ຕ້ອນຮັບຄະນະຜູ້ແທນນັກຂ່າວນັກໜັງສືພິມແຫ່ງປະເທດໄທ ທີ່ເດີນທາງມາຢ້ຽມຢາມ ແລະ ເຄື່ອນໄຫວເຮັດວຽກຢູ່ລາວ.
ໃນຕອນເຊົ້າຂອງວັນທີ 4 ທັນວາ 2025, ສຳນັກຂ່າວອອນລາຍລາວໂພສກໍຄືໃນນາມສະມາຄົມນັກຂ່າວແຫ່ງ ສປປ ລາວ ໄດ້ຕ້ອນຮັບຄະນະຜູ້ແທນຈາກ ສະມາຄົມນັກຂ່າວນັກໜັງສືພິມແຫ່ງປະເທດໄທ ທີ່ເດີນທາງມາຢ້ຽມຢາມ ແລະ ເຮັດວຽກຮ່ວມກັນຢ່າງເປັນທາງການ ຢູ່ສຳນັກງານ RDK Group.
ການມາຢ້ຽມຢາມຄັ້ງນີ້, ພວກເຮົາທັງສອງຝ່າຍໄດ້ໂອລົມຜ່ານຫົວຂໍ້ສຳຄັນຄື: ການແລກປ່ຽນຂໍ້ມູນຂ່າວສານ ແລະ ສະພາບສື່ໃນລາວ-ໄທ, ການຮ່ວມມືດ້ານການອົບຮົມ, ສຳມະນາ ແລະ ການພັດທະນາທັກສະນັກຂ່າວໃຫ້ມີຄວາມຮູ້ຄວາມສາມາດ, ການແບ່ງປັນບົດຮຽນດ້ານ New Media ແລະ ເຕັກໂນໂລຊີຂ່າວສານ ສຳລັບຫ້ອງຂ່າວສະໄໝໃໝ່, ການຮ່ວມມືກັນຕໍ່ຕ້ານ Fake News, Cyber Security, ແລະ ການໃຊ້ AI ໂດຍກຸ່ມອາຊະຍາກຳຂ້າມແດນ, ການປັບປຸງ ແລະ ເຜີຍແຜ່ຄູ່ມືສື່ ລາວ–ໄທ / ໄທ–ລາວ ໃນຮູບແບບ e-Book ແລະ ການຜະລິດແລະຫາແບບຢືນຢັນຮູບແບບທຸລະກິດໃໝ່ ສຳລັບອົງການຂ່າວໃນຍຸກດິຈິຕອນ.
ນອກຈາກນັ້ນ, ພວກເຮົາຍັງໄດ້ສົນທະນາຢ່າງເປີດເຜີຍກ່ຽວກັບບັນຫາສຳຄັນຂອງວົງການສື່ມວນຊົນໃນປັດຈຸບັນ. ອີກໜຶ່ງຢ່າງທີ່ສຳຄັນກໍຄືນັກຂ່າວຕ້ອງພັດທະນາຮູບແບບຂອງການເຮັດຂ່າວເພື່ອໃຫ້ຜູ້ອື່ນໄດ້ຮັບຂ່າວສານທີ່ເປັນໂຫຍດ ແລະ ທັນຍຸກທັນສະໄໝ.
ການພົບປະກັນໃນຄັ້ງນີ້ຖືວ່າເປັນບາດກ້າວອັນສຳຄັນໃນການເສີມສ້າງການຮ່ວມມືລາວ–ໄທ ແລະ ການພັດທະນາລະບົບຂ່າວສານທີ່ແຂງແຮງ ແລະ ມີຄຸນນະພາບສູງ ສຳລັບພາກພື້ນຂອງພວກເຮົາ.