ໃນວັນທີ 13 ພຶດສະພາ 2026 ຢູ່ດ່ານສາກົນບໍ່ເຕັນ ແຂວງຫຼວງນໍ້າທາ, ກົມຕໍາຫຼວດຄຸ້ມຄອງຄົນຕ່າງປະເທດ ກົມໃຫຍ່ສັນຕິບານ ກະຊວງ ປກສ ຮ່ວມກັບສູນຮ່ວມມືວຽກງານຕໍາຫຼວດລາວ-ຈີນ ໄດ້ມອບ-ຮັບຕົວພວກຖືກຫາທີ່ເປັນຄົນສັນຊາດຈີນ ຈໍານວນ 485 ຄົນ, ຍິງ 30 ຄົນ ກັບຄືນໄປດໍາເນີນຄະດີຕາມລະບຽບກົດໝາຍຢູ່ປະເທດຈີນ, ໃນຂໍ້ຫາກໍ່ອາຊະກໍາທາງລະບົບໂທລະຄົມ ຫລື ຄໍເຊັນເຕີ, ໃຫ້ບໍລິການການພະນັນອອນລາຍ, ເຂົ້າ-ອອກເມືອງຜິດກົດໝາຍ, ເຮັດວຽກບໍ່ຖືກເປົ້າໝາຍຕາມທີ່ທາງການກໍານົດ, ດຳເນີນທຸລະກິດ, ປະກອບອາຊີບໂດຍບໍ່ໄດ້ຮັບອະນຸຍາດ ແລະ ມີເຈດຕະນາລີ້ຊ່ອນຢູ່ ສປປ ລາວ.
ກຸ່ມແກ້ງດັ່ງກ່າວ, ຖືກກັກຕົວໃນວັນທີ 6 ພຶດສະພາ 2026 ຈາກເຫດການທີ່ເຈົ້າໜ້າທີ່ຕໍາຫຼວດກະຊວງປ້ອງກັນຄວາມສະຫງົບ ໄດ້ສົມທົບກັບກອງບັນຊາການ ປກສ ແຂວງສະຫວັນນະເຂດ ມ້າງກຸ່ມແກ້ງຄໍເຊັນເຕີຢູ່ 7 ຈຸດເປົ້າໝາຍ (ຣີສອດ, ໂຮງແຮມ ແລະ ເຮືອນພັກ) ຢູ່ແຂວງສະຫວັນນະເຂດ ຊຶ່ງພົບເຫັນຄົນຕ່າງປະເທດ 605 ຄົນ, ຍິງ 81 ຄົນ, ມີ 8 ສັນຊາດຄື: ສັນຊາດຈີນ, ໄທ, ກຳປູເຈຍ, ມຽນມາ, ຫວຽດນາມ, ໄຕ້ຫວັນ, ມາເລເຊຍ ແລະ ສັນຊາດເກົາຫລີ, ພ້ອມດ້ວຍເຄື່ອງຂອງກາງເພື່ອກໍ່ການກະທໍາຜິດຈໍານວນຫຼາຍລາຍການ.
ການມອບ-ຮັບແກ້ງຄໍເຊັນເຕີ ຄັ້ງນີ້ ແມ່ນປະຕິບັດຕາມກົດໝາຍວ່າດ້ວຍການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ ສະບັບເລກທີ 059/ສພຊ, ລົງວັນທີ 26 ທັນວາ 2014, ຂໍ້ຕົກລົງ ວ່າດ້ວຍການຮ່ວມມືສ້າງຕັ້ງສູນຮ່ວມມືວຽກງານຕໍາຫຼວດລາວ-ຈີນ ລະຫວ່າງ ກະຊວງປ້ອງກັນຄວາມສະຫງົບ ລາວ ແລະ ຈີນ ລົງວັນທີ 04 ທັນວາ 2020, ຕາມການປະສານສົມທົບເຮັດວຽກຕົວຈິງຮ່ວມກັບເຈົ້າໜ້າທີ່ຕໍາຫຼວດ ສປ ຈີນ ປະຈໍາຢູ່ສູນຮ່ວມມືລາວ-ຈີນ ແລະ ປະຕິບັດຕາມສັນຍາການຮ່ວມມືລະຫວ່າງລາວ-ຈີນ ໃນການແລກປ່ຽນຂໍ້ມູນຂ່າວສານ ແລະ ການສົ່ງຕົວຜູ້ຖືກຫາທີ່ເປັນຄົນຕ່າງປະເທດ (ໂດຍສະເພາະຄົນຈີນ) ກັບຄືນປະເທດ ເພື່ອດໍາເນີນຄະດີ ຫຼັງຈາກຖືກຈັບກຸມຢູ່ ສປປ ລາວ.
ແຫຼ່ງຂໍ້ມູນ: ກົມສື່ມວນຊົນ ປກສ