ອີງຕາມແຈ້ງການຂອງ ກະຊວງປ້ອງກັນຄວາມສະຫງົບ ກົມໃຫຍ່ສັນຕິບານ ກົມຕໍາຫຼວດຄຸ້ມຄອງການທ່ອງທ່ຽວ ເລກທີ 1545/ກຄທ ນະຄອນຫຼວງວຽງຈັນ ລົງວັນທີ 12 ພຶດສະພາ 2026
ເຖິງ: ບັນດາຜູ້ປະກອບການຫົວໜ່ວຍທຸລະກິດບໍລິສັດທ່ອງທ່ຽວທີ່ນັບຖື.
ເລື່ອງ: ການປະກອບເອກະສານເພີ່ມເຕີມ ກ່ຽວກັບການຂໍອະນຸຍາດນໍາເຂົ້ານັກທ່ອງທ່ຽວ ເຂົ້າມາທ່ອງທ່ຽວ ສປປ ລາວ.
ເພື່ອເຮັດໃຫ້ການຈັດຕັ້ງປະຕິບັດວຽກງານປ້ອງກັນຄວາມສະຫງົບ ໃນຂົງເຂດການທ່ອງທ່ຽວຖືກຕ້ອງ, ສອດຄ່ອງ ຕາມທິດທາງນະໂຍບາຍຫັນປ່ຽນໃໝ່ຂອງລັດຖະບານ, ໂດຍການເຊື່ອມໂຍງຂໍ້ມູນການພັກເຊົາຂອງນັກ ທ່ອງທ່ຽວທີ່ເດີນທາງເຂົ້າມາທ່ອງທ່ຽວ ສປປ ລາວ ເຂົ້າໃນລະບົບທັນສະໄໝ, ແນໃສ່ເຮັດໃຫ້ຂົງເຂດ ການທ່ອງທ່ຽວມີຄວາມສະຫງົບ-ຄວາມປອດໄພ ສ້າງຄວາມປະທັບໃຈ ທັງເປັນການດຶງດູດນັກທ່ອງທ່ຽວເຂົ້າມາ ທ່ອງທ່ຽວ ສປປ ລາວ ນັບມື້ນັບຫຼາຍຂຶ້ນ.
ກົມຕໍາຫຼວດຄຸ້ມຄອງການທ່ອງທ່ຽວ ຂໍຖືເປັນກຽດແຈ້ງເພີ່ມເຕີມມາຍັງບັນດາຜູ້ປະກອບການຫົວໜ່ວຍທຸລະກິດບໍລິສັດທ່ອງທ່ຽວ ດັ່ງນີ້:
ການປະກອບເອກະສານນໍາເຂົ້ານັກທ່ອງທ່ຽວ ເຂົ້າມາທ່ອງທ່ຽວ ສປປ ລາວ ຕ້ອງໄດ້ຕິດຂັດໃບຢັ້ງຢືນການ ຈອງໂຮງແຮມ (Confirmed booking hotel) ຕາມລາຍການທ່ອງທ່ຽວ ນັບແຕ່ມື້ເຂົ້າມາຮອດ ແລະ ມື້ເດີນທາງອອກ ສ່ວນເອກະສານອື່ນທີ່ໄດ້ປະກອບຕິດຂັດໃນໄລຍະຜ່ານມາແມ່ນ ໃຫ້ປະຕິບັດຄືເກົ່າ.
ດັ່ງນັ້ນ, ກົມຕໍາຫຼວດຄຸ້ມຄອງການທ່ອງທ່ຽວ ຈຶ່ງອອກຫນັງສືແຈ້ງມາຍັງບັນດາຜູ້ປະກອບການ ບໍລິສັດທ່ອງທ່ຽວ ເພື່ອຊາບ ແລະ ຈັດຕັ້ງປະຕິບັດຢ່າງເຂັ້ມງວດ.
