ສຳນັກຂ່າວຕ່າງປະເທດ ລາຍງານໃນວັນຈັນທີ 26 ມັງກອນ 2026 ທີ່ຜ່ານມາວ່າ ຫຼາຍປະເທດໃນພາກພື້ນອາຊີເຊັ່ນ: ເນປານ, ໄທ, ໄຕ້ຫວັນ. ໄດ້ເລີ່ມນຳໃຊ້ມາດຕະການເຝົ້າລະວັງໄວຣັດນິປາ ຕາມສະໜາມບິນຕ່າງໆ ຫຼັງຈາກຢືນຢັນການພົບຜູ້ຕິດເຊື້ອ 5 ຄົນ ໃນລັດເບັງກອນຕາເວັນຕົກ ຂອງປະເທດອິນເດຍ.
ຈາກການລາຍງານຫຼ້າສຸດ ໃນລັດເບັງກອນຕາເວັນຕົກໃນປະເທດອິດເດຍ, ແມ່ນໄດ້ມີການກັກຕົວປະຊາຊົນກວ່າ 100 ຄົນ ຫຼັງຈາກພົບໄວຣັດໃນໂຮງໝໍ.
ສ່ວນໃນປະເທດໄທ ກະຊວງສາທາລະນະສຸກ ໄດ້ຍົກລະດັບການຄັດກອງສຸຂະພາບຕາມສະໜາມບິນຫຼັກ ສຳລັບຜູ້ໂດຍສານທີ່ເດີນທາງມາຈາກລັດເບັງກອນຕາເວັນຕົກ ໂດຍນຳເອົາເຕັກນິກຕ່າງໆ ທີ່ເຄີຍນຳໃຊ້ໃນຊ່ວງການລະບາດຂອງໂຄວິດ-19 ກັບມາໃຊ້ອີກຄັ້ງ.
ສ່ວນທາງປະເທດເນປານ ລັດຖະບານໄດ້ຍົກລະດັບການເຝົ້າລະວັງ ແລະ ເພີ່ມຄວາມເຂັ້ມງວດໃນການກວດຄັດກອງສຸຂະພາບ ພ້ອມທັງຕາມດ່ານຜ່ານແດນທາງບົກທີ່ສຳຄັນ ເຊິ່ງຕິດກັບປະເທດອິນເດຍ ເພື່ອພະຍາຍາມສະກັດກັ້ນ ບໍ່ໃຫ້ໄວຣັດເຂົ້າສູ່ປະເທດ.
ໃນຂະນະດຽວກັນ ທາງການສາທາລະນະສຸກຂອງໄຕ້ຫວັນ ກຳລັງວາງແຜນກຳນົດໃຫ້ການຕິດເຊື້ອໄວຣັດນິປາ ເປັນ ພະຍາດຕິດຕໍ່ທີ່ຕ້ອງແຈ້ງປະເພດທີ 5 ເຊິ່ງເປັນລະດັບການຈຳແນກສູງສຸດ ສຳລັບພະຍາດລະບາດໃໝ່ທີ່ມີຄວາມຮ້າຍແຮງ ຕາມກົດໝາຍທ້ອງຖິ່ນ.
ພະຍາດນິປາ ເປັນພະຍາດຕິດຕໍ່ຈາກສັດສູ່ຄົນ ແຜ່ກະຈາຍຈາກເຈຍທີ່ຕິດເຊື້ອມາສູ່ຄົນ ແລະ ຍັງສາມາດຕິດຕໍ່ຈາກຄົນສູ່ຄົນໄດ້ ຜ່ານການສຳຜັດ ຫຼື ໃກ້ຊິດ ແນວໃດກໍຕາມ ຜູ້ຊ່ຽວຊານຫຼາຍຄົນລະບຸວ່າ ຄວາມສ່ຽງທີ່ພະຍາດນີ້ຈະແຜ່ລະບາດໃນວົງກວ້າງນັ້ນ ຍັງຢູ່ໃນລະດັບຕ່ຳ.
ແຫຼ່ງຂໍ້ມູນ: ndependent, Lao Youth