ອີງຕາມການລາຍງານຂອງ ສະຖານທູດສະຫະລັດອາເມລິກາ ປະຈໍາ ນະຄອນຫຼວງວຽງຈັນ ໃນວັນທີ 26 ກຸມພາ 2026 ທີ່ຜ່ານມາ ກ່ຽວກັບການລົງທະບຽນເພື່ອເດີນທາງອອກນອກປະເທດອາເມລິກາ ຂອງຄົນທີ່ຢູ່ອາໄສຢ່າງຜິດກົດໝາຍ ໂດຍມີເນື້ອໃນລະບຸວ່າ
ສໍາລັບຄົນຕ່າງດ້າວທີ່ອາໄສຢູ່ສະຫະລັດອາເມລິກາຢ່າງຜິດກົດໝາຍ ແມ່ນສາມາດລົງທະບຽນເພື່ອເດີນທາງອອກນອກປະເທດໂດຍສະໝັກໃຈຜ່ານແອັບມືຖື CBP Home ຈະໄດ້ຮັບການເດີນທາງກັບປະເທດໂດຍບໍ່ເສຍຄ່າ, ພ້ອມຮັບເງິນໂບນັດຈໍານວນ 2,600 ໂດລາ ແລະ ຖືກຍົກເວັ້ນຄ່າປັບໄໝໃດໆກໍຕາມທີ່ເກີດຈາກການບໍ່ເດີນທາງອອກ. ພ້ອມທັງໄດ້ຮັບການຊ່ວຍເຫຼືອໃນການຈັດການການເດີນທາງອອກຢ່າງທ່ວງທັນເວລາ.
ແອັບມືຖື CBP Home ຊ່ວຍໃຫ້ຄົນຕ່າງດ້າວທີ່ຢູ່ຢ່າງຜິດກົດໝາຍສາມາດວາງແຜນການກັບປະເທດຂອງຕົນ, ລວມທັງມີໂອກາດໃນການເດີນທາງອອກຢ່າງທັນເວລາ, ເພື່ອໃຫ້ສາມາດຈັດການວຽກງານ, ການຮຽນ, ພາລະກິດສ່ວນຕົວໃຫ້ສໍາເລັດ ແລະ ຍັງຈັດກຽມການເດີນທາງໄດ້ຢ່າງເປັນລະບຽບ ແລະ ຖືກຕ້ອງຕາມກົດໝາຍນຳອີກ.
ເຊິ່ງໃນວັນທີ 23 ທັນວາ 2025 ທີ່ຜ່ານມາ, ທ່ານ ໂດນັລ ທຣຳ ປະທານາທິບໍດີ ສ.ອາເມລິກາ ໄດ້ປະກາດ ຂໍ້ສະເໜີ ຈ່າຍເງິນ ໃຫ້ຜູ້ອົບພະຍົບແບບຜິດກົດໝາຍ ປະມານ 3,000 ໂດລາສະຫະລັດ ພ້ອມກັບຄ່າປີ້ຍົນໃຫ້ ໂດຍບໍ່ເສຍຄ່າ(ຟຣີ) ຫາກຍິນຍອມ ເດີນທາງອອກຈາກ ສ.ອາເມລິກາ ໂດຍສະໝັກໃຈກ່ອນທ້າຍປີນີ້ ດ້ວຍວົງເງິນ 3,000 ໂດລາສະຫະລັດ ຈາກເມື່ອ ກ່ອນ 1,000 ໂດລາສະຫະລັດ ເພີ່ມຂຶ້ນເປັນ 3 ເທົ່າ ໂດຍຜູ້ເຂົ້າເມືອງ ທີ່ບໍ່ມີເອກະສານ ທີ່ລົງທະບຽນເພື່ອສົ່ງກັບຄືນປະເທດດ້ວຍຕົນເອງ ຜ່ານໃບສະໝັກຈະໄດ້ຮັບການຮັບຜິດຊອບ ໃນການຈັດການການເດີນທາງ ແລະ ຄ່າໃຊ້ຈ່າຍ ທັງໝົດໂດຍລັດຖະບານ ສະຫະລັດອາເມລິກາ ແລະ ພວກເຂົາ ຍັງຈະໄດ້ຮັບການຍົກເວັ້ນຄ່າປັບໄໝ ຫຼື ການລົງໂທດທາງແພ່ງ ສຳລັບ ການຢູ່ເກີນກຳນົດວີຊາ.
ແຫຼ່ງຂໍ້ມູນ: ເສດຖະກິດສັງຄົມ, ສະຖານທູດສະຫະລັດອາເມລິກາ