ຄວາມຄືບໜ້າການບູລະນະ ເຮືອນພັກຂອງທ່ານ ໜູຮັກ ພູມສະຫວັນ ອະດີດການນໍາຂັ້ນສູງແຫ່ງ ສປປ ລາວ
ວັນທີ 5 ພຶດສະພາ 2025 ຜ່ານມາ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ພ້ອມດ້ວຍຄະນະການນໍາຂອງແຂວງໄດ້ເຄື່ອນໄຫວຕິດຕາມກວດກາການບູລະນະ ເຮືອນພັກຂອງທ່ານ ໜູຮັກ ພູມສະຫວັນ ອະດີດການນໍາຂັ້ນສູງແຫ່ງ ສປປ ລາວ ທີ່ ບ້ານໜອງປີງ ເມືອງບົວລະພາ.
ເພື່ອກວດກາຄວາມຄືບໜ້າການບູລະນະ ເຮືອນພັກອະດີດການນໍາຂັ້ນສູງຂອງລາວ ທີ່ເຄິຍເຄື່ອນໄຫວປະຕິວັດ ໄລຍະຕໍ່ສູ້ກູ້ຊາດໃນເມື່ອກ່ອນ ໃຫ້ຄົງໄວ້ເປັນອະນຸສອນຕະຫຼອດໄປ, ໂດຍແຂວງໄດ້ມອບງົບປະມານຈໍານວນໜຶ່ງໃຫ້ເມືອງບົວລະພາ ໃນການຈັດຕັ້ງປະຕິບັດ ເພື່ອປັບປຸງປົວແປງຄືນໃໝ່ ໂດຍສະເພາະແມ່ນໂຄງສ້າງຫຼັງຄາ ແລະ ພື້ນຖານໂຄງລ່າງພາຍໃນຂອງເຮືອນພັກ, ໃນການລົງຕິດຕາມກວດກາຄັ້ງນີ້ ເຈົ້າແຂວງຄໍາມ່ວນ ຍັງໄດ້ຊີ້ນໍາ ມາຍັງພາກສ່ວນກ່ຽວຂ້ອງຂັ້ນເມືອງ ສືບຕໍ່ເອົາໃຈໃສ່ເພື່ອປັບປຸງສະພາບແວດລ້ອມ ບໍລິເວນອ້ອມຂ້າງເຮືອນ, ພ້ອມທັງ ກໍານົດຂອບເຂດເນື້ອທີ່ ເພື່ອອອກໃບຕາດິນ ແລະ ສ້າງກຳແພງ ອື່ນໆ ໃຫ້ມີຄວາມສົມບູນຂຶ້ນຕື່ມ.
ໂອກາດດັ່ງກ່າວຍັງໄດ້ເຄຶ່ອນໄຫວເບິ່ງເສັ້ນທາງຕາມການສະເໜີຂອງເມືອງ ເພື່ອສ້ອມແປງປັບປຸງຍົກລະດັບເປັນທາງດິນແດງໃຫ້ສາມາດທ່ຽວໄປ-ມາໄດ້ສະດວກ, ແຕ່ບ້ານຫຍ້າແວດ ຫາ ບ້ານທາງແບ່ງນໍ້າຈາຫຼາ ທີ່ມີລວງຍາວປະມານ 35 ກິໂລແມັດ.
ແຫຼ່ງຂ່າວ: Khammouane News