ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ປະທານຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ໄດ້ລົງຊີ້ນຳວຽກງານ ຫ້ອງການ ຄະນະກຳມະການສົ່ງເສີມ ແລະ ຄຸ້ມຄອງການລົງທຶນ.
ໃນຕອນເຊົ້າຂອງ ວັນທີ 13 ຕຸລາ 2025, ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ປະທານຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ໄດ້ໃຫ້ກຽດໂອ້ລົມ ແລະ ຊີ້ນຳພະນັກງານຫຼັກແຫຼ່ງຂອງ ຫ້ອງການ ຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ຢູ່ ສຳນັກງານຂອງ ຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ຕັ້ງຢູ່ ບ້ານໂພນທັນ (ເຂດບຶງທາດຫຼວງ) ເມືອງໄຊເສດຖາ ນະຄອນຫຼວງວຽງຈັນ.
ຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ (ຄລທ) ເປັນກົງຈັກການຈັດຕັ້ງໃໝ່ ທີ່ໄດ້ຮັບການສ້າງຕັ້ງຂຶ້ນຕາມດຳລັດ ສະບັບເລກທີ 322/ນຍ, ລົງວັນທີ 17 ມິຖຸນາ 2025 ແລະ ດໍາລັດວ່າດ້ວຍ ການຈັດຕັ້ງ ແລະ ເຄື່ອນໄຫວຂອງ ຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ສະບັບເລກທີ 530/ນຍ, ລົງວັນທີ 11 ສິງຫາ 2025 ເພື່ອເປັນເສນາທິການໃຫ້ແກ່ລັດຖະບານ ໃນການສົ່ງເສີມ ແລະ ຄຸ້ມຄອງການລົງທຶນເອກະຊົນພາຍໃນ ແລະ ຕ່າງປະເທດ ໂດຍມີ ຫ້ອງການ ຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ເປັນກົງຈັກຊ່ວຍວຽກ.
ທ່ານ ບຸນເຖິງ ດວງສະຫວັນ, ຮອງລັດຖະມົນຕີ, ຮອງປະທານຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ, ຜູ້ປະຈຳການ ໄດ້ລາຍງານຜົນການຈັດຕັ້ງປະຕິບັດວຽກງານ ເຊິ່ງໄດ້ຍົກໃຫ້ເຫັນວ່າ: ຫ້ອງການ ຄະນະກຳມະການສົ່ງເສີມ ແລະ ຄຸ້ມຄອງການລົງທຶນ ໄດ້ເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະ ໄປຄຽງຄູກັບການປັບປຸງກົງຈັກການຈັດຕັ້ງ ແລະ ການຍົກຍ້າຍສຳນັກງານອົງການ ເຊິ່ງໃນໄລຍະເວລາ 3 ເດືອນກວ່າຜ່ານມາ ໄດ້ສືບຕໍ່ຈັດຕັ້ງປະຕິບັດວຽກງານຢ່າງເປັນປົກກະຕິ ໂດຍໄດ້ປັບປຸງກົນໄກໃນການຄົ້ນຄວ້າພິຈາລະນາອະນຸມັດການລົງທຶນໃຫ້ມີຄວາມກະທັດຮັດ, ໄດ້ສຳເລັດການເຊັນສັນຍາໂຄງການສຳປະທານຈຳນວນ 05 ໂຄງການ ລວມມູນຄ່າ 1 ຕື້ກວ່າໂດລາສະຫະລັດ, ໄດ້ຄົ້ນຄວ້າຕໍ່ອາຍຸສັນຍາ 10 ໂຄງການ, ແຈ້ງສິ້ນສຸດສັນຍາ 3 ໂຄງການ ແລະ ແຈ້ງເຕືອນໂຄງການທີ່ມີຂໍ້ບົກຜ່ອງຈຳນວນ 3 ໂຄງການ, ໄດ້ຄົ້ນຄວ້າການໃຫ້ນະໂຍບາຍສົ່ງເສີມການລົງທຶນ ໂດຍການອະນຸມັດແຜນນໍາເຂົ້າປະຈໍາປີ ຈໍານວນ 44 ບໍລິສັດ, ລວມມູນຄ່າ 1,5 ຕື້ໂດລາສະຫະລັດ ແລະ ເຄື່ອນໄຫວໂຄສະນະດຶງດູດການລົງທຶນທັງພາຍໃນ ແລະ ຕ່າງປະເທດ ເປັນຕົ້ນ ການຈັດສຳມະນາດຶງດູດການລົງທຶນ ຢູ່ ປະເທດຍີ່ປຸ່ນ, ສປ ຈີນ, ສະຫະລັດອາເມລິກາ ແລະ ມາເລເຊຍ.
ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ປະທານ ຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ໄດ້ຊີ້ນຳໃຫ້ພະນັກງານທັງໝົດເພີ່ມທະວີຄວາມຮັບຜິດຊອບໜ້າທີ່ການເມືອງຂອງຕົນ ໂດຍສະເພາະ ໃຫ້ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດ-ການລົງທຶນ, ປັບປຸງປະສິດທິຜົນຂອງການຕິດຕາມ-ກວດກາໂຄງການລົງທຶນ, ປັບປຸງແບບແຜນວິທິເຮັດວຽກ ໂດຍການຫັນເປັນທັນສະໄໝໃນວຽກງານວິຊາສະເພາະຢ່າງເປັນລະບົບຄົບຊຸດ, ປັບປຸງວຽກງານໂຄສະນາດຶງດູດການລົງທຶນໃຫ້ມີຈຸດສຸມ ແລະ ມີລັກສະນະທ່າບຸກຫຼາຍຂຶ້ນ, ທັງໝົດນີ້ກໍເພື່ອສ້າງເງື່ອນໄຂໃຫ້ ການລົງທຶນຂອງເອກະຊົນພາຍໃນ ແລະ ຕ່າງປະເທດ ປະກອບສ່ວນເປັນແຫຼ່ງທຶນສຳຄັນໃຫ້ແກ່ການພັດທະນາເສດຖະກິດ-ສັງຄົມຂອງປະເທດ.
ແຫຼ່ງຂ່າວ: investlaos.gov.la