ໂດຍປະຕິບັດຕາມທິດຊີ້ນໍາຂອງທ່ານລັດຖະມົນຕີ ກະຊວງປ້ອງກັນຄວາມສະຫງົບຢ່າງເຂັ້ມງວດ ແລະ ເດັດຂາດ ໃນການສຸມໃສ່ສະກັດກັ້ນ, ຕ້ານ ແລະ ແກ້ໄຂບັນຫາອາຊະຍາກຳທາງໂທລະຄົມ ຫຼື ອາຊະຍາກຳທາງລະບົບຄອມພິວເຕີ ກໍຄື ການປາບປາມພວກສໍ້ໂກງຊັບທາງໂທລະຄົມ ຫຼື ແກ້ງສະແກມເມີ.
ຄຽງຄູ່ກັນນັ້ນ, ເຈົ້າໜ້າທີ່ກົມຕຳຫຼວດເສດຖະກິດ ກໍໄດ້ຮັບແຈ້ງຈາກພົນລະເມືອງດີວ່າ: ມີກຸ່ມຄົນຕ່າງປະເທດໄດ້ເຊົ່າເຮືອນວິນລາໜຶ່ງຫຼັງ ແລະ ໃຫ້ຮູ້ອີກວ່າ: ພາຍໃນເຮືອນແມ່ນມີການເຄື່ອນໄຫວຕະຫຼອດ 24 ຊົ່ວໂມງ. ມາຮອດໃນວັນທີ 3 ມິຖຸນາ 2026 ເຈົ້າໜ້າທີ່ກົມຕຳຫຼວດເສດຖະກິດ ຈຶ່ງໄດ້ສົມທົບກັບເຈົ້າໜ້າທີ່ວິຊາສະເພາະກອງບັນຊາການປ້ອງກັນເຄື່ອນທີ່ ແລະ ພາກສ່ວນກ່ຽວຂ້ອງ ເຂົ້າກວດຄົ້ນເຮືອນທີ່ເປັນເປົ້າໝາຍ ໃນເຂດ ບ້ານຂຸດສາມບາດ ເມືອງໄຊທານີ ນະຄອນຫຼວງວຽງຈັນ ໃນນີ້ສາມາດຈັບຕົວພວກເຄື່ອນໄຫວສໍ້ໂກງຊັບທາງໂທລະຄົມ ຫຼື ແກ້ງສະແກມເມີ ເປັນຄົນສັນຊາດຈີນ ທັງໝົດຈໍານວນ 24 ຄົນ ແລະ ພົບເຫັນອຸປະກອນ ຄອມພິວເຕີ ຕັ້ງໂຕະ ແລະ ໂທລະສັບມືຖືຈໍານວນຫຼາຍເຄື່ອງ ທີ່ນໍາໃຊ້ເຂົ້າໃນການກະທຳຜິດ.
ປັດຈຸບັນ, ເຈົ້າໜ້າທີ່ພວມສືບສວນ-ສອບສວນ ຂະຫຍາຍຜົນຫາກຸ່ມແກ້ງຮ່ວມຂະບວນການ ແລະ ບຸກຄົນທີ່ມີສ່ວນກ່ຽວພົວພັນມາດໍາເນີນຕາມຂັ້ນຕອນຂອງກົດໝາຍ.
ຕໍ່ກັບເຫດການຄັ້ງນີ້, ກະຊວງປ້ອງກັນຄວາມສະຫງົບ ກໍຄືກົມໃຫຍ່ຕຳຫຼວດ ກົມຕຳຫຼວດເສດຖະກິດ ຮຽກຮ້ອງມາຍັງເຈົ້າຂອງເຄຫະສະຖານ ທີ່ໃຫ້ກຸ່ມຄົນບໍ່ຫວັງດີພັກເຊົາ ແລະ ທຸກຄົນໃນທົ່ວສັງຄົມ ຈົ່ງມີສະຕິ ແລະ ຍົກສູງຄວາມເປັນເຈົ້າການໃນການປາບປາມບັນຫາອາຊະຍາກຳຕ່າງໆ ທີ່ເກີດຂຶ້ນໃນສັງຄົມ ແລະ ຝາກເຖິງພໍ່-ແມ່ປະຊາຊົນ, ພໍ່ຄ້າ-ຊາວຂາຍ ນັບເຖິງພະນັກງານທຸກຄົນຫາກພົບເຫັນບຸກຄົນ ຫຼື ກຸ່ມຄົນທີ່ໜ້າສົງໄສ ແມ່ນໃຫ້ ແຈ້ງຕໍ່ກັບເຈົ້າໜ້າທີ່ຢ່າງຮີບດ່ວນ ຫຼື ສາມາດແຈ້ງມາຍັງເພຈ໌ເຟກບຸກ ກົມຕໍາຫຼວດເສດຖະກິດ ຂອງພວກເຮົາໄດ້ ເພື່ອປະກອບສ່ວນສະກັດກັ້ນ ປະກົດການຫຍໍ້ທໍ້ໃນສັງຄົມໃຫ້ນັບມື້ຫຼຸດໜ້ອຍຖອຍລົງ.
ແຫຼ່ງຂໍ້ມູນ: ຄວາມສະຫງົບ Lao Security News