ລາຍງານຈາກສຳນັກຂ່າວປະເທດໄທ ເມື່ອບໍ່ດົນມານີ້, ເຈົ້າໜ້າທີ່ CIB ເຂົ້າກັກໂຕ ນາງ Sank ສັນຊາດມຽນມາ. ຢູ່ຕໍາບົນນາດີ, ອໍເພີສະມຸດສາຄອນ, ຈັງຫວັດສະມຸດສາຄອນ. ໂດຍສາມາດຍຶດສິນຄ້າພາຍໃນສາງຫຼາຍກວ່າ 200,000 ອັນ ປະກອບມີ: ຢາສະຜົມປອມ, ຄີມນວດປອມ, ຄີມອາບນໍ້າປອມ, ຢາສີຟັນປອມ ແລະ ອື່ນໆ. ຄະດີດັ່ງກ່າວເກີດຈາກຄຳຮ້ອງທຸກຂອງບັນດາຕົວແທນຈໍາໜ່າຍສິນຄ້າ ເພາະວ່າຜະລິດຕະພັນເຫຼົ່ານີ້ຖືກວາງຂາຍໃນລາຄາທີ່ຕໍ່າກວ່າລາຄາຕະຫຼາດ ເຮັດໃຫ້ສົ່ງຜົນກະທົບໃຫ້ແກ່ບັນດາຕົວແທນທີ່ຂາຍໃນລາຄາປົກກະຕິ.
ໃນເບື້ອງຕົ້ນ, ຜູ້ຕ້ອງສົງໄສໄດ້ຍອມຮັບວ່າ ເປັນເຈົ້າຂອງສິນຄ້າປອມ ໂດຍໄດ້ສົມຮູ້ຮ່ວມຄິດກັບຜົວຊາວຈີນ ເຈົ້າໜ້າທີ່ຈຶ່ງໄດ້ດຳເນີນຄະດີ ແລະ ຕັ້ງໃນຂໍ້ຫາຄື ຮ່ວມກັນຄອບຄອງສິນຄ້າປອມທີ່ມີເຄື່ອງໝາຍການຄ້າທີ່ຈົດທະບຽນໃນປະເທດໄທເພື່ອຂາຍ ແລະ ນຳໃຊ້ຊື່ ຫຼື ຂໍ້ຄວາມຂອງທຸລະກິດຂອງຄົນອື່ນເພື່ອຫຼອກລວງປະຊາຊົນ.
ຂໍເຕືອນສະຕິໃຫ້ທຸກທ່ານວ່າ ຢ່າເຫັນແກ່ຂອງຖືກ ແລະ ຄວນເລືອກຊື້ສິນຄ້ານໍາຮ້ານຄ້າ ຫຼື ນໍາຕົວແທນຈຳໜ່າຍທີ່ໜ້າເຊື່ອຖືເທົ່ານັ້ນ. ເພາະຖ້າຊື້ຖືກຂອງປອມ ໂດຍສະເພາະຜະລິດຕະພັນທີ່ຕ້ອງໃຊ້ກັບຮ່າງກາຍ ອາດຈະສົ່ງຜົນກະທົບຮ້າຍແຮງຕໍ່ສຸຂະພາບໄດ້.
ແຫຼ່ງຂໍ້ມູນ: ตำรวจสอบสวนกลาง