ສືບຕໍ່ແກ້ໄຂຜົນກະທົບຈາກໂຄງການທາງລົດໄຟລາວ-ຈີນທີ່ຍັງບໍ່ທັນສໍາເລັດ 16 ໜ້າວຽກ
ໃນວາລະການດຳເນີນກອງປະຊຸມໃນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ IX ທ່ານ ງາມປະສົງ ເມືອງມະນີ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ຊີ້ແຈງຕໍ່ຄຳສັກຖາມຂອງສະມາຊິກສະພາແຫ່ງຊາດ (ສສຊ) ກ່ຽວກັບການແກ້ໄຂຜົນກະທົບຈາກໂຄງການລົດໄຟລາວ-ຈີນ ໂດຍໄດ້ສຸມໃສ່ແກ້ໄຂບັນຫາວຽກທີ່ຍັງຄົງຄ້າງຂອງໂຄງການກໍ່ສ້າງທາງລົດໄຟລາວ-ຈີນ ມີ 66 ໜ້າວຽກ ແກ້ໄຂສໍາເລັດແລ້ວ 50 ໜ້າວຽກ ແລະ ຍັງບໍ່ທັນສໍາເລັດ 16 ໜ້າວຽກ ແລະ ຕ້ອງໄດ້ສືບຕໍ່ແກ້ໄຂໃນນັ້ນພາກສ່ວນກ່ຽວຂ້ອງລັດເປັນເຈົ້າການ 3 ວຽກ ແລະ ບໍລິສັດທາງລົດໄຟ ລາວ-ຈີນ ເປັນເຈົ້າການ 13 ວຽກ ໃນນີ້ບັນຫາການຊົດເຊີຍເວນຄືນທີ່ດິນປະຊາຊົນຈຳນວນໜຶ່ງທີ່ບໍ່ຍອມຮັບເອົາຄ່າຊົດເຊີຍຢູ່ແຂວງ (ແຂວງຫຼວງນໍ້າທາ ອຸດົມໄຊ ແຂວງວຽງຈັນ ແລະ ນະຄອນຫຼວງວຽງຈັນ) ລວມມີ 307 ຕອນດິນ ໃນນີ້ ຢູ່ນະຄອນຫຼວງວຽງຈັນ 279 ຕອນດິນສາເຫດແມ່ນບາງຄອບຄົວບໍ່ຍອມຮັບລາຄາຫົວໜ່ວຍການຊົດເຊີຍ ຫຼື ບໍ່ມາພົວພັນຮ່ວມ ເຮັດວຽກໃນການປະກອບເອກະສານໃນການຮັບເອົາເງິນຄາຊົດເຊີຍ ແລະ ບາງຕອນດິນບໍ່ສາມາດຕິດຕໍ່ ພົວພັນເຈົ້າຂອງດິນໄດ້.
ການແກ້ໄຂບັນຫາຜົນກະທົບຈາກໂຄງການກໍ່ສ້າງທາງລົດໄຟລາວ-ຈີນ ຕໍ່ເສັ້ນທາງຫຼວງແຫ່ງຊາດ ທາງຫຼວງແຂວງ ທາງຫຼວງທ້ອງຖິ່ນ ທາງເຂົ້າສູ່ການຜະລິດ ແລະ ຜົນກະທົບຕໍ່ສິ່ງແວດລ້ອມ ແລະ ສັງຄົມຕາມແລວທາງລົດໄຟໄລຍະຜ່ານມາແມ່ນໄດ້ສົມທົບກັບພາກສ່ວນທີ່ກ່ຽວຂ້ອງໃນການແກ້ໄຂບັນຫາດັ່ງກ່າວຫຼາຍຄັ້ງແຕ່ຍັງບໍ່ທັນສໍາເລັດ ຕໍ່ກັບການແກ້ໄຂບັນຫາດັ່ງກ່າວໃຫ້ສຳເລັດກະຊວງ ຍທຂ ໄດ້ແຕ່ງຕັ້ງຄະນະແກ້ໄຂຂໍ້ຄົງຄ້າງ 5 ຝ່າຍ ໂດຍມີກະຊວງ ຍທຂ ສະຖານທູດ ສປ ຈີນ ປະຈໍາລາວ ຄະນະກຳມະການຮ່ວມມື ລາວ-ຈີນ ອົງການກວດກາແຫ່ງລັດ ແລະ ບໍລິສັດທາງລົດໄຟລາວ-ຈີນ ສັງລວມແລ້ວມີ 122 ບັນຫາສາມາດແກ້ໄຂໄດ້ແລ້ວ 70 ບັນຫາ ຍັງ 52 ບັນຫາບໍ່ໄດ້ຮັບການແກ້ໄຂ ຊຶ່ງບັນຫາທີ່ຍັງບໍ່ໄດ້ຮັບການແກ້ໄຂນີ້ພາກລັດທີ່ກ່ຽວຂ້ອງ ແລະ ບໍລິສັດທາງລົດໄຟລາວ-ຈີນຈະຕ້ອງໄດ້ສົມທົບກັນແກ້ໄຂ.
ສາເຫດທີ່ຍັງຄົງຄ້າງຍ້ອນຕິດພັນກັບຫຼາຍພາກສ່ວນທັງສູນກາງ ແລະ ທ້ອງຖິ່ນຈຶ່ງພາໃຫ້ມີຄວາມຫຼ້າຊ້າ ຍ້ອນການອອກແບບ ການກໍ່ສ້າງທາງລອດທາງລົດໄຟ ທາງລົດໄຟຕັດກັບທາງຫຼວງແຫ່ງຊາດ ທາງຫຼວງທ້ອງຖິ່ນ ທາງເວັ້ນ ທາງໄປສູ່ເຂດການຜະລິດຂອງປະຊາຊົນ ຮ່ອງລະບາຍນໍ້າມີຫຼາຍບ່ອນບໍ່ໄດ້ຕາມມາດຖານເຕັກນິກ ແລະ ບໍ່ຖືກກັບສະພາບແວດລ້ອມຕົວຈິງຍາມຝົນຕົກເກີດມີສະພາບນໍ້າຖ້ວມ ນໍ້າອັ່ງເຮັດໃຫ້ການໄປມາຂອງພາຫະນະ ແລະ ປະຊາຊົນພົບຄວາມຫຍຸ້ງຍາກ ຍ້ອນປະຊາຊົນຈໍານວນໜຶ່ງ ບໍ່ຍອມຮັບເອົາລາຄາຫົວໜ່ວຍຊົດເຊີຍ ຫຼື ບໍ່ສາມາດພົວພັນກັບເຈົ້າຂອງຕອນດິນທີ່ຖືກຜົນກະທົບໄດ້ຈຶ່ງເຮັດໃຫ້ການຊົດເຊີຍບໍ່ທັນສຳເລັດ ຍ້ອນບໍລິສັດຜູ້ຮັບເໝົາກໍ່ສ້າງບໍ່ເປັນເຈົ້າການແກ້ໄຂຢ່າງຈິງຈັງໃນການແກ້ໄຂແຕ່ຫົວທີຈຶ່ງເຮັດໃຫ້ບັນຫາບໍ່ໄດ້ຮັບການແກ້ໄຂຜົນກະທົບແກ່ຍາວ ແລະ ບໍ່ສໍາເລັດຕາມແຜນການ.
ແຫຼ່ງຂ່າວ: ວຽງຈັນໃໝ່