ການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V ທີ່ຈະຈັດຂຶ້ນໃນວັນທີ 22 ກຸມພາ 2026 ທີ່ມາເຖິງນີ້ ແມ່ນການເລືອກຕັ້ງທີ່ດໍາເນີນຂຶ້ນຢ່າງເປັນປະຊາທິປະໄຕ ໂດຍມີພັກປະຊາຊົນປະຕິວັດລາວ ເປັນແກນນຳ ເພື່ອເລືອກຕັ້ງບັນດາຜູ້ແທນປະຊາຊົນ ເຂົ້າໄປຈັດຕັ້ງປະຕິບັດໜ້າທີ່ໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ຜົນຂອງການເລືອກຕັ້ງ ຈະສະທ້ອນເຖິງຈິດໃຈອັນເປັນເອກະພາບຂອງປະຊາຊົນລາວບັນດາເຜົ່າ ແລະ ເປັນການຮັບປະກັນການປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງ, ແຜນນະໂຍບາຍ ຂອງພັກ, ລັດຖະທຳມະນູນ ແລະ ກົດໝາຍ ຂອງລັດ. ພັກ ແລະ ລັດ ຖືເປັນໜ້າທີ່ອັນສຳຄັນໃນການຊີ້ນຳ, ຊຸກຍູ້ ແລະ ຈັດຕັ້ງການເລືອກຕັ້ງໃຫ້ດຳເນີນໄປຢ່າງສະຫງົບສຸກ, ມີປະສິດທິຜົນ ແລະ ຖືກຕ້ອງຕາມກົດໝາຍ ແລະ ນິຕິກໍາຂອງຄະນະກໍາມະການເລືອກຕັ້ງລະດັບຊາດ.

ສຳລັບ ການກໍານົດເວລາປ່ອນບັດເລືອກຕັ້ງ ແມ່ນໃຫ້ເລີ່ມແຕ່ 07:00 ໂມງ ຫາ 17:00 ໂມງ, ຄະນະຮັບຜິດຊອບໜ່ວຍປ່ອນບັດເລືອກຕັ້ງຕົກລົງ ພິທີໄຂ ຫຼື ອັດ ໄວ ຫຼື ຊ້າກວ່າເວລາທີ່ໄດ້ກຳ ນົດໄວ້ນັ້ນກໍໄດ້ ໂດຍອີງໃສ່ສະພາບການຕົວຈິງຂອງແຕ່ລະບ່ອນ ແຕ່ບໍ່ໃຫ້ໄຂພິທີກ່ອນ 05:00 ໂມງ ແລະ ອັດພິທີຊ້າ ກວ່າ 18:00 ໂມງ.

ສ່ວນລະບຽບການປ່ອນບັດເລືອກຕັ້ງ,ສະຖານທີ່ປ່ອນບັດເລືອກຕັ້ງ ໃຫ້ຈັດໃສ່ບ່ອນທີ່ເຫັນວ່າ ເໝາະສົມ, ສະດວກດີ ແລະ ມີຄວາມປອດໄພ ເຊັ່ນ: ໂຮງຮຽນ, ສະໂມສອນ, ວັດ ຫຼື ສະຖານທີ່ອື່ນ ໂດຍຈັດເປັນຫ້ອງສະເພາະ ເພື່ອໃຫ້ຜູ້ປ່ອນບັດຂີດບັດລົງຄະແນນສຽງເລືອກຕັ້ງ; ການປ່ອນບັດເລືອກຕັ້ງສະມາຊິກສະພາ ໃນແຕ່ລະໜ່ວຍເລືອກຕັ້ງ ໃຫ້ມີສອງຫີບປ່ອນບັດ ຄື ຫີບປ່ອນບັດສະມາຊິກສະ ພາແຫ່ງຊາດ ແລະ ຫີບປ່ອນບັດສະມາຊິກສະພາປະຊາຊົນຂັ້ນແຂວງ ລາຍລະອຽດຈະມີຄະນະຮັບຜິດຊອບໜ່ວຍປ່ອນບັດເລືອກຕັ້ງແນະນໍາຢູ່ສະຖານທີ່ປ່ອນບັດ.

ສິດປ່ອນບັດເລືອກຕັ້ງ:

– ພົນລະເມືອງລາວ ອາຍຸ 18 ປີຂຶ້ນໄປ ມີສິດປ່ອນບັດ

– ຕ້ອງມີສຳມະໂນຄົວ ຫຼື ບັດປະຈຳຕົວ

ສິດສະໝັກຮັບເລືອກຕັ້ງ:

– ຕ້ອງເປັນພົນລະເມືອງລາວໂດຍກຳເນີດ

– ອາຍຸ 21 ປີຂຶ້ນໄປ

– ມີຄຸນສົມບັດຄົບຖ້ວນຕາມກົດໝາຍ

ຜູ້ທີ່ບໍ່ມີສິດ:

– ຜູ້ເປັນບ້າ, ເສຍຈິດ

– ຜູ້ຖືກສານຕັດສິນລົງໂທດຕັດອິດສະລະພາບ ແລະ ປົດສິດເລືອກຕັ້ງ

ການເລືອກຕັ້ງຄັ້ງນີ້ ແມ່ນສິດທິພື້ນຖານຂອງພວກເຮົາທຸກຄົນ ໃນການເລືອກຜູ້ແທນປະຊາຊົນ ທີ່ຈະໄປຮັບໃຊ້ປະເທດຊາດ ແລະ ພັດທະນາບ້ານເມືອງຂອງພວກເຮົາຕໍ່ໄປ.