ແຫຼ່ງຂ່າວຈາກ ແຂວງອັດຕະປື ລາຍງານໃຫ້ຮູ້ວ່າ: ໃນໄລຍະ 1 ປີ ຜ່ານມາ, ແຂວງອັດຕະປື ໄດ້ດໍາເນີນກິດຈະກຳຢ່າງຕັ້ງໜ້າຕາມແຜນການເຮັດໃຫ້ວຽກງານສົ່ງເສີມການທ່ອງທ່ຽວ ມີຄວາມຄືບໜ້າຫຼາຍ ໂດຍສາມາດດຶງດູດນັກທ່ອງທ່ຽວໄດ້ 160,067 ຄົນ, ໃນນີ້ ນັກທ່ອງທ່ຽວພາຍໃນ 31,217 ຄົນ, ນັກທ່ອງທ່ຽວ ຊາຍແດນ 91,096 ຄົນ ແລະ ນັກທ່ອງທ່ຽວສາກົນ 37,754 ຄົນ, ທຽບໃສ່ແຜນການປະ ຕິບັດໄດ້ 113,84% ແລະ ສາມາດສ້າງລາຍຮັບໄດ້ 74 ຕື້ກີບ.
ທ່ານ ອ໋ອງຄຳ ຄູນສະໄໝ ຮອງຫົວໜ້າພະແນກ ວັດທະນະທຳ ແລະ ການທ່ອງທ່ຽວ ແຂວງອັດຕະປື ໄດ້ລາຍງານຕໍ່ກອງປະຊຸມສະຫຼຸບວຽກງານວັດທະນະທໍາ ແລະ ການທ່ອງທ່ຽວ ປະຈໍາປີ 2025 ແລະ ທິດທາງແຜນການປີ 2026 ເມື່ອບໍດົນຜ່ານມານີ້ວ່າ: ຕະຫຼອດໄລຍະ 1 ປີຜ່ານມາ ແຂວງອັດຕະປື ກໍ່ຄືພະແນກວັດທະນະທໍາ ແລະ ການທ່ອງທ່ຽວແຂວງ ໄດ້ສຸມໃສ່ພັດທະນາແຫຼ່ງທ່ອງທ່ຽວ, ໂດຍການສໍາຫຼວດຂຶ້ນບັນຊີແຫຼ່ງທ່ອງທ່ຽວໄດ້ທັງໝົດ 90 ແຫ່ງ,ທຽບໃສ່ແຜນການປະຕິບັດໄດ້ 100%, ສໍາຫຼວດ ແລະ ກໍານົດຂອບເຂດສໍາລັບໂຄງການຕ່າງໆ ເຊັ່ນ: ອ່າງນໍ້າເຂື່ອນເຊກະໝານ 1, ສວນອະນຸສອນສະຖານລົດຕັງປາງສົງຄາມ ເພື່ອກະກຽມການພັດທະນາໃນອະນາຄົດ ແລະ ໄດ້ລົງສໍາຫຼວດຖ້ຳພູແດງ, ເສັ້ນທາງໂຮ່ຈີ່ມິງ ລວມທັງການເປີດປະມູນການສໍາປະທານພັດທະນາແຫຼ່ງທ່ອງທ່ຽວຕາດແຊພະ ແລະ ຕາດແຊປ້ອງໄລ, ເອົາໃຈໃສ່ຄຸ້ມຄອງແຫຼ່ງທ່ອງທ່ຽວຢ່າງຕໍ່ເນື່ອງ, ໂດຍໄດ້ອອກໃບອະນຸຍາດໃໝ່ 2 ຫົວໜ່ວຍ ແລະ ສືບຕໍ່ໃບອະນຸຍາດ 13 ຫົວໜ່ວຍ, ໄດ້ສົມທົບກັບພາກສ່ວນທີ່ກ່ຽວຂ້ອງລົງຕິດຕາມ, ກວດກາ ແລະ ປະເມີນດ້ານມາດຕະຖານ ຂອງສະຖານບໍລິການເປີດໃໝ່ ກ່ອນອອກອະນຸຍາດດໍາເນີນທຸລະກິດທ່ອງທ່ຽວ 2 ຫົວໜ່ວຍ. ພ້ອມນີ້,ໄດ້ລົງຕິດຕາມກວດກາການບໍລິການ ແລະ ແກ້ໄຂຫົວໜ່ວຍທີ່ລະເມີດລະບຽບການ 2 ຫົວໜ່ວຍ ແລະ ໄດ້ອອກແຈ້ງການໃຫ້ຫົວໜ່ວຍທຸລະກິດ ປະຕິບັດຕາມໂມງເວລາເປີດ-ປິດຢ່າງເຂັ້ມງວດ.
ແຫຼ່ງຂໍ້ມູນ: ຂ່າວສານແຂວງອັດຕະປື