ລັດຖະບານແຫ່ງ ສປປ ລາວ ມອບຫລຽນກາມິດຕະພາບໃຫ້ແກ່ ທ່ານ ນາງ ມໍລະກົດ ສີສະຫວັດ ເອກອັກຄະຣາຊະທູດແຫ່ງ ຣາຊະອານາຈັກໄທ
ໃນຕອນບ່າຍວັນທີ 8 ກັນຍາ 2025 ຢູ່ກະຊວງການຕ່າງປະເທດ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ນາງ ມໍລະກົດ ສີສະຫວັດ ເອກອັກຄະຣາຊະທູດ ແຫ່ງຣາຊະອານາຈັກໄທ ປະຈໍາ ສປປ ລາວ ແລະ ປະດັບຫລຽນກາມິດຕະພາບໃຫ້ທ່ານທູດ ໃນໂອກາດທີ່ສໍາເລັດການປະຕິ ບັດໜ້າທີ່ການທູດ ຢູ່ ສປປ ລາວ.
ໃນໂອກາດນີ້, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ໄດ້ສະແດງຄວາມຊົມເຊີຍຕໍ່ ທ່ານທູດ ມໍລະກົດ ສີສະຫວັດ ທີ່ໄດ້ສໍາເລັດໜ້າທີ່ການທູດ ຢູ່ ສປປ ລາວ ຕະຫລອດໄລຍະ 2 ປີ 9 ເດືອນ ຢ່າງສະຫງ່າງາມ ແລະ ມີຜົນສໍາເລັດສູງຫລາຍດ້ານ, ພິເສດ ທ່ານທູດໄດ້ປະກອບສ່ວນເຂົ້າໃນການຊຸກຍູ້ ການພົວພັນຮ່ວມມືຂອງສອງປະເທດ ເປັນຕົ້ນ ວຽກງານປະສານສົມທົບ ແລະ ຊຸກຍູ້ໃຫ້ມີການຢ້ຽມຢາມຂອງຄະນະຜູ້ແທນຂັ້ນສູງຂອງ ລາວ ແລະ ໄທ ລວມທັງບັນດາກົນໄກການຮ່ວມມືຕ່າງໆ ນັບແຕ່ສູນກາງຮອດທ້ອງຖິ່ນຢ່າງເປັນປົກກະຕິປະກອບ ສ່ວນຊຸກຍູ້ລັດຖະບານ ແຫ່ງ ຣາຊະອານາຈັກໄທ ໃນການສະໜັບສະໜູນຫລາຍໂຄງການ, ມີການດໍາເນີນງານຢ່າງຕັ້ງໜ້າ ແລະ ປະສົບຜົນສໍາເລັດ ເປັນຕົ້ນ ໂຄງການພັດທະນາພື້ນຖານໂຄງລ່າງ, ການເຊື່ອມໂຍງເຊື່ອມຈອດ, ການພັດທະນາບຸກຄະລາກອນ ແລະ ການສະໜັບສະໜູນວັດຖຸອຸປະ ກອນເຄື່ອງມືຕ່າງໆ ໃນຫລາຍຂະແໜງການ ເຊິ່ງເປັນການປະກອບສ່ວນສໍາຄັນເຂົ້າໃນການສ້າງຄວາມພ້ອມ ແລະ ສ້າງເງື່ອນໄຂອັນດີໃຫ້ແກ່ການພັດທະນາຂອງ ສປປ ລາວ.
ພ້ອມນີ້, ທ່ານ ນາງ ມໍລະກົດ ສີສະຫວັດ ຍັງໄດ້ມີຄວາມພະຍາຍາມໃນການໂຄສະນາເຜີຍແຜ່ ເພື່ອສົ່ົງເສີມການລົງທຶນ ພ້ອມທັງຈັດກິດຈະກໍາສໍາມະນາທາງທຸລະກິດ, ງານວາງສະແດງສິນຄ້າ ແລະ ບັນຍາຍໃນໂອກາດຕ່າງໆ ແນໃສ່ດຶງດູດການລົງທຶນຂອງໄທເຂົ້າມາໃນ ສປປ ລາວ ນັບມື້ນັບຫລາຍຂຶ້ນ.
ຍ້ອນເຫັນໄດ້ຜົນງານອັນໃຫຍ່ຫລວງ ແລະ ຜົນສໍາເລັດດັ່ງກ່າວ, ລັດຖະບານແຫ່ງ ສປປ ລາວ ຈຶ່ງເຫັນດີຕົກລົງມອບຫລຽນກາມິດຕະພາບໃຫ້ແກ່ ທ່ານ ນາງ ມໍລະກົດ ສີສະຫວັດ ເອກອັກຄະຣາຊະທູດແຫ່ງ ຣາຊະອານາຈັກໄທ ເພື່ອສະແດງຄວາມຍ້ອງຍໍຊົມເຊີຍ ແລະ ຈາລຶກຜົນງານຄຸນ ງາມຄວາມດີ ທີ່ທ່ານໄດ້ອຸທິດເຫື່ອແຮງ ແລະ ສະຕິປັນຍາ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງປະເທດ ລາວ ແລະ ໄທ ໃຫ້ມີບາດກ້າວຂະຫຍາຍ ຕົວ ແລະ ແໜ້ນແຟ້ນຍິ່ງໆຂຶ້ນຕະຫລອດການປະຕິບັດໜ້າທີ່ການທູດ ຢູ່ ສປປ ລາວ.
ໃນຂະນະດຽວກັນ, ທ່ານເອກອັກຄະຣາຊະທູດ ມໍລະກົດ ສີສະຫວັດ ກໍໄດ້ສະແດງຄວາມຂອບໃຈຢ່າງຈິງໃຈມາຍັງ ລັດຖະບານ ແລະ ປະຊາຊົນລາວ ໂດຍສະເພາະກະຊວງການຕ່າງປະເທດ ທີ່ໄດ້ອໍານວຍຄວາມສະດວກ ໃຫ້ແກ່ການເຄື່ອນໄຫວໜ້າທີ່ການທູດຂອງຕົນຢູ່ ສປປ ລາວ ຈົນມີຜົນສໍາເລັດຢ່າງຈົບງາມ, ພ້ອມທັງຢືນຢັນຈະສືບຕໍ່ ໃນການເປັນຂົວຕໍ່ປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ຂອງສອງປະເທດລາວ-ໄທ ໃຫ້ສືບຕໍ່ມີບາດກ້າວຂະຫຍາຍຕົວ ແລະ ແໜ້ນແຟ້ນຍິ່ງໆຂຶ້ນໃນອະນາຄົດ.
ແຫຼ່ງຂ່າວ: ກົມການຂ່າວ, ກະຊວງການຕ່າງປະເທດ