ພົນລະເມືອງ ສ.ເກົາຫຼີ 64 ຄົນ ຖືກສົ່ງຕົວກັບປະເທດ ເນື່ອງຈາກເປັນເປັນຜູ້ຕ້ອງສົງໃສມີສ່ວນກ່ຽວຂ້ອງກັບແກ້ງຄໍເຊັນເຕີໃນປະເທດ ກຳປູເຈຍ.
ອີງຕາມສຳນັກຂ່າວ AFP ລາຍງານໃນວັນທີ 18 ຕຸລາ 2025 ຜ່ານມາ, ຈາກກໍລະນີປະຊາຊົນ ສ.ເກົາຫຼີ ຈຳນວນ 64 ຄົນຖືກກັກຕົວໃນປະເທດກຳປູເຈຍ ເນື່ອງຈາກເປັນກຸ່ມຄົນຕ້ອງສົງໃສວ່າມີສ່ວນກ່ຽວຂ້ອງກັບຂະບວນການສໍ້ໂກງທາງອອນລາຍ ແລະ ອາດຊະຍາກຳໄຊເບີຂ້າມຊາດ.
ຫຼ້າສຸດທາງການ ສ.ເກົາຫຼີ ໄດ້ສົ່ງເຮືອບິນໄປຮັບພົນລະເມືອງຈຳນວນ 64 ຄົນ ທີ່ຖືກກັກຕົວໃນປະເທດກຳປູເຈຍເປັນທີ່ຮຽບຮ້ອຍແລ້ວ ໂດຍເຈົ້າໜ້າທີ່ທາງການ ສ.ເກົາຫຼີ ເປີດເຜີຍວ່າ: ພົນລະເມືອງທັງໝົດ 64 ຄົນ ໄດ້ເດີນທາງຮອດສະໜາມບິນສາກົນອິນຊອນ ໃນຕອນເຊົ້າວັນເສົາ 18 ຕຸລາ 2025 ພາຍຫຼັງທີ່ລັດຖະບານ ສ.ເກົາຫຼີ ໄດ້ສົ່ງທີມເຈົ້າໜ້າທີ່ພິເສດເດີນທາງໄປກຳປູເຈຍ ໃນວັນພຸດທີ່ຜ່ານມາ ເພື່ອປຶກສາຫາລືກັບລັດຖະບານກຳປູເຈຍ ກ່ຽວກັບຄະດີການສໍ້ໂກງທາງອອນລາຍ ແລະ ສູນສະໜັກວຽກປອມ ເຊິ່ງມີການຕົວະຍົວະ ແລະ ກັງຂັງຊາວເກົາຫຼີເປັນຈຳນວນຫຼາຍ.
ລາຍງານຍັງລະບຸຕື່ມອີກວ່າ: ປະຊາຊົນຊາວ ສ.ເກົາຫຼີ ຈຳນວນໜຶ່ງໃນກຸ່ມທີ່ຖືກຄວບຄຸມຕົວ ອາດເປັນເຫຍື່ອທີ່ຖືກຕົວະຍົວະມາເຮັດວຽກໃນສູນການສໍ້ໂກງໂດຍທີ່ບໍ່ໄດ້ສະມັກໃຈ ຂະນະທີ່ບາງສ່ວນອາດຈະມີສ່ວນຮ່ວມໂດຍການສະມັກໃຈເພື່ອແລກປ່ຽນກັບຄ່າຕອບແທນທີ່ສູງ.
ປັດຈຸບັນຍັງມີປະຊາຊົນຊາວເກົາຫຼີອີກຈຳນວນຫຼາຍ ທີ່ຍັງເຮັດວຽກໃນເຄືອຂ່າຍຂອງແກ້ງສໍ້ໂກງທາງອອນລາຍ ຫຼື ແກ້ງຄໍເຊັນເຕີໃນກຳປູເຈຍ ເຊິ່ງສ່ວນໜຶ່ງຖືກບັງຄັບໃຫ້ເຮັດວຽກນຳໂດຍການຂູ່ທຳຮ້າຍຮ່າງກາຍ ຫຼື ກັກຂັງ ບາງກໍລະນີເຖິງຂັ້ນເສຍຊີວິດ.