ອງສົງໃສມີພຶດຕິກຳກໍ່ອາດຊະຍາກຳຜ່ານລະບົບຄອມພິວເຕີ (Cybercrime) ຢູ່ເຂດບ້ານຫົວແຊ, ເມືອງບາຈຽງຈະເລີນສຸກ.
ຈາກນັ້ນ, ເຈົ້າໜ້າທີ່ວິຊາສະເພາະ ຈຶ່ງໄດ້ຂໍທິດຊີ້ນຳຈາກຂັ້ນເທິງ ແລະ ຮີບຮ້ອນປະສານສົມທົບກັບ ກອງບັນຊາການ ປກສ ເມືອງບາຈຽງຈະເລີນສຸກ, ປກສ ຕາແສງສະໜາມໄຊ ແລະ ອຳນາດການປົກຄອງທ້ອງຖິ່ນ ເຂົ້າກວດກາເປົ້າໝາຍຢ່າງຮີບດ່ວນ ຢູ່ເຮືອນພັກແຫ່ງໜຶ່ງໃນເຂດດັ່ງກ່າວ.
ຜ່ານການປະຕິບັດການ ເຈົ້າໜ້າທີ່ສາມາດຄວບຄຸມຕົວຜູ້ຕ້ອງສົງໃສ ແລະ ຢຶດອຸປະກອນທີ່ໃຊ້ໃນການກະທຳຜິດໄດ້ດັ່ງນີ້:
ຜູ້ຕ້ອງສົງໃສທັງໝົດ: 50 ຄົນ
ສັນຊາດຈີນ: 48 ຄົນ
ສັນຊາດລາວ: 02 ຄົນ
ຂອງກາງທີ່ຢຶດໄດ້:
ຄອມພິວເຕີຕັ້ງໂຕະ: 32 ໜ່ວຍ
ໂທລະສັບມືຖື: 152 ເຄື່ອງ
ອຸປະກອນຮັບໃຊ້ອື່ນໆອີກຈຳນວນໜຶ່ງ
ປັດຈຸບັນ, ຜູ້ຕ້ອງສົງໃສພ້ອມຂອງກາງທັງໝົດ ແມ່ນຖືກຄວບຄຸມຕົວໄວ້ ເພື່ອດຳເນີນການສືບສວນ-ສອບສວນ ຢ່າງລະອຽດ ຈາກເຈົ້າໜ້າທີ່ວິຊາສະເພາະ ເພື່ອຂະຫຍາຍຜົນ ແລະ ດຳເນີນຄະດີຕາມຂັ້ນຕອນຂອງກົດໝາຍຕໍ່ໄປ.