ໃນຕອນບ່າຍວັນທີ 2 ມີນາ 2026 ທີ່ຫ້ອງວ່າການປົກຄອງນະຄອນຫຼວງວຽງຈັນ ທ່ານ ເຫຼັກໄຫຼ ສີວິໄລ ລັດຖະມົນຕີກະຊວງ ໂຍທາທິການແລະ ຂົນສົ່ງ ພ້ອມດ້ວຍຄະນະ ພົບປະ ປຶກສາຫາລືແລກປ່ຽນເຮັດວຽກຮ່ວມກັນ, ໂດຍການຕ້ອນຮັບຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ມີບັນດາທ່ານຮອງເຈົ້າຄອງ, ຫົວໜ້າກົມ, ຮອງກົມ, ພະແນກການ, ປະທານຄະນະກຳມະການປົກຄອງເມືອງ, ລັດວິສາຫະກິດນ້ຳປະປາ, ລັດວິສາຫະກິດລົດເມ, ລັດວິສາຫະກິດໄຟຟ້ານະຄອນຫຼວງ, ຫ້ອງການຄຸ້ມຄອງບໍລິການຕົວເມືອງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດພົບປະຄັ້ງນີ້ ກອງປະຊຸມໄດ້ແຈ້ງຈຸດປະສົງພ້ອມຍົກບັນຫາທີ່ກ່ຽວພັນຂະແໜງການຂົນສົ່ງ,ບັນຫາການສັນຈອນອັ່ງອໍໃນຕົວເມືອງ, ແກ້ໄຂບັນຫາອຸບັດຕິເຫດ, ແກ້ໄຂສ້ອມແປງເສັ້ນທາງໃນຕົວເມືອງ ແລະ ຊານເມືອງຂອງນຄອນຫຼວງວຽງຈັນ, ທີ່ຄ້າງຄາເພື່ອຊອກວິທີທາງແກ້ໄຂສະເພາະໜ້າແລະຍາວນານທີ່ເຫັນວ່າເປັນບັນຫາເຄັ່ງຮ້ອນ ແລະ ສັງຄົມໃຫ້ຄວາມສົນໃຈຫຼາຍໃນການແກ້ໄຂວຽກງານທີ່ຕິດພັນລະຫວ່າງກະຊວງ ໂຍທາທິການແລະ ຂົນສົ່ງ ແລະ ພະແນກໂຍທາທິການແລະ ຂົນສົ່ງນະຄອນຫຼວງວຽງຈັນໃຫ້ຮີບຮ້ອນຈັດຕັ້ງປະຕິບັດຄື:
ປັບປຸງແກ້ໄຂໂຄງສ້າງພື້ນຖານໂຄ່ງລ່າງ, ຄວາມພ້ອມທຸກຢ່າງໃຫ້ແທດເໝາະເພື່ອການທົດລອງແລ່ນລົດເມ BRT ຕາມສາຍທາງທີ່ໄດ້ກຳນົດໄວ້, ຄາດວ່າຈະເລີ່ມທົດລອງແລ່ນໃຫ້ປະຊາຊົນຊົມໃຊ້ອີກຄັ້ງ ໃນວັນທີ 10 ມີນາ 2026 ແລະ ມອບຮັບໂຄງການໄວໆນີ້.
ຄົ້ນຄ້ວາການແກ້ໄຂບັນຫານ້ຳປະປາທີ່ບໍ່ພຽງພໍຕາມຄວາມຕ້ອງການຂອງສັງຄົມໃນຕົວເມືອງແລະຊານເມືອງທົ່ວນະຄອນຫຼວງວຽງຈັນໃຫ້ໄດ້ຮັບການແກ້ໄຂໃຫ້ປະຊາຊົນໄດ້ຊົມໃຊ້ຢ່າງທົ່ວເຖິງ.
ການແກ້ໄຂສ້ອມແປງຕາບເສັ້ນທາງໃນຕົວເມືອງແລະຊານເມືອງໃຫ້ຂຶ້ນແຜນລະອຽດກຳນົດຈະແຈ້ງເພື່ອການສັນຈອນໃຫ້ມີຄວາມສະດວກວ່ອງໄວ ໄປມາປອດໄພ ແລະ ໄດ້ຮັບການແກ້ໄຂທັນເວລາ ແລະ ຍົກລະດັບເສັ້ນທາງປູຢາງໃນເຂດຊານເມືອງເຂົ້າບ້ານປະຊາຊົນໃນຕໍ່ໜ້າ.
ໃນກອງປະຊຸມຄັ້ງນີ້ເປັນໂອກາດດີທີ່ທັງສອງພາກສ່ວນຈະໄດ້ປຶກສາຫາລືເຮັດວຽກຮ່ວມກັນເຫັນໄດ້ບັນຫາທີ່ເກີດຂຶ້ນເພື່ອຊອກຫາວິທີທາງແກ້ໄຂໃຫ້ທັນກັບສະພາບຕົວຈິງໃນການພັດທະນາຕົວເມືອງນະຄອນຫຼວງວຽງຈັນໃຫ້ມີຄວາມສະອາດສວຍງາມ ໜ້າຢູ່ ເປັນສູນລວມທາງດ້ານເສດຖະກິດ-ສັງຄົມ, ວັດທະນະທຳ ແລະ ການທ່ອງທ່ຽວສ້າງນະຄອນຫຼວງວຽງຈັນໃຫ້ນັບມື້ເຕີບໃຫ່ຍເຂັ້ມແຂງໄປເລື້ອຍໆ.