ສິງກະໂປເຂັ້ມງວດ ຈັດຢາສູບໄຟຟ້າ ຢູ່ໃນໝວດຢາເສບຕິດ ພ້ອມທັງຕັ້ງຄ່າປັບໄໝສູງສຸດ 2,000 ໂດລາ ຫຼື ປະມານ 45 ລ້ານກີບ
ສຳນັກຂ່າວຕ່າງປະເທດລາຍງານໃນວັນທີ 18 ສິງຫາ 2025 ຜ່ານມາ, ທ່ານ ລໍເຣນ ຫວ່ອງ ນາຍົກລັດຖະມົນຕີຂອງປະເທດສິງກະໂປ ກ່າວວ່າ: ຄົນທຸກຍຸກ ທຸກສະໄໝຕ່າງກັງວົນ ກ່ຽວກັບອິດທິພົນເຊິງລົບ ທີ່ສົ່ງຜົນກະທົບຕໍ່ຄົນລຸ້ນເຍົາວະຊົນຂອງຕົນ ແລະ ຄວາມສ່ຽງໃໝ່ໆທີ່ຈະເກີດຂຶ້ນ ແລະ ການສູບຢາສູບໄຟຟ້າ ຖືວ່າເປັນທີ່ໜ້າກັງວົນຢ່າງຍິ່ງ ເຊິ່ງຂະນະນີ້ລັດຖະບານສິງກະໂປ ກຳລັງຈະດຳເນີນການທີ່ເຂັ້ມງວດຍິ່ງຂຶ້ນ ໃນການຕໍ່ຕ້ານການສູບຢາສູບໄຟຟ້າ ແລະ ຈະຖືວ່າການສູບຢາສູບໄຟຟ້າເປັນບັນຫາຢາເສບຕິດ ພ້ອມທັງຈະຂຶ້ນບັນຊີວ່າຢາສູບໄຟຟ້າເປັນຢາເສບຕິດດ້ວຍ ພ້ອມທັງຈະມີບົດລົງໂທດທີ່ຮຸນແຮງຂຶ້ນ.
ຜູ້ນຳສິງກະໂອກ່າວຕື່ມອີກວ່າ: ຢາສູບໄຟຟ້າຫຼາຍຍີ່ຫໍ້ ມີສານເສບຕິດ ແລະ ອັນຕະລາຍປະສົມຢູ່ເຊັ່ນ: ເອໂທມິເດດ (Etomidate) ດັ່ງນັ້ນ, ຢາສູບໄຟຟ້າຈຶ່ງເປັນພຽງອຸປະກອນນຳສົ່ງ ເຊິ່ງສິ່ງທີ່ອັນຕະລາຍທີ່ແທ້ຈິງຄືສິ່ງຢູ່ຂ້າງໃນ ເຊິ່ງພາຍໃນອະນາຄົດມັນອາດຈະກາຍເປັນຢາທີ່ອັນຕະລາຍກວ່າເກົ່າກໍເປັນໄດ້.
ຢ່າງໃດກໍຕາມການສູບຢາສູບໄຟຟ້າຖືກຫ້າມໃນສິງກະໂປ ຕັ້ງແຕ່ປີ 2018 ແລະ ພາຍໃຕ້ກົດໝາຍປັດຈຸບັນການຄອບຄອງ ການໃຊ້ ຫຼື ການຊື້ຢາສູບໄຟຟ້າຈະມີໂທດປັບສູງສຸດ 2,000 ໂດລາ ຫຼື ປະມານ 45,000,000 ກີບ ແຕ່ທາງນາຍົກລັດຖະມົນຕີສິງກະໂປ ກ່າວເສີມວ່າ: ຄ່າປັບຈຳນວນມັນຍັງນ້ອຍ ເຊິ່ງເຮັດໃຫ້ຄົນບໍ່ຢ້ານ ແລະ ການທີ່ຈັດໃຫ້ຢາສູບໄຟຟ້າຢູ່ໃນໝວດຢາເສບຕິດ ຈະເຮັດໃຫ້ຄົນຢ້ານຂຶ້ນແນ່ນອນ.