ກອງບັນຊາການ ປກສ ແຂວງບໍ່ແກ້ວ ຍຶດຂອງກາງ ຢາບ້າຈຳນວນ 101 ເປົາ ເທົ່າກັບ 20.200.000 ເມັດ, ນໍ້າໜັກ 2.020 ກິໂລກຼາມ.
ໃນຄັ້ງວັນທີ 21 ເມສາ 2025 ນີ້, ເຈົ້າໜ້າທີ່ຕໍາຫຼວດປະຈໍາຈຸດກວດການໍ້າເກິ່ງ ເມືອງຕົ້ນເຜິ້ງ ໄດ້ເຮັດວຽກກວດກາລົດເປັນປົກກະຕິ ຈົນມາຮອດເວລາປະມານ 06 ໂມງ 30 ນາທີ ໄດ້ມີລົດບັນທຸກສິບລໍ້, ສີຂາວ, ຍີ່ຫໍ້ HOWO ຂັບຂີ່ລົດມາແຕ່ທາງຕົ້ນເຜິ້ງ ພໍມາຮອດຈຸດກວດກາ ທາງເຈົ້າໜ້າທີ່ໄດ້ໃຫ້ສັນຍານຈອດລົດ ເພື່ອຂໍອະນຸຍາດກວດກາ ແຕ່ຜູ້ຂັບຂີ່ບໍ່ຍອມຈອດ ແລ້ວຂັບຂີ່ຜ່ານດ່ານ.
ດັ່ງນັ້ນ, ທາງເຈົ້າໜ້າທີ່ຈຶ່ງໄດ້ຕິດຕາມໄປ ໄດ້ພົບເຫັນລົດຄັນດັ່ງກ່າວ ຈອດໄວ້ຂ້າງທາງ ຫ່າງຈາກຈຸດກວດກາປະມານ 300 ແມັດ ທາງເຈົ້າໜ້າທີ່ຈຶ່ງເຂົ້າໄປກວດກາ ແລ້ວພົບເຫັນວ່າລົດຄັນດັ່ງກ່າວແມ່ນບັນທຸກຢາເສບຕິດ ແຕ່ບໍ່ພົບເຫັນຜູ້ຂັບຂີ່. ຈາກນັ້ນ, ຈຶ່ງໄດ້ນຳເອົາລົດຄັນດັ່ງກ່າວໄປກວດຄົ້ນຢູ່ກອງບັນຊາການ ປກສ ແຂວງ ບໍ່ແກ້ວ ຈຶ່ງພົບເຫັນຢາບ້າຈຳນວນ 101 ເປົາ ເທົ່າກັບ 20.200.000 ເມັດ, ນໍ້າໜັກ 2.020 ກິໂລກຼາມ ສ່ວນຜູ້ຂັບຂີ່ລົດຄັນດັ່ງກ່າວແມ່ນໄດ້ເອົາຕົວຫຼົບໜີ ປັດຈຸບັນທາງເຈົ້າໜ້າທີ່ວິຊາສະເພາະຂອງພວກເຮົາພວມດຳເນີນການສືບຄົ້ນຫາຕົວຜູ້ກ່ຽວ ມາສືບສວນ-ສອບສວນຂະຫຍາຍຜົນຫາກຸ່ມແກ້ງ ເຄືອຂ່າຍລາຍນີ້ມາດໍາເນີນຄະດີຕາມລະບຽບກົດໝາຍຕໍ່ໄປ.
ຂ່າວ: ປກສ ແຂວງບໍ່ແກ້ວ