- ຊີວິດເໝືອນດັ່ງວັງແມ່ນ້ຳ …………. ນະທີໃຫຍ່ວາລີໃສ
ໄຫຼຈາກຈອມພູຜາ…………………………… ປ່າພະນອມແນວໄມ້
ພັດຜ່ານເຫວດອນແກ້ງ……………………… ລໍາທານຫ້ວຍໃຫຍ່
ລົງສູ່ພາຍພາກພື້ນ…………………………… ສະໝຸດກວ້າງລ່ວງກະແສ.
- ຊີວິດຄົນກໍ່ປຸນປານປຽບໄດ້…………. ທຽມທຽບທະເລຫຼວງ
ມີສາຂາລຳທານ……………………………… ລ່ອງໄຫຼໂຮມເຕົ້າ
ຈິ່ງໄດ້ໂຮມກັນເຂົ້າ……………………………. ເປັນວັງເວີນກວ້າງໃຫຍ່
ໃຫ້ປະຊາຮ່ວມໃຊ້…………………………….. ສົງລ້າງອາບສະບາຍ.
- ຊີວິດຄົນຈະມີຄ່າໄດ້………………… ສະເໝີດັ່ງທາລາບໍ່ນໍ ?
ຫາກບໍ່ພັດທະນາຕົນ…………………………. ສູ້ທົນງານໄດ້
ໃຈເຂັ້ມແຂງອາສາສູ້………………………….. ບຸກບືນຍາມຍາກ
ແສນລ້ຳບາກອ່ອນລ້າ………………………… ເດີນໜ້າບໍ່ຖອຍ.
- ວຽກງານໃຫຍ່ແລະນ້ອຍ……………. ບໍ່ເຄີຍລ່ອຍລະອາໃຈ
ແນວໃດດີເຝິກຝົນ…………………………….. ຮ່ຳຮຽນເອົາຈົນໄດ້
ຍາມເມື່ອມານຳໃຊ້……………………………. ວິຊາການທຸກຢ່າງ
ປະກອບສ່ວນກໍ່ສ້າງ………………………….. ພຽງພ້ອມເພື່ອນສະຫາຍ.
- ໃຜຜູ້ເຮັດດັ່ງນີ້ໄດ້……………………. ຊິເສີມຄ່າຂອງຊີວິດ ເຮົາໄດ໋ !
ເຮັດໃຫ້ເຖິງຫຼັກໄຊ……………………………. ທີ່ຕົນວາງໄວ້
ທັງຈະເປັນບັນໄດໃຫ້…………………………. ອະນຸຊົນທຽວໄຕ່
ໄຝ່ສຶກສາຮ່ຳຮູ້………………………………… ດູໄວ້ດັ່ງແວ່ນໃຈ.
- ດັ່ງນັ້ນ ຈິງຈະປຸນປຽບໄດ້…………… ແມ່ນ້ຳໃຫຍ່ສົມຈິງ
ແຕ່ຕ້ອງລົງມືທຳ……………………………… ຈິ່ງຈະສົມມະໂນເຈົ້າ
ມີແຕ່ວາຈາເວົ້າ……………………………….. ຊິເອົາຫຍັງມາອ້າງເອກ
ຫຼື ຈະເສກແຕ່ງປັ້ນ…………………………… ປະສິດໄດ້ດັ່ງໃຈ ຊັ້ນບໍ ?.
- ຢາກໃຫ້ຊີວິດມີຄ່າລ້ຳ………………. ຕ້ອງຮີບເລັ່ງເສີມຂະຫຍາຍ
ສ້າງຜົນງານປະຈັກຕາ………………………. ສູ່ປະຊາຊາວເຊື້ອ
ຢ່າມີໃຈຊຳເຮື້ອ……………………………….. ແນວນາມມັກງ່າຍ
ພາຍລຸນມາຊິອ່າວໂອ້………………………… ຄະນິງເບື້ອງບ່ອນຫຼັງ ແທ້ໄດ໋ !
ຂອບໃຈບົດຄວາມດີໆ ຈາກ: ໃຕ້ຟ້າສີຄາມ