ໃນລະຫວ່າງວັນທີ 26–31 ມັງກອນ 2026 ຄະນະອາສາສະໝັກຊາວໜຸ່ມກາແດງ ສ.ເກົາຫຼີ ຈາກສອງແຂວງ ກວາງຈູ–ຈອງນຳ ໄດ້ລົງຈັດກິດຈະກຳອາສາສະໝັກຊ່ວຍເຫຼືອ ຢູ່ທີ່ໂຮງຮຽນປະຖົມຜາຕັ້ງ ແລະ ໂຮງຮຽນປະຖົມນ້ຳພາວ ເມືອງວັງວຽງ ແຂວງວຽງຈັນ ໂດຍໄດ້ຮັບການຕ້ອນຮັບຢ່າງອົບອຸ່ນຈາກອົງການກາແດງແຂວງວຽງຈັນ ພ້ອມດ້ວຍຄູ–ອາຈານ ແລະ ນ້ອງນັກຮຽນ.
ກິດຈະກຳດັ່ງກ່າວ ຈັດຂຶ້ນເພື່ອແລກປ່ຽນປະສົບການ ແລະ ສ້າງຄວາມສຳພັນອັນດີ ລະຫວ່າງອົງການກາແດງແຫ່ງຊາດລາວ ແລະ ກາແດງ ສ.ເກົາຫຼີ ພ້ອມທັງສົ່ງເສີມສະພາບແວດລ້ອມການຮຽນ–ການສອນໃຫ້ມີຄວາມປອດໄພ ແລະ ເໝາະສົມຍິ່ງຂຶ້ນ ໂດຍໄດ້ປັບປຸງເພດານ ປ່ຽນຫຼັງຄາ ທາສີອາຄານໂຮງຮຽນ ພ້ອມກັບແຈກຢາຍອຸປະກອນການຮຽນໃຫ້ນັກຮຽນ.
ນອກຈາກນັ້ນ ຍັງມີການສາທິດການປະຖົມພະຍາບານ ການສະແດງສິລະປະແລກປ່ຽນວັດທະນະທຳ ແລະ ພິທີບາສີສູ່ຂວັນ ເພື່ອສະທ້ອນເຖິງຄວາມຮັກແພງ ແລະ ຄວາມສາມັກຄີອັນດີງາມ ໂດຍມູນຄ່າການຊ່ວຍເຫຼືອຈາກກາແດງ ສ ເກົາຫຼີ ລວມ 14,038 ໂດລາສະຫະລັດ ຕາງໜ້າຄະນະອາສາສະໝັກກ່າວວ່າ ກິດຈະກຳນີ້ເຮັດໃຫ້ໄດ້ຮຽນຮູ້ ແລະ ເຂົ້າໃຈວັດທະນະທຳ ຮີດຄອງປະເພນີ ອາຫານການກິນ ພ້ອມທັງຮູ້ສຶກປະທັບໃຈກັບຄວາມອົບອຸ່ນ ແລະ ນໍ້າໃຈຂອງປະຊາຊົນລາວ.
ແຫຼ່ງຂໍ້ມູນ: ວຽງຈັນໃໝ່/VientianeMai