ໃນວັນທີ 11 ພຶດສະພາ 2026, ທ່ານ ປອ ອາລຸນໄຊ ສູນນະລາດ, ເລຂາພັກແຂວງ, ປະທານສະພາປະຊາຊົນແຂວງຈຳປາສັກ ໄດ້ລົງພື້ນທີ່ຕິດຕາມ ແລະ ຊີ້ນຳການກະກຽມສ້ອມແປງເສັ້ນທາງແຕ່ ດ່ານສາກົນໜອງນົກຂຽນ (ຝັ່ງລາວ) ຫາ ດ່ານສາກົນຕໍປຽງກຣຽນ (ຝັ່ງກຳປູເຈຍ).
ຈຸດສຳຄັນຂອງການປັບປຸງໃນຄັ້ງນີ້:
ທາງແຂວງຈຳປາສັກ ແລະ ແຂວງຊຽງແຕງ (ກຳປູເຈຍ) ໄດ້ເຫັນດີເປັນເອກະພາບໃນການປັບປຸງເສັ້ນທາງນີ້ ເພື່ອຜົນປະໂຫຍດຮ່ວມກັນ.ທ່ານເລຂາພັກແຂວງ ໄດ້ຊີ້ນຳໃຫ້ພາກສ່ວນກ່ຽວຂ້ອງ ປະສານງານກັບຄະນະກຳມະການຊາຍແດນສອງແຂວງ ເພື່ອສະເໜີຫາຂັ້ນສູນກາງໃນການປັບປຸງເຕັກນິກ. ໂດຍຈະເລີ່ມຈາກຈຸດບາລີແຢ ໄລຍະ 195 ແມັດ, ໂດຍຈະມີການປັບລະດັບດິນ, ການບົດອັດ ແລະ ໂຮຍຫີນ ເພື່ອໃຫ້ລົດສາມາດສັນຈອນໄດ້ສະດວກ.
ນອກຈາກການສ້ອມແປງເບື້ອງຕົ້ນແລ້ວ, ທ່ານເລຂາພັກແຂວງຍັງໄດ້ສະເໜີໃຫ້ຄົ້ນຄວ້າຄວາມເປັນໄປໄດ້ໃນການກໍ່ສ້າງເປັນ ທາງເບຕົງ ເພື່ອຄວາມຍືນຍົງໃນໄລຍະຍາວ. ໂດຍໃຫ້ພະແນກການຕ່າງປະເທດ ແລະ ຄະນະກຳມະການປົກຄອງແຂວງ ຮ່ວມກັບເບື້ອງກຳປູເຈຍ ເຮັດບົດບັນທຶກພາກສະໜາມໃຫ້ລະອຽດ ເພື່ອລາຍງານຕໍ່ຂັ້ນສູນກາງ.
ສຳລັບການກຳນົດສັນຍາລັກ ແລະ ການອອກແບບກໍ່ສ້າງ, ແມ່ນໃຫ້ເຊີນຄະນະຜູ້ແທນແຂວງຊຽງແຕງ ມາຮ່ວມປຶກສາຫາລື, ຄິດໄລ່ ແລະ ເອກະພາບກັນໃນດ້ານເຕັກນິກຕົວຈິງ ເພື່ອໃຫ້ສອດຄ່ອງກັບມາດຕະຖານຂອງທັງສອງປະເທດ.
ໃນໂອກາດດຽວກັນ, ທ່ານເລຂາພັກແຂວງ ພ້ອມຄະນະ ຍັງໄດ້ເຂົ້າຢ້ຽມຊົມ ສາງຄ່ຽນຖ່າຍສິນຄ້າ ຢູ່ບໍລິເວນດ່ານສາກົນໜອງນົກຂຽນ ເພື່ອຕິດຕາມຂັ້ນຕອນໃນການກໍ່ສ້າງ.
ການປັບປຸງເສັ້ນທາງນີ້ ຖືເປັນບາດກ້າວສຳຄັນໃນການຍົກລະດັບພື້ນຖານໂຄງລ່າງຂອງແຂວງຈຳປາສັກ ແລະ ເສີມສ້າງສາຍພົວພັນມິດຕະພາບລະຫວ່າງ ລາວ-ກຳປູເຈຍ ໃຫ້ແໜ້ນແຟ້ນຍິ່ງຂຶ້ນ.
ແຫຼ່ງຂໍ້ມູນ: ໜັງສືພິມຈຳປາໃໝ່ 𝐂𝐡𝐚𝐦𝐩𝐚𝐦𝐚𝐢 𝐍𝐞𝐰𝐬𝐩𝐚𝐩𝐞𝐫