ເສຍຊີວິດ 26 ຄົນ ຈາກອຸບັດຕິເຫດທີ່ເກີດຂຶ້ນທົ່ວປະເທດ 313 ຄັ້ງ ໃນໄລຍະບຸນປີໃໝ່ລາວ 2025.

ພັອ ແກ້ວມາລາ ແສງທອງ ຮອງຫົວໜ້າກົມຕຳຫຼວດຈະລາຈອນ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ໄດ້ຖະແຫຼງຕໍ່ສື່ມວນຊົນ ປກສ ກ່ຽວກັບການຈັດຕັ້ງປະຕິບັດວຽກງານປ້ອງກັນ, ສະກັດກັ້ນອຸບັດຕິເຫດຈະລາຈອນທາງບົກ ໄລຍະການສະເຫຼີມສະຫຼອງປີໃໝ່ລາວ 2568 ຂອງກໍາລັງຕໍາຫຼວດຈະລາຈອນ ທົ່ວປະເທດ ໄລຍະ 7 ວັນອັນຕະລາຍ ລະຫວ່າງວັນທີ 11-17​ ເມສາ 2025 ມີອຸບັດຕິເຫດເກີດຂຶ້ນ 313 ຄັ້ງ ທຽບໃສ່ໄລຍະດຽວກັນໃນປີ 2024 ຫຼຸດລົງ 3 ຄັ້ງ ເສຍຊີວິດ 26 ຄົນ ຫຼຸດລົງ 7 ຄົນ.

ທ່ານຍັງໄດ້ກ່າວຕື່ມວ່າ: ເຖິງວ່າກຳລັງຕຳຫຼວດຈະລາຈອນທົ່ວປະເທດ ຈະເອົາໃຈໃສ່ປະຕິບັດໜ້າທີ່ຢ່າງເຂັ້ມງວດແລ້ວກໍຕາມ ແຕ່ກໍຍັງມີອຸບັດຕິເຫດເກີດຂຶ້ນ ເນື່ອງຈາກວ່າຜູ້ຂັບຂີ່ຈຳນວນໜຶ່ງຍັງມີການລະເມີດກົດຈະລາຈອນ ເຮັດໃຫ້ເປັນສາເຫດຂອງການເກີດອຸບັດເຫດ.

ແຂວງທີ່ເກີດອຸບັດຕິເຫດຫຼາຍແມ່ນ ແຂວງຈຳປາສັກ 40 ຄັ້ງ, ແຂວງວຽງຈັນ 38 ຄັ້ງ, ນະຄອນຫຼວງວຽງຈັນ 35 ຄັ້ງ ແຂວງທີ່ເສຍຊີວິດຫຼາຍແມ່ນ ແຂວງວຽງຈັນ 4 ຄົນ, ແຂວງສະຫວັນນະເຂດ 4 ຄົນ, ແຂວງຫຼວງພະບາງ 3 ຄົນ, ນະຄອນຫຼວງວຽງຈັນ 2 ຄົນ; ພາຫະນະທີ່ຮ່ວມເກີດອຸບັດຕິເຫດທີ່ເກີດຂຶ້ນຫຼາຍ 3 ອັນດັບແມ່ນ ລົດຈັກຕໍາລົດຈັກ 86 ຄັ້ງ, ລົດຈັກ ຕໍາລົດໃຫຍ່ 8 ຄັ້ງ, ລົດໃຫຍ່ຕໍາລົດໃຫຍ່ 29 ຄັ້ງ.

ສາເຫດອັນດັບ 1 ທີ່ພາໃຫ້ເກີດອຸບັດເຫດແມ່ນ ຄວາມໄວ 109 ກໍລະນີ ເສຍຊີວິດ 8 ຄົນ, ໃນຂະນະທີ່ດື່ມສິ່ງມຶນເມົາແລ້ວຂັບຂີ່ 75 ກໍລະນີ ເສຍຊີວິດ 14 ຄົນ ແລະ ບໍ່ປ່ອຍສິດ 50 ກໍລະນີ ເສຍຊີວິດ 3 ຄົນ.

ແຫຼ່ງຂ່າວ: ຄວາມສະຫງົບ